لاتۆيادا ابايدىڭ 175 جىلدىعى اياسىندا توعىزقۇمالاقتان جارىس ءوتتى

None
None
نۇر-سۇلتان. قازاقپارات - لاتۆيانىڭ ولاينە قالاسىندا اباي قۇنانباي ۇلىنىڭ 175 جىلدىعىن مەرەكەلەۋ اياسىندا ۇلى ويشىلىمىز ءسۇيىپ ويناعان ۇلتتىق ويىن - توعىزقۇمالاقتان حالىقارالىق تۋرنير ءوتتى، دەپ حابارلايدى قازاقپارات ءتىلشىسى.

دۇنيەجۇزىلىك توعىزقۇمالاق فەدەراتسياسى حابارلاعانداي، جارىستى 24-26- قاڭتار ارالىعىندا لاتۆيالىق «لوگيكا» زياتكەرلىك كلۋبى، قازاقستان رەسپۋبليكاسىنىڭ لاتۆياداعى ەلشىلىگى جانە دۇنيەجۇزىلىك توعىزقۇمالاق فەدەراتسياسى ۇيىمداستىردى.

جارىسقا قازاقستاننان جانە لاتۆيانىڭ ريگا، ولاينە، ەلگاۆا مەن وزولنيەكي قالالارىنان 24 سپورتشى قاتىستى.

ءۇش كۇنگە سوزىلعان دودادا ۇلدار اراسىندا جۇلدەلى ورىنداردىڭ بارلىعىن لاتۆيالىق ويىنشالار جەڭىپ الدى. ال قىزدار اراسىندا باس جۇلدەنى قازاقستاندىق اڭساعان ءقوجاناسىپ جەڭىپ السا، ەكىنشى جانە ءۇشىنشى ورىنداردى جەرگىلىكتى ويىنشالار قانجىعاسىنا بايلادى.

جەڭىمپازدار مەن جۇلدەگەرلەر قازاقستان رەسپۋبليكاسىنىڭ لاتۆياداعى ەلشىلىگى مەن دۇنيەجۇزىلىك توعىزقۇمالاق فەدەراتسياسىنىڭ سىيلىقتارىمەن ماراپاتتالدى.

ايتا كەتەيىك، العاش رەت توعىزقۇمالاق لاتۆيادا 2018-جىلى جەرگىلىكتى تۇرعىندارعا تانىستىرىلىپ، ەلشىلىك پەن فەدەراتسيانىڭ باستاماسىمەن جارىس وتكىزىلگەن بولاتىن.

ناتيجەسىندە 2019-جىلى تۇركيادا توعىزقۇمالاقتان وتكەن V الەم چەمپيوناتىنا لاتۆيانىڭ قۇراماسى العاش رەت قاتىسىپ، مول تاجىريبە جيناعان ەدى.

اۆتور: كۇنسۇلتان وتارباي


سوڭعى جاڭالىقتار