الماتى وبلىسىندا 17 جاستاعى قىز قۇرداسىن پىشاقتادى
الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 13 - ماۋسىم كۇنى قاراتال اۋداندىق پوليتسيا باسقارماسىنا ورتالىق اۋداندىق اۋرۋحانادان حابارلاما تۇسكەن - باستوبە اۋىلىنىڭ 17 جاستاعى تۇرعىنى پىشاق جاراقاتىن العان.
تەرگەۋ بارىسىندا انىقتالعانداي، زارداپ شەككەن قىز 17 جاستاعى كۇدىكتىمەن مەكتەپتەن تانىس جانە ارالارىندا جاعىمسىز قارىم-قاتىناس بولعان. وقيعادان ءبىر كۇن بۇرىن ولاردىڭ اراسىندا كوشەدە كيكىلجىڭ تۋىنداعان. ماسەلەنى سوڭىنا جەتكىزۋ ءۇشىن جابىرلەنۋشى تانىسىن تۇندە كەزدەسۋگە شاقىرىپ، ۇرا باستاعان.
سوققىنىڭ استىندا قالعان ەكىنشى قىز قاشىپ قۇتىلىپ، ءوز ءۇيىنىڭ اۋلاسىندا جاسىرىنعان.
«ول جەردەن جينالمالى پىشاق تاۋىپ الىپ، ارتىنان كەلگەن زامانداسىنىڭ ىشىنەن ۇرعان. قىلمىس قۇرالى ايعاقزات رەتىندە تاركىلەنىپ، ىسكە دالەل رەتىندە تىركەلدى. كۇدىكتى اتا-اناسىنىڭ قولىنا تاپسىرىلدى. قازىر دەنساۋلىققا قاساقانا زيان كەلتىرۋ ياعني، ق ر ق ك 106-بابى 1-بولىگىنە سايكەس تەرگەۋ ءجۇرىپ جاتىر»، - دەلىنگەن الماتى وبلىستىق پوليتسيا دەپارتامەنتى باسپا ءسوز قىزمەتى جاريالاعان حابارلامادا.
سونداي-اق پ د اقپاراتىنا سايكەس، الماتى وبلىسىنىڭ پانفيلوۆ اۋدانىندا 19 جاستاعى تۇرعىننىڭ توسەگىنەن، ياعني ماتراتس استىنان پىشاق پەن تاپانشا تابىلدى. ايعاقزاتتى پوليتسەيلەر «قارۋ» الدىن-الۋ پروفيلاكتيكالىق شاراسى بارىسىندا ىزدەپ تاپقان.