بيىل نەگىزگى كاپيتالعا 18,3 تريلليون تەڭگە سوماسىندا ينۆەستيتسيا تارتىلماق

استانا. قازاقپارات - بيىل نەگىزگى كاپيتالعا 18,3 تريلليون تەڭگە ينۆەستيتسيا سالىنادى.

بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.

«ۇكىمەت الدىنا ينۆەستيتسيا تارتۋ بويىنشا ناقتى مىندەتتەر قويىلدى. بيىل جوسپار بويىنشا نەگىزگى كاپيتالعا 18,3 تريلليون تەڭگە ينۆەستيتسيا سالىنادى. بۇل كورسەتكىش بىلتىردىڭ قورىتىندىسىنان 22 پايىزعا ارتىق بولماق. شاعىن جانە ورتا بيزنەستى جۇيەلى قولداۋ شارالارى كەڭەيتىلدى. وڭدەۋ ونەركاسىبىن دامىتۋ ماقساتىندا قولداۋ كورسەتۋ ءۇشىن قىزمەت تۇرلەرىنىڭ تىزبەسى 116 عا ۇلعايتىلدى»، - دەدى ءا. قۋانتىروۆ سەناتتا قازاقستاننىڭ ينۆەستيتسيالىق احۋالى تارتىمدىلىعى تاقىرىبىندا ءوتىپ جاتقان ۇكىمەت ساعاتىندا.

ونىڭ ايتۋىنشا، قىزمەتتىڭ ءبىرقاتار باسىم ءتۇرى بويىنشا پايىزدىق ستاۆكانى سۋبسيديالاۋ مەرزىمى 5 جىلدان 7 جىلعا دەيىن ۇزارتىلدى. بيزنەستىڭ جول كارتاسىن قارجىلاندىرۋ 224 ميلليارد تەڭگەگە دەيىن ءوستى.

«شاعىن جانە ورتا بيزنەستى قولداۋ اياسىندا بيىل 20 مىڭنان استام جوبانى سۋبسيديالاۋ جانە 18 مىڭنان استام جوباعا كەپىلدىك بەرۋ ەسكەرىلگەن. اتاپ ايتقاندا، ورتا بيزنەستى قولداۋ بويىنشا قوسىمشا قادامدار جاسالادى»، - دەدى مينيستر.

بۇدان بۇرىن حابارلانعانداي، قازاقستاندا شەتەلدىك ينۆەستيتسيانىڭ باسىم بولىگى شيكىزات سەكتورىنا باعىتتالىپ جاتىر.

الىبەك قۋانتىروۆ مۇناي مەن گاز سالاسىنا ينۆەستيتسيا وسكەنىن ايتتى.