پرەزيدەنتكە قاستاندىق جاساماق بولعان ادۆوكات 17 جىلعا سوتتالدى

استانا. قازاقپارات - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ا. اتتى ايىپتالۋشىعا ۇكىم شىعاردى، دەپ حابارلايدى قازاقپارات قالالىق سوتتىڭ باسپا ءسوز قىزمەتىنە سىلتەمە جاساپ.

سوت وتىرىسى قىلمىستىق- پروتسەسسۋالدىق كودەكستىڭ 29-بابىنا سايكەس جابىق ءوتتى.

ۇكىمگە سەنسەك، ا. كىنالى دەپ تانىلعان جانە وعان مىناداي جازا تاعايىندالعان:

- مەملەكەتكە ساتقىندىق جاساعانى ءۇشىن 11 جىلعا باس بوستاندىعىنان ايىرۋ

- ءبىر توپ اداممەن الدىن الا ءسوز بايلاسىپ، ەۋرازيا ەكونوميكالىق وداعىنىڭ شەكاراسىنان قارۋ الىپ وتكەنى ءۇشىن 9 جىلعا باس بوستاندىعىنان ايىرۋ

- ءبىر توپ اداممەن الدىن الا ءسوز بايلاسىپ، اتىس قارۋىن، جارىلعىش زاتتى زاڭسىز ساتىپ الىپ، تاسىمالداعانى، ساقتاعانى ءۇشىن 7 جىلعا سوتتاۋ

- ءبىر توپ اداممەن الدىن الا ءسوز بايلاسىپ، وق- ءدارى، جارىلعىش زات دايىنداعانى ءۇشىن 4 جىلعا باس بوستاندىعىنان ايىرۋ

- قازاقستان پرەزيدەنتىنە وشىگىپ، ونىڭ ومىرىنە قاستاندىق جاساۋعا دايىندالعانى ءۇشىن 10 جىلعا سوتتاۋ

- تەرروريزم اكتىسىنە دايىندىق جاساعانى ءۇشىن 10 جىل

- قۇقىق قورعاۋ، ارنايى مەمورگان قىزمەتكەرلەرى مەن اسكەريلەردىڭ ومىرىنە قاستاندىق جاساۋعا بەل بۋعانى ءۇشىن 10 جىلعا باس بوستاندىعىنان ايىرۋ

- شاعىن جانە اسا ءىرى كولەمدە ەسىرتكى ساتىپ الىپ، ساقتاعانى ءۇشىن 5 جىلعا سوتتاۋ.

قىلمىستىق كودەكستىڭ 58-بابى 4-بولىمىنە ساي وعان جالپى جيىنى 17 جىلعا باس بوستاندىعىنان ايىرۋ جازاسى تاعايىندالدى. ول وسى ۋاقىتتى قاۋىپسىزدىگى بارىنشا جوعارى تۇزەۋ مەكەمەسىندە وتكىزەدى.

ۇكىم زاڭدى كۇشىنە ەنگەن جوق.

ەسكە سالا كەتەيىك، 25- ناۋرىزدا ەلوردادا ق ر پرەزيدەنتىنە جانە ءبىرقاتار جوعارى لاۋازىمدى مەملەكەتتىك قىزمەتكەرلەرگە قاستاندىق جاساۋدى جوسپارلاعان شەتەل بارلاۋ اگەنتى، ا. اتتى قازاقستان ازاماتى ۇستالعان.

ول ءبىر مەزگىلدە ارناۋلى جانە قۇقىق قورعاۋ ورگاندارى قىزمەتكەرلەرىنە قاتىستى تەرروريستىك اكتىلەر جاساۋدى جوسپارلاعان.

الدىن الا تەرگەۋ بارىسىندا ق ر ازاماتى جوعارىدا كورسەتىلگەن ىستەردى شەتەل مەملەكەتىنىڭ تاپسىرماسى جانە مۇددەسىندە جاساعانىن مويىندادى.

اۆتور

جانات قاپالبايەۆا