+7 (701) 759 90 19
18 °С : نۇر-سۇلتان
20 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

استانانى قايدا اۋىستىرامىز دەگەن كەزدە ەلباسىنا 17 ۇسىنىس تۇسكەن ەدى -  ميربولات جاقىپوۆتىڭ ەستەلىگى

2 شىلدە 13:48
:ءبولىسۋ
استانانى قايدا اۋىستىرامىز دەگەن كەزدە ەلباسىنا 17 ۇسىنىس تۇسكەن ەدى -  ميربولات جاقىپوۆتىڭ ەستەلىگى

نۇر- سۇلتان. قازاقپارات - قازاقستان استاناسىنىڭ الاتاۋدان ارقاعا كوشىرۋ ىسىنە بەلسەندى اتسالىسقان مەملەكەتتىك قىزمەتكەرلەردىڭ ءبىرى - ميربولات جاقىپوۆ.

ق ر پرەزيدەنتى اكىمشىلىگىنىڭ جالپى ءبولىمىن 1996-2018 -جىلدار ارالىعىندا باسقارعان ول توقسانىنشى جىلداردىڭ ىشىندەگى ەستەلىكتەرىمەن ءبولىستى.

ميربولات جاقىپوۆ قازىر مەملەكەتتىك بانك مەكەمەلەرى جانە قوعامدىق قىزمەت كورسەتۋ قىزمەتكەرلەرىنىڭ ساپالىق كاسىپوداعىنىڭ ءتوراعاسى. «Antikor LIVE» جوباسىندا قازىرگى جاس بۋىن بىلە بەرمەيتىن قىزىقتى اڭگىمەلەردى ايتىپ بەردى.

«بۇرىن استانا كۇنىن 10- ماۋسىمدا تويلايتىن ەدىك. ەلوردامىزدىڭ ءبىرىنشى جىلدىعىن ءدال سول كۇنى اتاپ وتكەنىمىز ەسىمدە. كۇن سالقىن بولدى، جاڭبىر جاۋىپ تۇردى. الماتىدان كەلگەن ءبىز ابدەن توڭىپ قالعانبىز. ارقاداعى اۋا- رايىنا سول تۇستا بەيىمدەلە باستادىق. جالپى استانا كۇنىنىڭ 6 - شىلدەگە اۋىسۋىنىڭ بىرنەشە سەبەبى بار. جوعارعى كەڭەس ەڭ العاشقى رەسمي شەشىمدى 1994 -جىلى 6 - شىلدەدە قابىلداعان بولاتىن. تاريحتان بىلەتىندەرىڭىزدەي، بۇل شەشىم وتە قيىن ءوتتى. ءابىش كەكىلبايەۆ اعامىزدىڭ ەستەلىگىنەن وقىپ كورسەڭىز كوزىڭىز جەتەدى. 6 - شىلدە ەلباسىنىڭ تۋعان كۇنى بولعاننان كەيىن دەپۋتاتتاردىڭ كوبى «سىيلىق جاسايىق» دەپ داۋىس بەرىپ، شەشىم قابىلدانعان»، - دەپ ەسكە الادى وتكەن ۋاقىتتى ميربولات جاقىپوۆ.

جالپى سول كەزدە مەملەكەتتىك اپپاراتتىڭ الماتىدان نۇر- سۇلتانعا كوشۋى «وتە كوپ ءارى قىزىقتى اڭگىمە» دەيدى ول.

«كەزىندە وسى ۇلكەن شارۋاعا ارالاستىم. جۇمىستارعا جاۋاپتى دا بولدىم. ەلدىڭ استاناسىن الماتىدان كوشىرۋ ءۇشىن ۇلكەن مەملەكەتتىك كوميسسيا قۇرىلدى. تاجىريبەلى باسشىلار بۇل اۋقىمدى شارۋانىڭ باسى- قاسىندا ءجۇردى. وسىنىڭ ارقاسىندا ءۇش جىلدىڭ ىشىندە ۇلكەن دايىندىق جۇمىستارى جۇرگىزىلىپ، كوشىپ كەلدىك. ءبىراق كوشكەنگە دەيىن ءبىرقاتار ماسەلەنى رەتتەۋ كەرەك بولدى. ول كەزدە اقمولاعا استانانى كوشىرۋ ىسىنە ءبىرتالاي جۇرت قارسى ەدى. 1994 -جىلى ەل ءالى داعدارىستان شىقپاعان كەزەڭ. ينفلياتسيا 2265 پايىزعا كەتتى. ايلىعىمىز ورتاشا ەسەپپەن 24 دوللار بولاتىن. حالقىمىزدىڭ 35 پايىزى ول كەزدە كەدەي ءومىر ءسۇردى. قيىن كەزەڭ. ءبىراق سوعان قاراماستان ەلباسى جىگەرلى شەشىم قابىلدادى»، - دەدى ول.

