قازاقستاندا حالىق سانى 18,33 ميلليون ادامعا جەتتى
بۇل وتكەن جىلدىڭ 1- قازانىمەن سالىستىرعاندا 237,4 مىڭ ادامعا كوپ نەمەسە 1,3 پايىز وسكەن، دەپ حابارلايدى قازاقپارات ق ر ۇلتتىق ەكونوميكا مينيسترلىگىنىڭ ستاتيستيكا اگەنتتىگىنە سىلتەمە جاساپ.
2018-جىلعى قاڭتار-قىركۇيەكتە رەسپۋبليكادا 1 جاسقا دەيىنگى 2354 نارەستە ءولىمى تىركەلدى. 2017-جىلعى قاڭتار-قىركۇيەگىمەن سالىستىرعاندا 1 جاسقا دەيىنگى شەتىنەگەن نارەستە سانى 1,3 پايىزعا كوپ.
نارەستە ءولىم-ءجىتىمىنىڭ نەگىزگى سەبەبى - پەريناتالدىق كەزەڭدە پايدا بولاتىن جاعدايلار، بۇدان 2018-جىلعى قاڭتار-قىركۇيەگىندە 1206 نارەستە قايتىس بولىپ، نارەستەلەر اراسىنداعى جالپى ءولىم سانىنىڭ 51,2 پايىزىن قۇرادى. تۋا بىتكەن اۋىتقۋلاردان 465 نەمەسە %19,8، تىنىس ورگاندارى اۋرۋلارىنان - 152 نەمەسە %6,5، جازاتايىم جاعدايدان، ۋلانۋدان جانە جاراقاتتان - 108 نەمەسە %4,6 نارەستە قايتىس بولدى.
2018-جىلدىڭ قاڭتار-قىركۇيەك ايلارى ارالىعىندا ەلىمىزگە كوشىپ كەلگەندەر سانى 2017-جىلعى كورسەتكىشتەن 21,8 پايىز ازايىپ، قونىس اۋدارعاندار سانى 12,2 پايىزدى قۇرادى. نەگىزگى ميگراتسيالىق كوشى-قون ت م د ەلدەرى بويىنشا ءوتىپ جاتىر. ت م د ەلدەرىنەن كەلگەن ادامدار ۇلەسى 78,2 پايىز، كوشىپ كەتكەندەر ۇلەسى - 90,8 پايىز بولدى.