الاكولدەگى الاپات ورتتەن 17 عيمارات جانىپ كەتتى – مينيسترلىك
5 شىلدە 14:28

الاكولدەگى الاپات ورتتەن 17 عيمارات جانىپ كەتتى – مينيسترلىك

نۇر- سۇلتان. قازاقپارات - الاكولدەگى ورتتەن 4 دەمالىس ورنىنداعى 17 عيمارات تولىعىمەن جانىپ كەتتى. قىزىل جالىن 3 مىڭ شارشى مەتر اۋماقتى شارپىعان. بۇل تۋرالى توتەنشە جاعدايلار مينيسترلىگىنىڭ رەسمي وكىلى تالعات ءۋالي ءمالىم ەتتى، دەپ حابارلايدى قازاقپارات ءتىلشىسى.

«ءورتتىڭ ناقتى شىعۋ سەبەبى ءالى انىقتالماعان. نەگىزگى ءورت شىققان عيمارات - «كەرۋەن» دەمالىس ءۇيى. 4 دەمالىس ورنىنداعى 17 عيمارات تولىعىمەن جانىپ كەتتى. ءدال قازىرگى ۋاقىتتا ءورت سوندىرىلگەن. دەمالىس ورتالىقتارىندا گيدروكران ورناتىلماعان. سۋ جاقىن بولعاندىقتان، وعان ەشقانداي قاجەتتىلىك تۋىندامادى. سۋدىڭ جەتىسپەۋشىلىگىنە بايلانىستى ماسەلە بولعان جوق. تەك ماتەريالدار تەز تۇتانعىش بولعان سوڭ ءورت جەدەل تاراپ كەتتى. 3 مىڭ شارشى مەتر اۋماققا جايىلدى»، - دەدى مينيسترلىكتىڭ رەسمي وكىلى.

تالعات ءۋاليدىڭ مالىمەتىنشە، نەگىزگى كۇش كەلگەنگە دەيىن ءتىلسىز جاۋدى دەمالىس ورنىندا ورنالاسقان ۋاقىتشا ءورت ءسوندىرۋ بەكەتتەرىنىڭ كومەگىمەن اۋىزدىقتاۋعا تىرىسقان. ال ەڭ جاقىن جەردە ورنالاسقان نەگىزگى ءورت ءسوندىرۋ بەكەتى 150 شاقىرىم جەردەگى اۋدان ورتالىعىندا بولعان. سونداي- اق، مينيسترلىك وكىلى «دەمالۋشىلار ءورتتى تولىق وزدەرى ءسوندىردى» دەگەن الەۋمەتتىك جەلىدە تاراعان اقپاراتتىڭ شىندىققا جاناسپايتىنىن مالىمدەدى.

«ءبىرىنشى كەزەكتە ءبىزدىڭ ۋاقىتشا ءورت ءسوندىرۋ بەكەتتەرى جۇمىسقا كىرىستى. دەگەنمەن ول جەرلەردە دەمالۋشىلار كومەكتەستى. وزدەرىنىڭ، بالالارىنىڭ قاۋىپسىزدىگى ءۇشىن قولۇشىن سوزدى. ءبىراق قىزىل جالىندى تولىعىمەن دەمالۋشىلار اۋىزدىقتادى دەگەن شىندىققا جاناسپايدى. الايدا، شەت قالماي كومەكتەسكەن دەمالۋشىلارعا العىس ايتامىز. پوليتسيا وقيعا ورنىنا جەتكەننەن كەيىن سول جەردەگى ادامداردى قاۋىپسىز جەرگە كوشىرىلدى. دەمالىس ورنىندا قانشا تۋريست بولعانى ءالى انىقتالىپ جاتىر»، - دەپ تۇسىنىك بەردى تالعات ءۋالي.

تالعات ءۋالي قازىر وڭىردە ارنايى كوميسسيا قۇرىلىپ، شىعىن ەسەپتەلىپ، ءورتتىڭ سالدارىن جويۋ جۇمىسى جۇرگىزىلىپ جاتقانىن جەتكىزدى. ونىڭ ايتۋىنشا، ءورت كەزىندە قۇجاتى مەن مۇلكى جانىپ كەتكەن دەمالۋشىلار ارنايى ورگاندارعا ارىز جازۋ ارقىلى شىعىنىن ءوندىرىپ الا الادى.

ەسكە سالا كەتەيىك، كەشە اباي وبلىسى ءۇرجار اۋدانىندا الاكول جاعاسىنداعى دەمالىس بازاسىندا بولعان ءورتتىڭ 5 ساعات بويى سوندىرىلگەنىن، 7 ادام زارداپ شەككەنىن جازعان بولاتىنبىز.

جاڭالىقتار