ابايدىڭ 175 جىلدىعىنا ارنالعان ەستافەتانى «تاتار-ينفورم» قابىل الدى

نۇر-سۇلتان. قازاقپارات - ۇلى ابايدىڭ 175 جىلدىعىنا ارنالعان ەستافەتانى «تاتار-ينفورم» ۇجىمى قابىل الدى. بۇل تۋرالى «تاتارينفورم» جاڭالىقتار اگەنتتىگى حابارلادى.

اگەنتتىك بۇگىن «تاتار-ينفورم» ابايدىڭ 175 جىلدىعىنا ارنالعان فلەشموبقا قوسىلدى» دەگەن تاقىرىپپەن اقپارات تاراتتى.

«قازاقستاندا وسى ەلدىڭ ۇلى اقىنى ابايدىڭ تۋعانىنا 175 جىل تولىپ وتىر. سونىڭ قۇرمەتىنە وراي ارنايى فلەشموب ۇيىمداستىرىلىپ ول تاتارستانعا دا جەتتى. تاتار ارىپتەستەرىنە ونى «قازاقپارات» حالىقارالىق اقپارات اگەنتتىگىنىڭ ۇجىمى تاپسىردى»، - دەلىنگەن اقپاراتتا.

سونداي-اق وندا تاتار تىلىندە ابايدىڭ ءومىربانى مەن شىعارماشىلىعى جونىندە ءبىرشاما ماعلۇماتتار بەرىلگەن. سونىمەن قاتار وندا فلەشموبتى مەملەكەت باسشىسى قاسىم-جومارت توقايەۆتىڭ 9 جاسار مەكتەپ وقۋشىسىنان قابىل العاندىعى ايتىلعان.

«تاتار-ينفورم» ۇجىمى ابايدىڭ ءبىر ولەڭىن وقىدى. فلەشموبقا اگەنتتىكتىڭ باس رەداكتورى ءراميس لاتىيپوۆ، تىلشىلەر ءدينا يوسىپوۆا مەن ءالينا ايداروۆا جانە لەنتا رەداكتورى گولفيا گوبايدۋللينا قاتىسقان. سونداي-اق ۆيدەوبلوگ اۆتورى يلگيز شاكۇروۆ تە بار.

«تاتار-ينفورم» وكىلدەرى #abai175 فلەشموبى ەستافەتاسىن ت ن ۆ - «ياڭا گاسىر» تەلەراديوكومپانياسىنا جانە «بولگار راديوسىنا» تاپسىراتىنىن ايتادى.

ايتا كەتەيىك، ق ر پرەزيدەنتى قاسىم-جومارت توقايەۆ 9 جاسار مەكتەپ وقۋشىسىنىڭ ەستافەتاسىن قابىل الىپ، ونى ءبىلىم جانە عىلىم ءمينيسترى اسحات ايماعامبەتوۆكە جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولداعان ەدى. كەيىن رەسەيدىڭ حالىق ءارتىسى يگور كرۋتوي ديماش جولداعان ەستافەتانى جالعاستىرىپ، اباي ولەڭدەرىن وقىعان بولاتىن.

اتالمىش ەستافەتانى «قازاقپارات» حالىقارالىق اقپارات اگەنتتىگىنىڭ ۇجىمى «Egemen Qazaqstan» گازەتىنەن قابىل الىپ، ابايدىڭ «كوزىمنىڭ قاراسى» ءانىن شىرقادى جانە ەستافەتانى «تاتار-ينفورم» اقپارات اگەنتتىگىنە، قىرعىز رەسپۋبليكاسىنىڭ «كابار» ۇلتتىق اقپارات اگەنتتىگىنە، «Tengrinews» جانە NUR. KZ پورتالدارىنا جولدادى.