ەلوردادا جامبىل جابايەۆتىڭ 175 جىلدىعىنا كونسەرت قويىلدى
سالتاناتتى اشىلۋعا مادەنيەت جانە عىلىم قايراتكەرلەرى، الماتى جانە جامبىل وبلىستارىنىڭ دەلەگاتسيالارى كەلدى. كەلۋشىلەر جاڭا تەاتر فويەسىندە ۇيىمداستىرىلعان جامبىل جابايەۆ مۋزەيىنەن جەتكىزىلگەن ەكسپوزيتسيامەن تانىستى.
«ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى مەن «استانا وپەرا» مەملەكەتتىك وپەرا جانە بالەت تەاترىنىڭ سيمفونيالىق وركەسترىنىڭ ارتيستەرى كورەرمەندەرگە «جىر الىبى - جامبىل» اتتى تەاترلاندىرىلعان قويىلىمىن ۇسىندى. ۇلى اقىننىڭ باعا جەتپەس مۇراسىن، وزىندىك ەرەكشەلىگى مەن دارىنىن اشىپ كورسەتەتىن ادەبي- مۋزىكالىق كومپوزيتسيادا ونىڭ اتاقتى ايتىستارى مەن ايگىلى «كەڭ بايتاق قازاقستانىم»، «اقىندارعا ارناۋ»، «كۇلاشقا»، «لەنينگرادتىق ورەنىم!» جانە ت. ب. شىعارمالارى وقىلدى»، - دەپ حابارلادى مادەنيەت جانە سپورت مينيسترلىگىنىڭ باسپا ءسوز قىزمەتى.
مەرەكەلىك باعدارلامادا قۇرمانعازى اتىنداعى قازاق ۇلتتىق حالىق اسپاپتارى وركەسترىنىڭ، ن. تىلەندييەۆ اتىنداعى «وتىرار سازى» اكادەميالىق فولكلورلىق- ەتنوگرافيالىق وركەسترىنىڭ، «جاستار» تەاترىنىڭ، «استانا بالەت» تەاترىنىڭ ارتيستەرى، «قورقىت» ەتنو- ءانسامبلىنىڭ، «قۇلانساز» فولكلورلىق- ەتنوگرافيالىق ءانسامبلىنىڭ، ك. ازىربايەۆ اتىنداعى جامبىل وبلىستىق فيلارمونياسىنىڭ، «اكاك» كومۋزشىلار ءانسامبلىنىڭ (قىرعىزستان) جەكە ورىنداۋشىلارى ونەر كورسەتتى. اتاقتى اقىننىڭ مەرەيتويىنا قازاقستان حالىقتارى اسسامبلەياسى ەتنومادەني بىرلەستىكتەرىنىڭ ارتيستەرى، «Nomad» بالالار حورەوگرافيالىق ءانسامبلى، «ۆايناح» شەشەن- ينگۋش حالىق ءانسامبلى جانە ت. ب. ءوز شىعارمالارىن ارنادى.
ق ر مادەنيەت جانە سپورت ءمينيسترى اقتوتى رايىمقۇلوۆا سالتاناتتى اشىلۋدا بايانداما جاسادى.
«قادىرلى زيالى قاۋىم! جامبىل قازاق ادەبيەتى مەن مادەنيەتىندە ەرەكشە ورنى بار الاتاۋداي اسقاق تۇلعا. جىل ءدۇلدۇلى، ەپيك اقىن رەتىندە قازاقتىڭ سۋىرىپ سالما يمپروۆيزاتورلىق ونەرىن بيىك شىڭعا شىعاردى. ءتول ونەرىمىز ايتىستىڭ ەرەكشەلىگى ءسوز تاپقىرلىق ەمەس، باتىلدىق، وتكىرلىك، شىندىققا تولى كوركەم بەينەلى سوزدەر تابىلىپ، قالىڭ جۇرتقا قوعامدىق ماسەلەنى ايقىن جەتكىزە الۋىمەن قۇندى. جامبىل ايتىسى ءاردايىم تەرەڭدىگىمەن، كوركەمدىگىمەن، تاريحي نەگىزدەرىمەن استارلى مازمۇنىمەن جۇرتتى باۋراپ العان ەدى»، - دەدى مينيستر ءوز بايانداماسىندا.
ايتا كەتەيىك، قازاقستان رەسپۋبليكاسىنىڭ مەملەكەتتىك حاتشىسى، مەرەيتويدىڭ مەملەكەتتىك كوميسسياسىنىڭ ءتوراعاسى قىرىمبەك كوشەربايەۆ ەلورداداعى جامبىل ەسكەرتكىشىنە گۇل شوقتارىن قويعان ەدى.
بۇگىن ەلىمىزدەگى جانە شەت ەلدەردەگى قالالار مەن ەلدىمەكەندەردە جامبىل جابايەۆتىڭ ەسكەرتكىشتەرى مەن بيۋستتەرىنە گۇل شوقتارى قويىلدى، ءارقيلى مادەني شارالار وتكىزىلدى.
سالتاناتتى شاراعا الماتى وبلىسىنان جامبىلدىڭ تىكەلەي ۇرپاعى، نەمەرەسى سالتانات جامبىلوۆا كەلگەن ەدى.
اۆتور: ايجان سەرىكجان قىزى