قازاقستان بانكتەرى 180 كەلىدەن استام التىن قۇيمالار ساتتى

الماتى. قازاقپارات - ق ر ۇلتتىق بانكى قازاقستان بانكتەرىندە التىن قۇيما ساتۋ قالاي جۇرگىزىلىپ جاتقانىن ايتتى، دەپ حابارلايدى قازاقپارات ءتىلشىسى.

ۇلتتىق بانك باسپا ءسوز قىزمەتىنىڭ حابارلاۋىنشا، وسى كۇنگە دەيىن 3 بانك ارقىلى جالپى سالماعى 180 كەلىدەن استام التىن قۇيما ساتىلعان.

التىن قۇيمالار ەكىنشى دەڭگەيدەگى بانكتەر - «قازاقستاننىڭ حالىق بانكى» ا ق، «ەۋرازيالىق بانك» ا ق جانە «سەسنابانك» ا ق ارقىلى ساتىلۋدا.

«التىن قۇيمالار نارىعىنىڭ تيىمدىلىگىنىڭ باستى فاكتورى - ەكىنشى دەڭگەيدەگى بانكتەر كليەنتەردەن اقشاسىنا ولاردى كەرى ساتىپ الادى. قۇيمالاردىڭ 5، 10، 20، 50 جانە 100 گرامدىق بەس ءتۇرى بار. بۇگىنگى كۇنى بانكتەر 180 كيلوگرامنان استام التىن ساتقان»، - دەلىنگەن حابارلامادا.

ق ر ۇلتتىق بانك تازارتىلعان التىننىڭ 2 تونناسىن سىرتقى نارىقتا ەركىن ايىرباستالاتىن ۆاليۋتاعا نەمەسە وتاندىق وندىرۋشىلەردەن جىل سايىن ساتىپ الىناتىن التىن كولەمىنىڭ شامامەن %4 دەيىنگى كولەمدە ساتۋ جونىندەگى وپەراتسيانى جۇزەگە اسىرۋدى كوزدەپ وتىر. بۇل قازاقستان وندىرۋشىلەرى قۇيمالارىنىڭ تانىمالدىعىن ارتتىرۋ ءۇشىن جاسالادى.

سونىمەن قاتار جەرگىلىكتى نارىقتا سالماعى 12-13 كەلى التىن قۇيماعا سۇرانىس بولعان جاعدايدا ۇلتتىق بانك حالىققا مۇنداي قۇيمالاردى ساتۋعا دايىن.

بۇل قۇيمالار - ينۆەستوردىڭ پورتفەلىندەگى ماڭىزدى اكتيۆ، ءارتاراپتاندىرۋ قۇرالى بولا الادى.

ال جالپى ۇلتتىق بانك التىنىنىڭ پورتفەلىندە قازىر جالپى قۇنى 13,5 ميلليارد ا ق ش دوللارى بولاتىن 342 توننا التىن بار.

بۇل كورسەتكىش باعالى مەتالل قورى بويىنشا قازاقستاندى الەمدە 15-ورىنعا شىعاردى.

باعالى مەتالداعى اكتيۆتەردى تولىقتىرۋ ءۇشىن تازارتىلعان التىندى ساتىپ الۋعا مەملەكەتتىك باسىمدىق بەرىلگەلى بەرى ۇلتتىق بانك وتاندىق وندىرۋشىلەردەن شامامەن 221 توننا تازارتىلعان قۇيما التىندى ساتىپ العان.

ەستەرىڭىزگە سالا كەتەيىك، 2017 -جىلعى مامىردا ۇلتتىق بانك حالىق ءۇشىن تازارتىلعان قۇيما التىندى ساتۋ جانە ساتىپ الۋ جونىندەگى باعدارلامانى ىسكە قوسقان بولاتىن.