قازاقپارات كۇنتىزبەسى: 17- قاڭتار
اتاۋلى كۇندەر
دۇنيەجۇزىلىك دىندەر كۇنى
جىل سايىن قاڭتار ايىنىڭ ءۇشىنشى جەكسەنبىسىندە ب ۇ ۇ- نىڭ باستاماسىمەن الەمدە دۇنيەجۇزىلىك دىندەر كۇنى (World Religion Day) اتاپ وتىلەدى.
اتاۋلى كۇننىڭ تاريحى 1950-جىلى باستالدى. داتانى بارلىق الەمدىك دىندەردىڭ مازمۇنىنىڭ ءبىرتۇتاستىعىن جەتكىزۋ جانە ءدىن الەمدى كەرىستىرەتىن ەمەس، كەرىسىنشە، بىرىكتىرەتىن كۇش ەكەندىگىن كورسەتۋ ماقساتىندا ا ق ش- تا بەكىتىلدى.
دۇنيەجۇزىلىك قار كۇنى (حالىقارالىق قىسقى سپورت تۇرلەرى كۇنى)
جىل سايىن قاڭتاردىڭ ءۇشىنشى جەكسەنبىسىندە اتاپ وتىلەدى. حالىقارالىق شاڭعى سپورتى فەدەراتسياسىنىڭ باستاماسىمەن بەكىتىلگەن. باستى ماقساتى - 4-14 جاس ارالىعىنداعى بالالار اراسىندا قىسقى سپورت تۇرلەرىن ناسيحاتتاۋ.
اپپاراتتىق ەركىندىك كۇنى
(ەركىن اپپاراتتىق قامتاماسىز ەتۋ كۇنى) Digital Freedom Foundation ۇيىمى 2012-جىلى جۇرتشىلىقتىڭ اشىق اپپاراتتىق قامتاماسىز ەتۋ تۋرالى حاباردارلىعىن ارتتىرۋ جانە ونىڭ ودان ءارى دامۋىن ىنتالاندىرۋ ماقساتىندا قۇرعان. اشىق جانە ەركىن اپپاراتتىق فيلوسوفيانىڭ نەگىزى ديزايننىڭ اشىقتىعى (سحەمالار، سىزبالار جانە ت. ب.)، ميكروباعدارلاما، وپەراتسيالىق جۇيە جانە قولدانبالى باعدارلامالار، ءوز قاجەتتىلىكتەرىنە بەيىمدەلۋ جانە موديفيكاتسيالاۋ مۇمكىندىگى، وقۋعا اشىقتىق، ناقتى وندىرۋشىدەن تاۋەلسىزدىك جانە باسقا دا ءبىرقاتار پرينتسيپتەر.
بالالار ونەرتابىسى نەمەسە ونەرتاپقىش بالالار كۇنى
بۇل كۇن ا ق ش- تىڭ ايگىلى ونەرتاپقىشى، مەملەكەت قايراتكەرى، عالىم، جۋرناليست بەندجامين فرانكليننىڭ تۋعان كۇنىنە وراي تاڭدالعان. ول ءوزىنىڭ ەڭ العاشقى ونەرتابىسى - جۇزۋگە ارنالعان قول جارعاقتى 12 جاسىندا ويلاپ تاپقان ەكەن.
ەستە قالار وقيعالار
1992 -جىلى جوعارعى كەڭەس «قازاقستان رەسپۋبليكاسىنىڭ پروكۋراتۋراسى تۋرالى» زاڭ قابىلدادى.
2006 -جىلى قازاقستان رەسپۋبليكاسى پارلامەنتىنىڭ 10 جىلدىق مەرەيتويىنا ارنالعان پوشتا ماركالارىن «قازپوشتا» ا ق اينالىمعا شىعاردى. پوشتا ماركاسىندا پارلامەنتتىڭ 10 جىلدىق مەرەيتويىنىڭ رەسمي سيمۆوليكاسى قازاقستاننىڭ تۋىن بەينەلەيتىن كوگىلدىر تۇستە بەينەلەنگەن.
ماركالاردىڭ نومينالى - 50 تەڭگە، تيراجى - 50 مىڭ دانا. سۋرەتشىسى - دانيار مۇحامەدجانوۆ.
2010 -جىلى استانادا ماسكەۋ جانە بۇكىل رەسەي پاتريارحى كيريلل جاڭادان سالىنعان ۋسپەن كافەدرالدىق سوبورىن دارىپتەۋ ءراسىمىن وتكىزدى. ۋسپەن كافەدرالدىق سوبورى استانادا قاسيەتتى ۋسپەنيا قۇداي-انانىڭ قۇرمەتىنە سالىندى.
بۇل سوڭعى ونجىلدىقتاعى ورتالىق ازيادا تۇرعىزىلعان العاشقى كافەدرالدىق حرام. حرامعا ءبىر مەزگىلدە ءتورت مىڭ ادامعا دەيىن سىيادى.
2011 -جىلى جۋالى اۋدانىنداعى حالىق جازۋشىسى، اڭىزعا اينالعان قولباسشى- باتىر باۋىرجان مومىش ۇلىنىڭ مۇراجايىنا باتىردىڭ جەكە زاتتارى تاپسىرىلدى.
2012 -جىلى ق ر ۇلتتىق بانكى قازاقستانداعى VII قىسقى ازيا ويىندارىنا ارنالعان 2000 تەڭگە نومينالىنداعى بانكنوتتاردى اينالىمعا ەنگىزدى.
