جاپونيا ەلگە كەلگەن ءار تۋريستكە 185دوللار تولەمەك

نۇر-سۇلتان. قازاقپارات -جاپونيا بيلىگى تۋريزم يندۋسترياسىنا جاڭاشىلدىق ەنگىزىپ وتىر، دەپ حابارلايدى «حابار 24».

پاندەميادان ەڭ كوپ زارداپ شەككەن بۇل سالاعا ساياحاتشىلاردى تارتۋ ءۇشىن ۇكىمەت ەلگە كەلگەن ءار تۋريستكە 185 دوللار تولەۋ تۋرالى شەشىم قابىلدادى. بۇل تۋرالى Kyodo News اقپارات اگەنتتىگى حابارلاپ وتىر. Go To Travel باعدارلاماسىنا مەملەكەتتىك قازىنادان 1,35 تريلليون يەن، ياعني 12,5 ميلليارد دوللار ءبولىندى. جوبا اۆتورىنىڭ ايتۋىنشا، سۋبسيديا كۇنشىعىس ەلىنە كەلگەن تۋريستەردىڭ 50 پايىز شىعىنىن جابا الادى. ۇكىمەتتەن بەرىلگەن قاراجاتتى مەيرامحانا نەمەسە ساۋدا ورىندارىندا جۇمساۋعا بولادى. ال اتالعان سومانى الۋ ءۇشىن تۋريست جەرگىلىكتى قوناقۇيلەردىڭ بىرىندە توقتاۋى مىندەتتى. ونىڭ ءوزىن جاپونيانىڭ تۋريستىك كومپانياسى ارقىلى برونداۋ قاجەت.