+7 (701) 759 90 19
-8 °С : نۇر-سۇلتان
-3 °С : الماتى
USD 420.67 EUR 510.99
RUB 5.58 CNY 64.92
جاڭالىقتار

كارانتين رەجيمى: 17 -تامىزدان باستاپ قانداي وزگەرىستەر بولادى

14 تامىز 18:48
:ءبولىسۋ
كارانتين رەجيمى: 17 -تامىزدان باستاپ قانداي وزگەرىستەر بولادى

نۇر- سۇلتان. قازاقپارات - 17 - تامىزدان باستاپ كارانتين رەجيمى جەڭىلدەتىلەدى. وسىعان وراي كوپتەگەن كاسىپكەرلىك سۋبەكتىلەردىڭ جۇمىسى قايتا جاندانادى.

قازاقپارات دۇيسەنبىدەن باستاپ قانداي وزگەرىستەر بولاتىنىنا شولۋ جاسادى.

كارانتين جايىندا وسى ۋاقىتقا دەيىن قىزمەتىنە تىيىم سالىنباعان نىساندار دۇيسەنبىدەن ءارى جۇمىسىن جالعاستىرا بەرەدى. وسى نىسانداردان بولەك، ساۋدا جانە ويىن- ساۋىق ورتالىقتارى مەن ساۋدا ۇيلەرىنىڭ جۇمىسى قايتا جاندانادى.

«ەگەر بۇعان دەيىن ساۋدا ورتالىقتارىندا ءدارىحانالار مەن ازىق- تۇلىك دۇكەندەرى عانا جۇمىس ىستەسە، دۇيسەنبىدەن باستاپ ساۋدا ورتالىقتارىندا بۋتيكتەردە دە جۇمىس ىستەي الادى. سونداي- اق، ساۋدا جەلىلەرى مەن اشىق بازارلار جۇمىس ىستەي باستايدى. سۇلۋلىق سالوندارىنىڭ، سۇلۋلىق ورتالىقتارىنىڭ، شاشتارازداردىڭ، SPA- ورتالىقتارىنىڭ جۇمىسىنا رۇقسات ەتىلەدى. بۇل نىسانداردىڭ بارلىعىنا قاتاڭ تالاپتار قويىلادى» ، - دەدى ق ر باس مەملەكەتتىك سانيتارلىق دارىگەرى ايجان ەسماعامبەتوۆا ورتالىق كوممۋنيكاتسيالار قىزمەتىندە وتكەن ونلاين بريفينگتە.

سونداي- اق، بيزنەس نىساندارى وسى تالاپتارعا ساي بولۋى كەرەك. تالاپتار ەڭ الدىمەن، كارانتيندى جەڭىلدەتۋدىڭ العاشقى كەزەڭدەرىندە نىساندا ادامداردىڭ كوپ جينالماۋىنا، الەۋمەتتىك قاشىقتىقتىڭ قامتاماسىز ەتىلۋىنە باعىتتالعان. ەرەسەكتەر مەن بالالارعا ارنالعان ءبىلىم بەرۋ ورتالىقتارى دا اشىلاتىنىن ايتا كەتۋ كەرەك. اتالعان ورتالىقتاردىڭ قىزمەتى شەكتەلەدى، ياعني ءبىر توپتا 5 ادامنان اسپاۋى كەرەك. ال ساباقتار الدىن الا جازىلۋ، كۇشەيتىلگەن دەزينفەكتسيا جانە الەۋمەتتىك قاشىقتىقتى ساقتاۋ ارقىلى جۇرگىزىلۋى كەرەك.

«مەكتەپكە دەيىنگى مەكەمەلەردىڭ جۇمىسىنا دا رۇقسات ەتىلەدى، ءبىرىنشى كەزەڭدە ولار كەزەكشى توپتار تۇرىندە جۇمىس ىستەيدى. ءار جاسقا 15 بالادان اسپايتىن كەزەكشى توپتار قۇرىلادى»، - دەيدى ايجان ەسماعامبەتوۆا.

دۇيسەنبىدەن باستاپ اشىق اسپان استىنداعى اتتراكتسيوندارعا رۇقسات ەتىلەدى. مۇنداي جاعدايدا الەۋمەتتىك قاشىقتىقتى ساقتاۋ، كەلۋشىلەر اعىنىن رەتتەۋ جانە ماسكا تاعۋ مىندەتتى. ق ر باس مەملەكەتتىك سانيتارلىق دارىگەردىڭ ايتۋىنشا، فيتنەس ورتالىقتارى دا جۇمىسىن باستايدى. باستاپقى كەزەڭدە فيتنەس ورتالىقتاردا باسسەين جۇمىس ىستەمەيدى جانە ءار ادام ءۇشىن كەم دەگەندە 5 شارشى مەتر جەر قارالۋى كەرەك. سونىمەن قاتار، مونشا مەن ساۋنالار قانداي تارتىپتە جۇمىس ىستەيتىنى بەلگىلى بولدى. باستاپقى كەزەڭدە مونشا مەن ساۋنالاردىڭ جۇمىسى باسسەينسىز جۇمىس جاسايدى. نىساننىڭ ءىشى %50 بوس بولۋى كەرەك جانە ءار كەلۋشىگە كەم دەگەندە 4 شارشى مەتر اۋماقتان كەلۋى ءتيىس. ا. ەسماعامبەتوۆا اتاپ وتكەندەي، كوروناۆيرۋستىڭ تارالۋ سانىن ازايتۋ بويىنشا قول جەتكىزىلگەن ديناميكانى ساقتاپ قالۋ قاجەت.

