قازالىدا ەڭ قىمبات كەپتەر 180 مىڭ تەڭگەگە ساتىلدى
تۇڭعىش رەت ۇيىمداستىرىلعان شاراعا ەلىمىزدىڭ ءار تۇكپىرىنەن - الماتى، تاراز، تۇركىستان، اقتوبە، شالقار قالالارى مەن كورشىلەس بايقوڭىر، ارال، سەكسەۋىل، قارماقشىدان كەلگەن جۇزدەگەن اۋەسقوي قۇس وسىرۋشىلەر وزدەرىنىڭ كەپتەرلەرىن الىپ كەلدى.
«كوگەرشىن - كەپتەردىڭ قولعا ۇيرەتىلگەن ءتۇرى، - دەپ باستادى اڭگىمەسىن اتىن جاسىرىپ قالۋدى ءجون ساناعان جارمەڭكەگە قاتىسۋشى. - ونى اكەم ەرەكشە جاقسى كورەتىن. مەنىڭ بۇل قۇستارعا قىزىعۋشىلىعىما سول سەبەپشى بولعان سەكىلدى. كوگەرشىن - وتە سەزىمتال، ەسكە ساقتاۋ قابىلەتى جوعارى قۇس. بۇلار باسقا قۇستاردان تۇمسىعىنىڭ كولەمىمەن، كەكىلىنىڭ اۋقىمدىلىعىمەن جانە تابانىنىڭ قاۋىرسىندالعاندىعىمەن ەرەكشەلەنەدى. جىلتىرباستى، مۇرنىندا كەكىلى بار، تۇلىمدى جانە قوس كەكىلدى، ۇزىن، ورتاشا جانە قىسقا تۇمسىقتى دەگەن تۇرلەرى كەزدەسەدى. قاۋىرسىندارىنىڭ ءتۇسى دە ءارتۇرلى بولىپ كەلەدى. اربىرەۋىنە ەركەلەتە بالامالى اتاۋ قويعانمىن» ، - دەپ ءاربىر قۇسىن تانىستىرعان ول.
كەپتەر اسىراۋشىلاردىڭ ايتۋىنشا، مۇنداي شارالار نەگىزىنەن حالىق تىعىز ورنالاسقان ۇلكەن قالالاردا ۇيىمداستىرىلادى ەكەن.
«بۇل - قازالى توپىراعىندا ۇيىمداستىرىلىپ وتىرعان العاشقى كوگەرشىندەر جارمەڭكەسى. نەگىزگى ماقساتىمىز - ەلىمىزدەگى كەپتەر اسىراۋشىلارمەن تىعىز قارىم- قاتىناس ورناتىپ، تانىسىپ، ءبىلىسۋ. سول ارقىلى بەيبىتشىلىكتىڭ سيمۆولى سانالاتىن بۇل قۇسقا دەگەن جاستاردىڭ قىزىعۋشىلىعىن وياتۋ. سەبەبى، قۇس وسىرگەن جانداردىڭ بوس ۋاقىتى بولمايتىنىن ءبارىمىز جاقسى بىلەمىز. سوندىقتان دا قۇس ءوسىرۋدى قولعا العان جاستار جامان ادەتتەردەن اۋلاق بولادى دەپ ويلايمىز. ءبىر جاعىنان، بۇگىنگى كۇنى كەپتەر اسىراۋدىڭ ءوزى بيزنەستىڭ ءبىر كوزى بولىپ تۇر. ولاي دەۋگە سەبەپ تە جوق ەمەس. مىسالى، وسى جارمەڭكەدە ساتىلعان ەڭ قىمبات كەپتەردىڭ باعاسى 180 مىڭ تەڭگەنى قۇرادى»، - دەيدى كەپتەرلەر جارمەڭكەسىنىڭ قازالىدا وتۋىنە مۇرىندىق بولعان ەرلان ەرەكەنوۆ.
اۆتور: سارسەنقۇل نازار