ءومىر عاجايىپتارعا تولى: اينۇر تۇرسىنبايەۆا كومەكتەسكەن بەيتانىس ايەل 17 جىلدان كەيىن وعان جاقسىلىعىن قايتارعان
ول پويىزدا جولسەرىكتەر ءتۇسىرىپ تاستاماق بولعان كەلىنشەككە ءوزىنىڭ تانىمالدىعى كومەك بولعانىن ايتتى. ال ارادا 17 جىل وتكەننەن كەيىن اقىننىڭ ءوزى كۇتپەگەن جايتقا تاپ بولىپتى، دەپ حابارلايدى Stan.kz اقپارات اگەنتتىگى.
تۇرسىنبايەۆانىڭ سوزىنشە، شامامەن 20 جىل بۇرىن قاراعاندىعا ايتىسقا بارا جاتقاندا قىزىق جايت ورىن العان.
«ۇلىم ەمىزۋلى ول كەزدە، ۋ-شۋعا ۇيرەنگەن عوي ، قىڭق دەمەي جاتا بەرەتىن. ادەتتەگىدەي پلاتسكارتتا قالىڭ قازاقتىڭ ورتسىندا ءشاي ءىشىپ وتىرمىز. اراسىندا دومبىرامەن ءان سالىپ قويامىز. بۇكىل ۆاگون ريزا. بىرەۋ شۇجىق، بىرەۋ قايماق اكەلىپ، قىپ-قىزىل كەش باستالدى. ءبىر كەزدە شۋدان ءبىر كەلىنشەك 2 بالاسىمەن ءمىندى... ۇلكەنى 6-7 دە، كىشىسى 3-4 جاس شاماسى. ءتۇرى شارشاعان، سومكەسى اۋىر. جولسەرىك كەلىپ قۇجاتىن سۇراپ ەدى، سومكەسىن اقتارىپ كەتتى. تەرلەپ-تەپشىپ سونشا قوپارعاندا ەشتەڭە تاپپادى. ءبارىمىز سىلتىدەي تىنىپ قاراپ وتىرمىز. سونىمەن قۇجات تا، بيلەت تە جوق بولىپ شىقتى. جولسەرىكتىڭ امالى قۇرىپ تۇسىرۋگە ءماجبۇر بولدى. ال ەندى كەلىنشەك تۇسسەشى. «قۇداي ءۇشىن مەنى تۇسىرمەڭىز، كۇيەۋىم قايتىس بولىپ توركىنىمە كەتىپ بارام، جالىنامىن»، - دەپ ەڭىرەي باستادى. نەگە ەكەنى بىلمەيمىن، ول ۋاقىتتا پلاتسكارتتا تەك قازاقتار جۇرەتىن جانە وتە ۇيىمشىل بولاتىن. بۇكىل ۆاگون شۋلاپ جولسەرىككە جالىنا باستادىق. لەزدە اجەپتەۋىر اقشا دا جينالىپ قالدى. سونىمەن ايقاي-شۋ ۋشىعىپ، ۆاگوننىڭ باستىعى كەلدى. قاسىندا 2 ميليتسيا. كەلىنشەك كۇرسىنگەن كۇيى تۇسۋگە ىڭعايلاندى. ءالى ەسىمدە تيتتەي قىزى دىبىسىن شىعارماي ىشىنەن جىلاپ تۇردى. ەرنىن تىستەپ العان، كوزىندە جاس. كوڭىل-كۇي بىت-شىت بوپ كەتتى»، - دەپ جازدى اينۇر حانىم Instagram جەلىسىندە.
ايتىسكەردىڭ سوزىنشە، وسى كەزدە ۆاگوننىڭ باستىعى وعان تەسىلە قاراپ: «ءسىز وتكەندە مۇحاممەدجاندى جەڭىپ كەتكەن اينۇر ەمەسسىز بە؟» - دەپ سۇراق قويىپتى.
«ول كەزدە مۇحامەدجاننىڭ اتى اڭىزعا اينالىپ تۇرعان. جەڭۋ ءتىپتى مۇمكىن ەمەس! نەگىزى مەن دە قاتتى جەڭىپ كەتپەگەم، ءبىراق قازىلار ەمىزۋلى بالاسى بار دەپ جۇلدەنى ماعان بەرە سالعان. سونىمەن ءبىر ايتىستىڭ ارقاسىندا كەلىنشەك ۆاگوننان تۇسپەدى. وي كەرەمەت قۋاندىق! كەش ودان دا قاتتى قىزدى»، - دەيدى ول.
الايدا ارادا 17 جىل وتكەننەن كەيىن كۇتپەگەن جايت ورىن العان. بۋرابايعا دەمالۋعا بارعان تۇرسىنبايەۆا سول جەردەن پويىزدا كەزىككەن بەيتانىس ايەلدى كەزىكتىرىپ قالىپتى.
«بىلتىر بالا شاعاممەن دەمالۋعا بۋرابايداعى «RIXOS» قوناق ۇيىنە بارىپ 2 كۇن دەمالدىق. شامامەن 150 مىڭداي تولەۋىم كەرەك بولىپ كاسساعا بارسام، قىزدار «تولەنىپ قويدى» دەيدى. «قالاي سوندا؟ كىم تولەدى؟» - دەسەم، بەلگىسىز ادامنىڭ ەسىمىن ايتادى. «وسىنداي نومىردە ول كىسى، بارىپ سۇراڭىز»، - دەگەن سوڭ ىزدەپ بارسام، بوتەن ادامدار. ءجون سۇراسساق، باياعى كەلىنشەك! ال مەنىڭ ەسىمە تۇسسەشى. ءسىزدى كورسەم دەپ 17 جىل كۇتتىم عوي دەيدى»، - دەپ جازدى اينۇر تۇرسىنبايەۆا.
ايتۋىنشا، بۇگىندە سول ايەل ۇلكەن تۋريستىك فيرمانىڭ باسشىسى بولىپ وتىر ەكەن. ەكى قىزىن ۇزاتقان. تۇرمىسقا شىعىپ، تاعى ءبىر ۇلدى بولىپتى.
«بۇل ءومىر شىنىندا عاجايىپتارعا تولى عوي، تەك بايقاي بەرمەيمىز»، - دەيدى اقىن.