«ياعني، قازاقستانداعى كوروناۆيرۋس بويىنشا ەپيدەميولوگيالىق جاعدايدىڭ تۇراقتانۋىن سيپاتتايتىن ديناميكانى ساقتاپ قالۋ كەرەك. سوندىقتان، ءبىرىنشى كەزەڭدە قاشىقتان جۇمىس ىستەۋ بويىنشا 80/20 قاتىناسى ساقتالادى. مۇمكىندىگىنشە، قاشىقتان جۇمىس فورماتىن ساقتاپ، جۇمىسقا قىزمەتكەرلەردىڭ% 20 عانا كەلگەنى دۇرىس»، - دەيدى ول.

قوعامدىق كولىك قوزعالىسى قايتا جاندانادى، ءبىراق قويىلاتىن تالاپتار كۇشەيتىلدى.

«قوعامدىق كولىكتەر وتىراتىن ورىندار سانىنا قاراي تولتىرىلادى. مىندەتتى تالاپتار - ماسكا رەجيمى جانە سوڭعى ايالداماردا دەزينفەكتسيا جاساۋ. الەۋمەتتىك قاشىقتىق پەن جەكە گينيەنانى ساقتاۋدىڭ دا ماڭىزى زور» ، - دەيدى ايجان ەسماعامبەتوۆا.

17 - تامىزدان باستاپ سپورتشىلار مەن سپورت سۇيەر قاۋىم ءۇشىن دە جاقسى جاڭالىق: ەلىمىزدە ۇلتتىق قۇرامالار مەن سپورتتىق كلۋب كوماندالارىنا جاتتىعۋعا قايتا كىرىسۋگە رۇقسات ەتىلەدى.

«تۇرعىندارعا سپورتپەن شۇعىلدانۋعا رۇقسات ەتىلەدى. بۇل - جەكە سپورت تۇرلەرى، اشىق اسپان استىندا توپتىق جاتتىعۋلار. جاتتىعۋ جاسايتىندار سانى 5 ادامنان اسپاۋى كەرەك جانە الەۋمەتتىك قاشىقتىقتى ساقتاۋعا مىندەتتى. بۇعان قوسا، ءبىز سپورتتىق بازالاردا 30 ادامنان اسپايتىن جاعدايدا جانە ۇلتتىق پروفيلاكتيكالىق جانە ەپيدەمياعا قارسى ءىس- شارالار ساقتالاتىن بولسا، ۇلتتىق قۇراما كوماندالارعا، سپورتتىق كلۋبى كوماندالارىنا سپورتتىق جاتتىعۋلار وتكىزۋگە رۇقسات بەردىك. حالىق ءۇشىن ءبىر وتباسى مۇشەلەرىن قوسپاعاندا كوشەدە 3 ادامنان كوپ جۇرۋگە رۇقسات ەتىلمەيدى. ساياباقتارعا، الاڭدارعا، جاعالاۋلارعا، ياعني اشىق اسپان استىنداعى بارلىق نىساندارعا بارۋعا بولادى. ءبىراق الەۋمەتتىك قاشىقتىقتى قاداعالاۋ كەرەك» ، - دەيدى ول.

ال باسسەيندەردى اشۋ كارانتيندىك شارالاردى جەڭىلدەتۋدىڭ ەكىنشى كەزەڭىندە قارالادى. ياعني، ەپيدەميولوگيالىق جاعدايدىڭ تۇراقتانۋى مەن ونىڭ جاقسارۋىنا ايرىقشا ەكپىن قويىلادى.

«باسسەيندەرگە ايتارلىقتاي قاتاڭ تالاپتاردى قويامىز. سايكەسىنشە، بيزنەس- قوعامداستىق بۇل تالاپتارعا دايىن بولۋى ءتيىس»، - دەيدى ق ر باس مەملەكەتتىك سانيتارلىق دارىگەر.

ايتا كەتەيىك، 13 - تامىزدا ق ر پرەمەر- ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا كارانتين شارالارىن كەزەڭ- كەزەڭىمەن الىپ تاستاۋ جوسپارى بەكىتىلدى. ايتا كەتەيىك، كوروناۆيرۋسقا قاتىستى ەپيدەميولوگيالىق جاعدايدى ودان ءارى تۇراقتاندىرۋ ماقساتىندا دەمالىس كۇندەرى شەكتەۋ شارالارى ساقتالادى.

«نە سەبەپتى دەمالىس كۇندەرى لوكداۋندى ساقتايمىز؟ ءبىرىنشى ماقسات - قول جەتكىزىلگەن كورسەتكىشتەردىڭ وڭتايلى ديناميكاسىن ساقتاۋ. ينفەكتسيانىڭ تارالۋىندا باستى سەبەپ نە؟ ول - ادامداردىڭ قارىم- قاتىناسى. وزدەرىڭىز جاقسى بىلەسىزدەر، دەمالىس كۇندەرى ادامداردىڭ ءوزارا قارىم- قاتىناسى كوبەيەدى، تۇرعىنداردىڭ ساپارعا شىعۋى ارتادى» ، - دەيدى ايجان ەسماعامبەتوۆا.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات