ۇكىمەت باسشىسى: بيىل 17 ميلليون شارشى مەتر باسپانا پايدالانۋعا بەرىلەدى
بۇل تۋرالى بۇگىن تۇرعىن ءۇي ساياساتىنىڭ جاڭا تاسىلدەرى قارالعان ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«تۇرعىن ءۇي ساياساتىن ءتيىمدى ىسكە اسىرۋ ەلباسى نۇرسۇلتان ءابىش ۇلى نازاربايەۆتىڭ 2030-جىلى ۇيمەن قامتاماسىز ەتۋدى 1 ادامعا 30 شارشى مەترگە دەيىن جەتكىزۋ تۋرالى تاپسىرماسىن ورىنداۋعا مۇمكىندىك بەرەدى. مەملەكەت باسشىسى قاسىم-جومارت كەمەل ۇلى توقايەۆ «نۇر وتان» پارتياسىنىڭ سايلاۋالدى باعدارلاماسىن تانىستىرعان كەزدە الداعى بەس جىلدا 100 ميلليون شارشى مەتردەن استام ءۇي سالۋدى تاپسىردى. وسىلايشا ءبىز 1 ميلليونعا جۋىق وتباسىن ۇيمەن قامتاماسىز ەتە الامىز»، - دەدى اسقار مامين.
ونىڭ اتاپ وتۋىنشە، وسىنداي اۋقىمدى مىندەتتەردى جۇزەگە اسىرۋ ءۇشىن تۇرعىن ءۇي ساياساتىنا رەفورما جۇرگىزىلىپ جاتىر. وندا تۇرعىن ءۇيدىڭ قولجەتىمدىلىگىن ارتتىرۋ، جەكە قۇرىلىس سالۋشىلاردىڭ ينۆەستيتسيالارىن جالدامالى تۇرعىن ءۇي سالۋعا تارتۋ ءۇشىن جاڭا شارالار كەشەنى كوزدەلگەن.
«بۇل جۇمىستا «وتباسى بانك» نەگىزگى قۇرال بولماق. ول باسپاناعا مۇقتاج ادامداردىڭ كەزەگىن ءبىر ورتالىقتان قالىپتاستىرىپ، «نۇرلى جەر» مەملەكەتتىك باعدارلاماسى اياسىندا ولارعا جەڭىلدىكتى تۇرعىن ۇيلەردى ساتادى. بارلىعى وسى جىلى 17 ميلليون شارشى مەتر ءۇيدى پايدالانۋعا بەرۋ جوسپارلانعان، بۇل وتكەن جىلعا قاراعاندا 2 ميلليون شارشى مەترگە كوپ»، - دەدى اسقار مامين.