اتىراۋدا ماس بولىپ رۋلگە وتىرعان 17 ادام باس بوستاندىعىنان ايىرىلدى
ال، وسىنداي تەرىس ارەكەتى ءۇشىن ءۇش ادامعا باس بوستاندىعىن شەكتەۋ جازاسى تاعايىندالعان، دەپ حابارلايدى قازاقپارات. اتىراۋ وبلىستىق پروكۋراتۋراسىنىڭ باسقارما باستىعى بەكبالا اقىلبەكوۆتىڭ مالىمەتىنە سۇيەنسەك، بيىلعى جىلدىڭ باسىنان بەرى ق ر قىلمىستىق كودەكسىنىڭ 346-بابىمەن 20 ادام قىلمىستىق جاۋاپكەرشىلىككە تارتىلعان.
«ەلىمىزدە 2020 -جىلدان باستاپ كولىك قۇرالىن ماساڭ كۇيدە باسقارۋ قىلمىستىق قۇقىق بۇزۋشىلىعىن جاساعانى ءۇشىن جازانى قاتاڭداتۋ بولىگىنە تۇزەتۋلەر ەنگىزىلدى. مۇنداي ادامداردىڭ قىلمىستىق جاۋاپتىلىعى قىلمىستىق تەرىس قىلىقتاردان قىلمىستار ساناتىنا اۋىستىرىلدى. ەندى ماس كۇيىندە كولىك قۇرالىن باسقارعان جۇرگىزۋشى ءومىر بويىنا كولىك قۇرالىن باسقارۋ قۇقىعىنان ايىرىلادى. ءتىپتى بەس جىلعا دەيىن باس بوستاندىعىنان ايىرىلۋى مۇمكىن»، - دەيدى باسقارما باستىعى بەكبالا اقىلبەكوۆ.
ونىڭ تۇسىندىرۋىنشە، ەگەر ماس جۇرگىزۋشىلەر جول- كولىك وقيعاسىن جاسايتىن بولسا، وندا ودان دا ۇزاق مەرزىم - سەگىز جىلعا دەيىن باس بوستاندىعىنان ايىرىلۋى مۇمكىن. ال، ولاردىڭ كىناسىنەن جول اپاتىنان ادامدار قايتىس بولسا، ق ر قىلمىستىق كودەكستىڭ كوزدەلگەن باپقا سايكەس ون جىلعا دەيىن باس بوستاندىعىنان ايىرۋ جازاسى قاراستىرىلعان.
«اتىراۋ وبلىسىندا جىل باسىنان بەرى ماس كۇيىندە كولىك جۇرگىزگەنى ءۇشىن 20 ادام قىلمىستىق جاۋاپكەرشىلىككە تارتىلدى. ونىڭ ىشىندە 3 ادامعا باس بوستاندىعىن شەكتەۋ، ال، 17 ادامعا باس بوستاندىعىنان ايىرۋ جازاسى تاعايىندالدى. سول سەبەپتەن، بۇل ماسەلەنىڭ ماڭىزىن ەسكەرىپ، جۇرگىزۋشىلەرگە ماس كۇيدە كولىك قۇرالىن باسقارماۋعا كەڭەس بەرەمىز»، - دەپ ءمالىم ەتتى وبلىستىق پروكۋراتۋرانىڭ باسقارما باستىعى بەكبالا اقىلبەكوۆ.
ەسكە سالا كەتەلىك، بۇعان دەيىن ءومىر بويىنا كولىك جۇرگىزۋ قۇقىعىنان ايىرىلعان اتىراۋلىق كۋالىكتى قايتا العانىن جازعان بولاتىنبىز.