ميربولات جاقىپوۆ استانانى اقمولاعا كوشىرۋ باستاماسىنا جۇرتشىلىق قارسى بولماعانىمەن، مەملەكەتتىك اپپاراتتىڭ ىشىندە بۇل شەشىمگە كوڭىلى تولماعاندار بولعانىن ايتادى.

«پرەمەر- ءمينيستردىڭ ءوزى قارسى بولدى. ول تۇستا ۇكىمەت باسشىسى اكەجان قاجىگەلدين مىرزا ەدى. ءبىر مىسال كەلتىرە كەتەيىن: پرەزيدەنت ءبىر جارلىققا قول قويار الدىندا قولبەلگىلەر جينايمىز. سول ۆيزالاردىڭ ءبىرىن پرەزيدەنت ماعان «ۇكىمەت باسشىسىنا ءوزىڭ كىرىپ، ۆيزاسىن الىپ شىق» دەپ تاپسىردى. ول جارلىق استانانى كوشىرۋ تۋرالى شارۋالاردىڭ ءبىر بولىگى ەدى. ۇكىمەت باسشىسى «قويمايمىن» دەدى. «ءسىزدىڭ ۆيزاڭىز بولماي كەتپەيمىن» دەپ وتىرىپ الدىم. «قالاي سوندا؟ قويمايمىن» دەپ وتىرىپ الدى. «جوق، ءسىز قويعانشا وتىرامىن» دەدىم. جارتى ساعات ءجۇردى، تۇردى، وتىردى، تەرەزەگە بارىپ قارادى. «ءالى وتىرسىڭ با؟» دەدى. اقىرى ۇرىستى، بۇرقىلدادى، ءبىراق قويىپ بەردى. سونداي جاعدايلار بولعان»، - دەيدى ول.

ميربولات جاقىپوۆ ول تۇستا الاتاۋدان ارقاعا قونىس اۋداراتىن مەملەكەتتىك قىزمەتكەرلەردىڭ 25 پايىزىن ىرىكتەپ الۋ تۋرالى تاپسىرما بولعانىن ەسكە الادى. ەڭ تاجىريبەلى مامانداردى ىرىكتەۋ مىندەتى تۇردى.

«مەملەكەتتىك قىزمەتكەرلەردى ىرىكتەپ الدىق. ەسكەرتتىك. قالعاندارعا الماتىدا جۇمىس تاۋىپ بەرۋگە تىرىستىق. البەتتە مۇنىڭ ءبارى پسيحولوگيالىق تۇرعىدا وڭاي تيمەيتىن جۇمىس بولدى. جاڭا استاناعا بارعىسى كەلمەگەندەر دە بار ەدى. ءبىراق مامان رەتىندە ولار بىزگە كەرەك بولاتىن. ءتىپتى كەيبىر مەملەكەتتىك قىزمەتشىلەردىڭ جۇبايلارىنا دەيىن ۇگىتتەپ، بالالارىڭىزدى ويلاڭىزدار دەپ سويلەستىك. جاستار قالاسى دەدىك»، - دەدى ول.

الماتىدا ول تۇستا حالىق كوپ بولىپ كەتكەن ەكەن. 2000 -جىلدارعا جەتپەي حالىق سانى ميلليوننان اسىپ كەتكەن. كوشەدەگى كەپتەلىستەر سول كەزدىڭ وزىندە بار.

«الماتى ەلىمىزدىڭ ەڭ شەتىندە، ءبىر بۇرىشىندا عانا تۇر. باسقا وبلىستارعا الىس. گەوساياسي جاعىنان دا استانانى ارقاعا كوشىرۋ ءتيىمدى بولدى. استانانى قاي جەرگە اۋىستىرامىز دەگەن كەزدە نۇسقالار كوپ بولدى. مامانداردان 17 ۇسىنىس كەلدى. ەلباسى كوپ ويلاندى. 17 نۇسقا بارلىق پارامەتر بويىنشا تالداندى. اينالىپ كەلىپ شەشىم اقمولاعا توقتالدى»، - دەيدى ول.

ميربولات جاقىپوۆ قازىرگى نۇر- سۇلتاننىڭ اقمولا وڭىرىندە بوي كوتەرۋىنىڭ تاريحىن جاستار بىلمەۋى مۇمكىن ەكەنىن اتاپ ءوتتى.

«كەز كەلگەن ەلدە «قوسىمشا استانا» بولادى. ماسەلەن سوۆەت وداعىنىڭ قوسىمشا استاناسى - كۋيبىشيەۆ، قازىرگى سامار قالاسى. ال قازاقستاننىڭ قوسىمشا استاناسى - اقمولا بولدى. ونى كوبى بىلمەيدى. سەبەبى كەزىندە قۇپيا بولدى. قازىر ايتۋعا بولادى. جاڭادان 32 پارامەتر بويىنشا سارى ارقانىڭ تورىندە وسىلايشا استانامىز بوي كوتەردى»، - دەدى ول.

فوتو: gbstu.kz

اۆتور: ايان بەكەن ۇلى



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات