اباي-175: قىزىلوردادا رەسپۋبليكالىق اقىندار ايتىسى ءوتتى

None
None
قىزىلوردا. قازاقپارات - بۇگىن قىزىلوردا قالاسىندا «ۇلى دالانىڭ ۇلاعاتى» اتتى رەسپۋبليكالىق اقىندار ايتىسى ءوتتى. بۇل شارا قازاقتىڭ ۇلى اقىنى ابايدىڭ 175 جىلدىعىنا ارنالدى، دەپ حابارلايدى قازاقپارات ءتىلشىسى.

رەسپۋبليكالىق ايتىس قىزىلوردا قالاسى اكىمدىگىنىڭ قولداۋىمەن ءوتتى. مادەني شارا الدىندا قالالىق جاستار تەاترىنىڭ ارتىستەرى اباي جايىندا ارنايى قويىلىمدى ساحنالادى.

ايتىستا بەكارىس شويبەكوۆ، ديدار قاميەۆ، رۇستەم قايىرتاي ۇلى، نۇرمات مانسۇروۆ، ديدار ابباسوۆ، ءبىرجان بايتۋوۆ، مۇرادىم مەيىرلانوۆ، ەرجەڭىس ابديەۆ، ەرجان ءامىروۆ جانە بەكسۇلتان ورىنباساروۆ سىندى بەلگىلى ونەرپازدار ءسوز سايىسىنا ءتۇستى. ءدۇبىرلى دودانى ەكى مارتە «التىن دومبىرا» يەگەرى، «ايتىستىڭ اقتاڭگەرى» اتانعان قىزىلوردالىق مۇحتار نيازوۆ جۇرگىزدى.

ءسوز سايىسىنا جىراۋ، پروفەسسور، قازاقستاننىڭ ەڭبەك سىڭىرگەن قايراتكەرى الماس الماتوۆ، اقىن، مەملەكەتتىك «دارىن» جاستار سىيلىعىنىڭ يەگەرى داۋلەتكەرەي كاپ ۇلى جانە اقىن، قازاقستان جازۋشىلار وداعىنىڭ مۇشەسى دۇيسەنبەك اياش ۇلى قازىلىق جاسادى.

ايتىستا ءۇشىنشى ورىنعا تۇركىستان وبلىسىنان بەكارىس شويبەكوۆ يە بولسا، ارقانىڭ اقتاڭگەر اقىنى ديدار قاميەۆ ەكىنشى ورىن الدى. ال ءبىرىنشى ورىن قىزىلوردالىق ەرجەڭىس ابديەۆكە بۇيىردى. رەسپۋبليكالىق ايتىستىڭ باس جۇلدەسىنە سەمەيلىك رۇستەم قايىرتاي ۇلى لايىق دەپ تانىلدى.

بۇدان بۇرىن قىزىلوردادا ابايدىڭ 175 جىلدىعىنا وراي قانداي ءىس-شارا وتەتىنىن حابارلاعان ەدىك.

سوڭعى جاڭالىقتار