قازاقستان حالقىنىڭ سانى 18 ميلليون 468 مىڭنان استى

نۇر-سۇلتان. قازاقپارات - قازاقستان حالقىنىڭ سانى 2019 -جىلدىڭ 1 -مامىرى بويىنشا 18 ميلليون 468 مىڭ 900 ادامعا جەتىپ، 2018 -جىلدىڭ 1 -مامىرىنان بەرى 239900 ادامعا ارتتى، دەپ حابارلايدى قازاقپارات ءتىلشىسى ق ر ۇلتتىق ەكونوميكا مينيسترلىگىنە سىلتەمە جاساپ.

تارقاتا ايتقاندا، قازاقستانداعى قالالار حالقىنىڭ سانى 10 ميلليون 751,4 مىڭ ادامدى (جالپى، حالىق سانىنىڭ 58,2 پايىزى)، اۋىل حالقى 7 ميلليون 717,5 مىڭ ادامدى قۇراعان.

وسى جىلدىڭ قاڭتار- ءساۋىر ايلارىندا رەسپۋبليكادا 1 جاسقا دەيىنگى 1138 بالا شەتىنەگەن (وتكەن جىلدىڭ قاڭتار- ءساۋىر ايلارىندا 1095 بالا). بالا ولىمىنە نەگىزىنەن پەريناتالدى كەزەڭدەگى جاعدايلار سەبەپ بولىپ جاتادى. وسى سەبەپتەر بويىنشا قاڭتار- ءساۋىر ارالىعىندا 584 بالا كوز جۇمعان (وتكەن جىلدىڭ ۇقساس كەزەڭىندە 506). انوماليامەن تۋعان بالالاردىڭ 223 ى (وتكەن جىلدىڭ ۇقساس كەزەڭىندە 239) ومىردەن ءوتتى. تىنىس الۋ مۇشەسىنىڭ اۋرۋىنان 92 بالا، قايعىلى جاعدايلار مەن ۋلانۋدان، جاراقاتتاردان 37 بالا جان تاپسىرعان.

وسى جىلدىڭ قاڭتار- ءساۋىر ايلارىنىڭ ارالىعىندا قازاقستانعا كەلۋشىلەردىڭ سانى 10,8 پايىزعا ازايىپ، كەتكەن ازاماتتاردىڭ سانى 23,4 پايىزعا ارتتى. ميگراتسيالىق اعىن كوبىنەسە تمد ەلدەرىنە قاتىستى بولىپ وتىر. ت م د-دان كەلگەن جانە كەتكەندەردىڭ ۇلەسى 83,4 پايىز جانە 89 پايىزدى قۇرادى.

ەل ىشىندەگى ميگراتسيا 15,7 پايىزعا كوبەيدى. ايماقارالىق سيپاتتا وڭ سالدو ەلدىڭ ءتورت وبلىسىندا ماڭعىستاۋ وبلىسى (579)، شىمكەنت قالاسى (2768)، نۇر-سۇلتان (8463) مەن الماتى (9363) قالالارىندا بايقالادى.