ابايدىڭ 175 جىلدىق مەرەيتويىنا قانشا قارجى ءبولىندى

نۇر-سۇلتان. قازاقپارات - بيىل ابايدىڭ 175 جىلدىق مەرەيتويى ق ر مادەنيەت جانە سپورت مينيسترلىگى جىل سايىن بولەتىن قاراجات اياسىندا تويلانادى.

بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز كونفەرەنسياسىندا ق ر مادەنيەت جانە سپورت ۆيتسە-ءمينيسترى نۇرعيسا داۋەشوۆ ايتتى، دەپ حابارلايدى قازاقپارات ءتىلشىسى.

«ابايدىڭ 175 جىلدىق مەرەيتويىنا ارنالعان شارالار ق ر مادەنيەت جانە سپورت مينيسترلىگىنىڭ 3 ميلليارد تەڭگە كولەمىندەگى جىلدىق جوسپارلانعان قارجىسى ەسەبىنەن وتەدى. مىسالى، اباي اتىنداعى وپەرا جانە بالەت تەاترى گاسترولدىك ساپارلارىنا بولىنگەن جىل سايىنعى قارجىنى اباي جىلىنا ارناپ، ماسكەۋ، تۇركيا، قىتايعا بارىپ ونەر كورسەتەدى»، - دەيدى نۇرعيسا داۋەشوۆ.

مەرەيتوي اياسىندا ابايدىڭ «جيدەباي- ءبورىلى» مەملەكەتتىك تاريحي-مادەني جانە ادەبي- مەموريالدىق مۋزەي-قورىعىن تۇرلەندىرۋ جانە اقىن ەسىمىمەن بايلانىستى تاريحي- مادەني مۇرا وبەكتىلەرىنە عىلىمي- رەستاۆراتسيالاۋ جۇمىستارىن جۇرگىزۋ قاراستىرىلعان.

«بۇل جۇمىستاردىڭ ءبارى «قازرەستاۆراتسيا» ۇيىمىنا بولىنگەن قاراجات ەسەبىنەن جاسالادى. مىسالى، ابايدىڭ سەمەي قالاسىنداعى مۋزەيىنىڭ ىشكى جوندەۋ جۇمىستارىنا 30 ميلليون تەڭگە ءبولىندى»، - دەيدى نۇرعيسا داۋەشوۆ.

ۇلى اباي مەرەيتويىنىڭ رەسمي سالتاناتتى اشىلۋ ءراسىمى 21-قاڭتار كۇنى نۇر-سۇلتان قالاسىندا وتەدى.