پەداگوگتار مارتەبەسى: مۇعالىمدەردىڭ جۇكتەمەسىن 18-دەن 16 ساعاتقا ازايتۋ كوزدەلۋدە

استانا. قازاقپارات - ءبىلىم جانە عىلىم ۆيتسە- ءمينيسترى اسحات ايماعامبەتوۆ پەداگوگتار مارتەبەسى تۋرالى زاڭدا قانداي ماسەلەلەر قامتىلاتىنىن ايتىپ بەردى، دەپ حابارلايدى قازاقپارات ءتىلشىسى.

«5 -  قازاندا ەلباسىنىڭ قازاقستان حالقىنا جولداۋىندا مۇعالىمدەردىڭ ماسەلەسى كەڭىنەن كوتەرىلگەنىن بىلەسىزدەر. ەڭ باستى نازار اۋدارارلىق جاي - كوپتەن بەرى ءبىزدىڭ ۇستازدارىمىزدىڭ كوكەيىندە جۇرگەن ماسەلەلەر ايتىلدى. سونىڭ ءبىرى - پەداگوگتاردىڭ مارتەبەسىنە قاتىستى. بۇل رەتتە وسى زالدا كوپتەگەن ارىپتەستەرىمىزدى كورىپ وتىرمىن. رەكتورلار، ديرەكتورلار ون جىل بويى پەداگوگتاردىڭ مارتەبەسى تۋرالى زاڭدى قابىلدايىق دەپ، ماسەلەنى ءار القا ماجىلىسىندە كوتەرىپ جۇرگەن بولاتىن. سوندىقتان، ەلباسى وسى زاڭدى قابىلداۋ تۋرالى تاپسىرما بەردى»، - دەدى اسحات ايماعامبەتوۆ استانادا ءوتىپ جاتقان «نۇر وتان» پارتياسى باستاۋىش ۇيىمدارىنىڭ رەسپۋبليكالىق فورۋمىندا.

ۆيتسە- مينيستر ءوز سوزىندە اتالمىش جاڭالىقتىڭ جاعىمدىلىعىن بىردەن بايقاعانىن ايتادى.

«بارلىق الەۋمەتتىك جەلىلەردە بۇگىنگى كۇنگە دەيىن وسى ماسەلە تالقىلانىپ جاتىر. بۇل شىن مانىندە، ءبىلىم سالاسىن - تاعى ءبىر ۇلكەن ساتىعا كوتەرەتىن سۇراقتاردىڭ ءبىرى. بۇل زاڭدا پەداگوگتاردىڭ الەۋمەتتىك مارتەبەسىن كوتەرەتىن ستيمۋلدار، وقۋ جۇكتەمەسىن ازايتۋ، كەرەك ەمەس تەكسەرۋ كوميسسيالارىنان قورعاۋ، تاعى باسقا ماسەلەلەردى كوتەرەتىن بولامىز. مەن وسى مىنبەردى پايدالانا وتىرىپ، سىزدەرمەن بىرگە وسى زاڭدى تالقىلاۋعا قاتىسۋلارىڭىزدى سۇراعىم كەلەدى. 2 كۇن وسىندا بولاسىزدار. بىزگە بەرەتىن ۇسىنىستارىڭىز بولسا، وتە ريزا بولار ەدىك. قازىر ءبىز الەۋمەتتىك جەلىدە دە، گازەت پەن سايتتار ارقىلى دا ۇسىنىستاردى جيناپ جاتىرمىز. ەكى- ءۇش ايدان كەيىن تۇجىرىمدامانى جاساپ، جان- جاقتى حالىقپەن تالقىلاپ، پارلامەنتكە زاڭ جوباسىن ەنگىزەتىن بولامىز»، - دەدى اسحات ايماعامبەتوۆ.

ۆيتسە- ءمينيستردىڭ ايتۋىنشا، اتالمىش زاڭ جوباسىندا تالقىلاناتىن ماسەلەلەردىڭ ءبىرى - جۇكتەمەنى ازايتۋ.

«وزدەرىڭىز بىلەتىندەي، ت م د ەلدەرىنىڭ ىشىندە ءبىز بالالارعا سالىناتىن جۇكتەمەسى جاعىنان ءسوزسىز چەمپيونبىز. ماسەلەن، 11 - سىنىپتاردا - 39 ساعات (...) بۇل وتە كوپ. البەتتە، 50-60 ساعاتقا دەيىن ۇزارتۋعا بولار، ءبىراق بۇل قادام ساپاعا قانشالىقتى اسەر ەتەدى. مىنە، سوندىقتان، مەملەكەت باسشىسى جۇكتەمەنى ازايتۋ قاجەتتىگىن ايتىپ وتىر. ءبىز بالالاردىڭ جۇكتەمەسىن ازايتا وتىرىپ، مۇعالىمدەردىڭ ساعاتى، جۇكتەمەسى، ايلىعى ماسەلەسىن شەشەمىز. اتالمىش زاڭ جوباسى اياسىندا پەدگوگتاردىڭ جۇكتەمەسىن دە ازايتۋ كوزدەلگەن. قازىر ءبىر ستاۆكانىڭ - 18 ساعات ەكەنىن بىلەسىزدەر. ءبىز ونى 16 ساعاتقا ازايتۋدى كوزدەۋدەمىز»، - دەدى ۆيتسە- مينيستر.

ەسكە سالا كەتسەك، ەلورداداعى كونگرەس- ورتالىقتا «نۇر وتان» پارتياسىنىڭ باستاۋىش ۇيىمدارىنىڭ رەسپۋبليكالىق فورۋمى ءوتىپ جاتىر.

اۆتور: ايان بەكەن ۇلى