قازاقستان حالقىنىڭ سانى 18,37 ميلليونعا جەتتى

استانا. قازاقپارات - قازاقستان حالقىنىڭ سانى 2018-جىلدىڭ 1- جەلتوقسانىندا 2017-جىلعى كورسەتكىشتەن 238,9 مىڭ نەمەسە %1,3 ءوسىپ، 18 ميلليون 376,2 مىڭدى قۇرادى، دەپ حابارلايدى قازاقپارات ءتىلشىسى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنە سىلتەمە جاساپ.

اتاپ ايتقاندا، ەسەپتى كەزەڭدە قالا تۇرعىندارىنىڭ جالپى سانى 10 ميلليون 626,2 مىڭعا جەتىپ، جالپى حالىق سانىنىڭ %57,8- ىن قۇرادى. ال اۋىل تۇرعىندارى 7 ميلليون 750 مىڭ نەمەسە %42,2 بولدى.

بىلتىر قاڭتار-قاراشا ايلارىندا رەسپۋبليكادا 1 جاسقا تولماعان 2882 ءسابي شەتىنەگەن (2017-جىلدىڭ قاڭتار-قاراشا ايلارىندا - 2896). 2018-جىلدىڭ ون ءبىر ايىندا ءار 1000 ءسابيدىڭ 7,86 سى شەتىنەگەن.

سابيلەر ءولىمىنىڭ نەگىزگى سەبەبى پەريناتالدىق كەزەڭدە تۋىنداعان جاعدايلار بولعان. سونىڭ سالدارىنان بىلتىر قاڭتار-قاراشا ايلارىندا 1474 ءسابي (جالپى كورسەتكىشتىڭ %51,1 ى) شەتىنەگەن.

2018-جىلدىڭ قاڭتار-قاراشا ايلارىندا قازاقستانعا كوشىپ كەلگەندەردىڭ سانى الدىڭعى جىلعى كورسەتكىشپەن سالىستىرعاندا %20,5 ازايىپ، كەتكەندەر سانى %11,9 ارتقان. ەلگە كەلۋشىلەردىڭ %78,6 ى ت م د ەلدەرىنەن كەلسە، كەتۋشىلەردىڭ  %90,3 ى دوستاستىق ەلدەرىنە كەتكەن.

ەل ىشىندە كوشىپ-قونۋشىلاردىڭ سانى %12,2 ازايدى. ءوڭىرارالىق كوشى-قوننىڭ وڭ سالدوسى شىمكەنت (38074 ادام)، الماتى (31738) جانە استانا (17617) قالالارىنىڭ ۇلەسىنە تۋرا كەلەدى.