ابايدىڭ 175 جىلدىعىن اتاپ وتۋگە لايىقتى دايىندىقپەن كەلۋ كەرەك - مۇرات اۋەزوۆ
«كوميسسيانىڭ جينالۋى دەر كەزىندە جاسالىپ وتىر، الدا ۇيىمداستىرۋ شارالارىنا ۋاقىت بار. وسى ورايدا جاقسى ۇسىنىستار جيناقتاپ، كەلەسى ابايدىڭ 175 جىلدىعىن ءتيىستى دەڭگەيدە وتكىزۋگە مۇمكىندىك بولادى. قازاق حالقى ءۇشىن ابايدىڭ ماڭىزى وتە جوعارى. ەلدىڭ تۇتاستىعى، بىرلىكتى نىعايتۋ، بولاشاققا ۇمىتپەن قاراۋ تۇرعىسىندا اعارتۋشى ءوزىنىڭ ەرەكشە ماعىنالىق تۇسىنىگىن بەرگەن. وسىنىڭ بارلىعىن ۇعىنىپ، ءتۇسىنىپ، 2020 -جىلداعى اۋقىمدى شارالارعا لايىقتى دايىندىقپەن كەلۋىمىز كەرەك. ويتكەنى ابايدىڭ ادامزات تاريحىندا ەرەكشە ورنى بار»، - دەدى عالىم 2020 -جىلى اباي قۇنانباي ۇلىنىڭ 175 جىلدىق مەرەيتويىن وتكىزۋ جونىندەگى مەملەكەتتىك كوميسسيانىڭ العاشقى وتىرىسىنىڭ الدىندا.
وسى ورايدا ول وسكەلەڭ ۇرپاق ۇلى اقىننىڭ كەمەڭگەرلىگىن ۇعىنىپ، ونىڭ شىعارمالارىنا قۇرمەتپەن قاراۋ كەرەكتىگىن اتاپ ءوتتى.
سونىمەن قاتار م. اۋەزوۆ ۇلى ابايدىڭ 175 جىلدىعىنا وراي اقىن ولەڭدەرىن وقۋ ەستافەتاسىنا قاتىستى پىكىر ءبىلدىردى.
«بۇل باستاما ماعان وتە ۇنادى. شىنىمەن دە اباي - حالىقتان ۇلت جاسايتىن تۇلعا، قيىن كەزەڭدە حالقىمىزدى بىرىكتىرۋدە ۇلكەن ءرول اتقاردى»، - دەدى مۇرات اۋەزوۆ.
ايتا كەتەيىك، بۇگىن ق ر پرەمەر- ءمينيسترىنىڭ ورىنباسارى گۇلشارا ءابدىقالىقوۆانىڭ توراعالىعىمەن 2020 -جىلى قازاق حالقىنىڭ ۇلى اقىنى، اعارتۋشىسى اباي قۇنانباي ۇلىنىڭ تۋعانىنا 175 جىلدىق مەرەيتويىن وتكىزۋ جونىندەگى مەملەكەتتىك كوميسسيانىڭ العاشقى وتىرىسى ءوتتى.
جيىن بارىسىندا حالىقارالىق، رەسپۋبليكالىق جانە وڭىرلىك دەڭگەيدەگى 500-گە جۋىق ءتۇرلى شارا قامتىلعان اباي قۇنانباي ۇلىنىڭ 175 جىلدىق مەرەيتويىنا دايىندالۋ مەن وتكىزۋ جونىندەگى جالپى رەسپۋبليكالىق جوسپاردىڭ جوباسى قارالدى.
ەسكە سالساق، ق ر پرەزيدەنتى قاسىم- جومارت توقايەۆ 9 جاسار مەكتەپ وقۋشىسىنىڭ ەستافەتاسىن قابىل الىپ، ونى ءبىلىم جانە عىلىم ءمينيسترى اسحات ايماعامبەتوۆكە، مادەنيەت جانە سپورت ءمينيسترى اقتوتى رايىمقۇلوۆاعا جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولداعان ەدى.
اۆتور: رۋسلان عابباسوۆ