2012 -جىلى جامبىلدىق سۋرەتشى ايدارحان سيحايەۆ تارازداعى ەڭ بيىك ءمۇسىندى قاشاپ جاسادى. قوزى كورپەش پەن بايان سۇلۋدىڭ وشپەس ماحابباتىنا ارنالعان ەسكەرتكىشتىڭ بيىكتىگى بەس مەتردى قۇرايدى، ءمۇسىن قولا جالاتىلعان بەتوننان جاسالدى.
2014 -جىلى ق ر پرەزيدەنتى نۇرسۇلتان نازاربايەۆ تاۋەلسىزدىك سارايىندا حالىققا جىل سايىنعى جولداۋىن جاريالاپ، وندا «قازاقستان-2050» ستراتەگياسىن جۇزەگە اسىرۋ ماسەلەلەرى ايتىلدى.
2015-جىلى ابۋ-دابيدە IRENA جاڭارتىلاتىن ەنەرگيا جونىندەگى حالىقارالىق اگەنتتىگى اسسامبلەياسىنىڭ 5-سەسسياسىندا قازاقستان رەسپۋبليكاسى اعىمداعى سەسسيانىڭ ۆيتسە- پرەزيدەنتى بولىپ سايلاندى. ءابۋ-دابيدەگى كونفەرەنتسياعا 170 كە جۋىق دەلەگاتسيا قاتىسىپ وتىرعانىن ەسكەرسەك، اسا زور جەتىستىك.
2015 -جىلى ءال-فارابي اتىنداعى قازاق ۇلتتىق ۋنيۆەرسيتەتى الەم ۋنيۆەرسيتەتتەرى كونسورتسيۋمىنىڭ (WUC) تولىققاندى مۇشەسىنە اينالدى. الەم ۋنيۆەرسيتەتتەرى كونسورتسيۋمى عالامنىڭ جەتەكشى ج و و- لارى مەن عىلىم مەن ءبىلىم بەرۋ سالاسىنداعى حالىقارالىق ۇيىمداردى بىرىكتىرەدى.
ايتا كەتەرلىگى، ءار مەملەكەتتەن تەك ءبىر عانا ۋنيۆەرسيتەت WUC مۇشەسى بولا الادى.
2017 -جىلى Bloomberg اگەنتتىگىنىڭ ساراپشىلارى الەمدەگى يننوۆاتسيالىق ەكونوميكاسى دامىعان ەلدەردىڭ رەيتينگىن جاسادى. وندا قازاقستان 45,56 تارماقتىق كورسەتكىشپەن 48 ورىن الدى. ايتا كەتەرلىگى، قازاقستان بۇل رەيتينگ تىزىمىنە ەنگەن ورتالىق ازياداعى جالعىز مەملەكەت بولدى.
2018 -جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ا ق ش- قا جاساعان رەسمي ساپارىنىڭ اياسىندا عارىش سالاسىندا جەردى قاشىقتىقتان زوندتاۋ بويىنشا عارىش تەحنولوگيالارىن قولدانۋ جانە كەڭىستىكتەگى مالىمەتتەر ينفراقۇرىلىمىن دامىتۋ سالاسىندا ءوزارا ءتيىمدى ىنتىماقتاستىققا باعىتتالعان ءبىرقاتار قۇجاتتارعا قول قويىلدى.
2019-جىلى تۇركىستان وبلىسىنىڭ تاريحي جانە قاسيەتتى ورىندارى تۋرالى البوم-كىتاپتار جارىققا شىقتى. اۆتورلىق ۇجىم تۇركىستان وبلىسىنىڭ تاريحي-كيەلى ورىندارى تۋرالى اقپاراتتى جيناقتاپ، قورىتىندىلاۋدى ماقسات ەتكەن.
«وڭتۇستىكتىڭ قاسيەتتى ورىندارى: اڭىز-ءاپسانالار» كىتابى وقىرماندارعا بەلگىلى تاريحي فاكتىلەر مەن وقيعالاردى كەڭىنەن تۇسىندىرەتىن اقپارات الۋعا مۇمكىندىك بەرەدى. ۇسىنىلعان كىتاپتار جاقسى سۋرەتتەلگەن، كەڭ اۋقىمدى وقىرماندار قاۋىمىنا ارنالعان جانە ءۇش تىلدە - قازاق، ورىس جانە اعىلشىن تىلدەرىندە شىعارىلعان.
2020 -جىلى قازاقستاندا يمپورتتى الماستىرۋ جونىندەگى كەڭەس قۇرىلدى، ونىڭ الاڭىندا بيزنەس- قوعامداستىق ۋاكىلەتتى مەملەكەتتىك ورگاندارمەن جانە ۇيىمدارمەن بىرلەسىپ، جەرگىلىكتى قامتۋدى جانە رەتتەلەتىن ساتىپ الۋ جۇيەسىن دامىتۋ، كەدەندىك-تاريفتىك ساياسات، تەحنيكالىق رەتتەۋ، شيكىزات بازاسىن دامىتۋ، ينفراقۇرىلىمدىق دامۋ، مەملەكەتتىك قولداۋ شارالارىنىڭ تيىمدىلىگىن ارتتىرۋ، ونەركاسىپتىك كووپەراتسيا مەن سۋبكونتراكتاتسيانى دامىتۋ جانە وڭدەۋشى ونەركاسىپتى دامىتۋعا قاتىستى باسقا دا ماسەلەلەر تالقىلاناتىن بولادى.