كورەيانىڭ بۇرىنعى پرەزيدەنتى 17 جىلعا باس بوستاندىعىنان ايىرىلدى

نۇر-سۇلتان. قازاقپارات - ەكسپرەسس ك سەۋلدىڭ جوعارعى سوتى كورەيا رەسپۋبليكاسىنىڭ بۇرىنعى پرەزيدەنتى لي ميەن باكتى (2008-2013 -جىلدارى) اسا ءىرى كولەمدە پارا العانى جانە بيۋدجەت قارجىسىن جىمقىرعانى ءۇشىن كىنالى دەپ تاپتى.

ەلدىڭ بۇرىنعى پرەزيدەنتىن 17 جىلعا باس بوستاندىعىنان ايىرۋ تۋرالى ۇكىم شىقتى، دەپ حابارلايدى Yonhap اگەنتتىگى.

ودان قالدى 78 جاستاعى لي ميەن باك $15,7 ميلليون كولەمىندە ايىپپۇل تولەۋى ءتيىس. پروكۋراتۋرا بۇرىنعى مەملەكەت باسشىسىن اۆتوموبيل بولشەكتەرىن شىعاراتىن DAS كومپانياسىنىڭ قارجىسىن قالتاسىنا باستى دەپ ايىپتاعان بولاتىن. ول اتالعان كومپانيانىڭ اكسيونەرى بولىپ تابىلادى. ودان قالدى پرەزيدەنت بولىپ تۇرعاندا Samsung Electronics-تەن پارا الدى دەپ كۇدىكتەلگەن.

لي ميەن باك بۇعان دەيىن دە جەمقورلىققا بايلانىستى تەمىر تورعا جابىلعان بولاتىن. 2018 -جىلدىڭ 22 - ناۋرىزىندا تۇتقىنعا الىنىپ، 5 - قازاندا سەۋلدىڭ جوعارعى سوتى ونى 15 جىلعا تۇرمەگە قاماۋ تۋرالى ۇكىم شىعارعانىمەن، 2019 -جىلدىڭ ناۋرىزىندا دەنساۋلىعىنا بايلانىستى اباقتىدان بوساتىلعان.

www.24.kz