الماتىدا 185 كوپبالالى وتباسى باسپانالى بولادى

الماتى. قازاقپارات - بيىل الماتىدا الەۋمەتتىك وسال توپتار ءۇشىن 400 دەن استام جالدامالى پاتەر ءبولىندى، دەپ حابارلايدى قازاقپارات ءتىلشىسى.

الماتى اكىمدىگىنىڭ مالىمەتىنشە، بيىل ءۇي كەزەگىندە تۇرعان حالىقتىڭ الەۋمەتتىك وسال توپتارى ساناتىنداعى 216 ادام ساتىپ الۋ قۇقىعىنسىز جالعا بەرىلەتىن پاتەر الادى. سونىمەن قاتار 185 كوپبالالى وتباسى باسپانالى بولادى. بارلىعى 401 پاتەر بەرىلەدى.

كوپقاباتتى تۇرعىن ءۇي «نۇرلى جەر» مەملەكەتتىك باعدارلاماسى بويىنشا «جاس قانات-2» شاعىناۋدانىندا سالىندى. تۇرعىن ءۇي كەشەنىندە بارلىعى 3116 پاتەر بار. قالعان 2715 پاتەر كەزەكتە تۇرعاندارعا جەڭىلدەتىلگەن نەسيەمەن بەرىلەدى.

سونداي- اق بىلتىر قاراشا ايىندا جاسى 29 عا دەيىنگى جۇمىس ىستەيتىن جاستارعا جالدامالى پاتەر بەرۋگە قۇجاتتار قابىلدانعان بولاتىن. پاتەرلەر سانى - 1050.

ال اعىمداعى جىلعى 18-مامىردان «الماتى جاستارى» تۇرعىن ءۇي باعدارلاماسىنا قاتىسۋ ءۇشىن ءوتىنىم قابىلداۋ باستالدى.

اۆتور الما مۇقانوۆا