17-تامىزدان كەيىن دە دەمالىس كۇندەرى كارانتين قاتاڭ ساقتالادى
«ىندەتتىڭ تارالۋ ءوسىمى توقتادى جانە مەديتسينا ماماندارىنىڭ جۇكتەمەسى ازايدى. وسىنى نەگىزگە الا وتىرىپ ەلىمىزدە كارانتيندىك شارالارىن بىرتىندەپ جەڭىلدەتۋگە شەشىم قابىلداندى. سونىمەن، 2020 -جىلعى 17-تامىزىنان باستاپ بارلىق وڭىردە ساۋدا ويىن- ساۋىق ورتالىقتارى، ساۋدا جەلىلەرى، جابىق بازارلار، سۇلۋلىق سالوندارى، شاشتاراز، سپا ورتالىقتار، كوسمەتولوگيالىق قىزمەت كورسەتەتىن كاسىپكەرلىك سۋبەكتىلەرىنىڭ قىزمەتى جاندانادى»، - دەپ اتاپ وتەدى ۆەدومستۆو Telegram پاراقشاسىندا جاريالانعان اقپاراتىندا.
مينيسترلىك مالىمەتىنشە، سونىمەن قاتار، باسسەينى جوق فيتنەس ورتالىقتار، باسسەينى جوق مونشالار مەن ساۋنالار، ءبىلىم بەرۋ ورتالىقتارى، مەكتەپكە دەيىنگى بالالار مەكەمەلەرىنىڭ كەزەكشى توپتارى، اشىق اۋاداعى اتتراكتسيوندار جۇمىسىن باستايدى. ەسكەرەتىن جايت، اتالعان سۋبەكتىلەر مەيلىنشە جارتىلاي قۋاتتىلىقپەن جۇمىس ىستەگەنى دۇرىس.
تۇتىنۋشىلاردى توپتاپ قابىلداۋعا بولمايدى. سونىمەن قاتار، جۇمىس بەرۋشىلەر ءۇشىن قىزمەتكەرلەردىڭ 80 پايىز قاشىقتان ەڭبەك ەتۋ ەرەجەسىن ساقتاۋى ۇسىنىلادى.
«جۇمىس كۇندەرى كارانتيندىك شارالار جەڭىلدەگەنمەن، دەمالىس كۇندەرى كارانتين ءتارتىبى قاتاڭ ساقتالادى. 65 جاستان اسقان ازاماتتاردىڭ كوشەگە شىعۋى شەكتەلەدى. قوعامدىق كولىكتەردىڭ قوزعالىسى توقتايدى جانە دەمالىس كۇندەرى جۇمىسقا بارۋعا تىيىم سالىنادى. سەنبى- جەكسەنبىدە تەك ازىق- تۇلىك دۇكەندەرى مەن ءدارىحانالاردىڭ جۇمىسىنا رۇقسات ەتىلەدى»، - دەپ اتاپ وتەدى دەنساۋلىق ساقتاۋ مينيسترلىگىنەن.
ەسكە سالساق، بۇگىن قر پرەمەر- ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا قالىپتاسقان ەپيدەميولوگيالىق جاعدايدى ەسكەرە وتىرىپ، كارانتين شارالارىن كەزەڭ- كەزەڭىمەن الىپ تاستاۋ جوسپارى قارالدى. سونىمەن قاتار، 17 -تامىزدان كەيىن قانداي شەكتەۋلەر ساقتالاتىندىعى تۋرالى ايتىلدى.