جامبىل وبلىسىندا ابايدىڭ 175 جىلدىعىنا ارنالعان فەستيۆال ءوتتى
«بىلىمدىدەن شىققان ءسوز...» دەگەن ۇلى اقىننىڭ ولەڭ جولدارىمەن اتالعان اۋقىمدى شاراعا وبلىستىڭ 10 اۋدانىنان جانە تاراز قالاسىنىڭ مەكتەپتەرىنەن كەلگەن كوماندالار قاتىسىپ، ونەر، روبوتوتەحنيكا سالالارى بويىنشا باق سىنادى.
شارا شىمىلدىعىن «حاكىم اباي» تەاترلاندىرىلعان قويىلىمىمەن تارمۋ ستۋدەنتتەرى اشتى. سالتاناتتى اشىلۋدا ءسوز العان تارمۋ رەكتورى ماحمەتقالي سارىبەكوۆ جانە وبلىستىق ءبىلىم باسقارماسى باسشىسىنىڭ مىندەتىن اتقارۋشى ءجاميلا بەكباتىروۆا شارانىڭ ماڭىزدىلىعىن اتاپ ءوتىپ، قاتىسۋشىلارعا ساتتىلىك تىلەدى.
فەستيۆالدا «ابايدىڭ ىزىمەن» اتتى ءبىلىم سالاسىن دامىتۋداعى وزەكتى ماسەلەلەر بويىنشا دوڭگەلەك ۇستەلى، «ابايدىڭ قارا سوزدەرى - ونەگە كوزدەرى» تاقىرىبىنداعى اقىننىڭ ولەڭدەرى مەن قارا سوزدەرىن جاتقا وقۋ سايىسى جانە «وتكىردىڭ ءجۇزى، كەستەنىڭ ءبىزى، ورنەگىن سەندەي سالا الماس» - روبوتوتەحنيكا وليمپياداسى ءبىر مەزەتتە وتكىزىلدى.
دوڭگەلەك ۇستەل بارىسىندا مەكتەپ باسشىلارى مەن جەرگىلىكتى ۋنيۆەرسيتەت رەكتورلارى مەكتەپ پەن ج و و قىزمەتىندەگى ساباقتاستىق ماسەلەلەرىن تالقىلادى. ولاردىڭ ىشىندە كادر دايارلاۋ، ستۋدەنتتەردىڭ ءبىلىم ساپاسى، بىلىكتى مامانداردى مەكتەپكە تارتۋ تۋرالى كوكەيتەستى سۇراقتار كوتەرىلىپ، ءبىرقاتار شەشىلۋ جولدارى ۇسىنىلدى.
ۋنيۆەرسيتەت فوەسىندە وقۋشىلار قۇراستىرعان روبوتتار قازاقتىڭ ۇلتتىق ويىن تۇرلەرىنەن جارىسقا ءتۇستى. ولار اسىق اتۋ، ارقان تارتىس، قىز قۋۋ سياقتى ويىندارىن ويناپ، ەپتىلىكتەرىن كورسەتتى.
ال، اكت زالىندا وبلىس اۋداندارىنان كەلگەن مەكتەپ كوماندالارىنىڭ ورىنداۋىندا اباي شىعارمالارى بويىنشا درامالىق قويىلىمدار كورسەتىلدى. سايىس تالابىنا ساي وقۋشىلار، اتا-انالار مەن ۇستازدار ءبىر ساحنادا ونەر كورسەتتى.
فەستيۆال سوڭىندا جەڭىمپازدار انىقتالىپ، جۇلدەلى ورىندار تابىستالدى. وسىلايشا، قازاق داناسى اباي قۇنانبايەۆتىڭ 175جىلدىق مەرەيتويىنا ارنالعان وبلىستىق فەستيۆال ءبىلىم مەن ونەر ۇشتاسقان زياتكەرلىك الاڭعا اينالدى.