قاراعاندى وبلىسىندا وزگەنىڭ مالىن 174 ميلليون تەڭگەگە ساتىپ جىبەرگەن باقتاشىلار ۇستالدى
ولار وزدەرىنە سەنىپ تاپسىرىلعان جىلقىلاردى ساتىپ جىبەرگەن. اتالمىش ءىس بويىنشا بارلىعى 50 دەن استام جابىرلەنۋشى تىڭدالىپ جاتىر، دەپ حابارلايدى قازاقپارات ءتىلشىسى.
باقتاشىلار 2007-جىلدان 2020-جىلعا دەيىن جىلقىلاردى باعۋمەن اينالىسقان. وسى ۋاقىت ىشىندە ولار 507 باس مالدى ساتىپ، ايىرباستاپ، «جوعالتىپ» جىبەرگەن. جىلقى يەلەرى مال سانىنىڭ جەتىسپەيتىنىن تەك 2020-جىلدىڭ قاراشا ايىندا بىلگەن.
«كۇدىكتىلەردىڭ ەكەۋى دە شەت اۋدانىنىڭ تۋمالارى. ولار جىلقىلاردى باعۋمەن اينالىسقان. جىلقى يەلەرىمەن جازباشا كەلىسىم بولماعان. اۋىزشا كەلىسىم بويىنشا باعۋمەن اينالىسقان. ادامدار ولارعا جەرلەس بولعاندىقتان سەنگەن. مال جايۋ كەزىندە الگىلەر 507 جىلقىنى ساتىپ جانە ايىرباستاپ ۇلگەرگەن. سونىمەن قاتار، كەيبىر جىلقىلاردى تىرىدەي، ال كەيبىرىن سويىپ ساتقان. ول جايلى مال يەلەرى بىلمەگەن. بىرنەشە ادام ءبىر جىلقىعا يە بولعان جاعدايلار دا بولدى، سەبەبى ونى باقتاشىلار بىرنەشە رەت الماستىرىپ وتىرعان. سونداي-اق ناقتى قانشا رەت تولدەپ، قانشا قۇلىن بارىن جاسىرىپ كەلگەن. مىسالى، بيە وسى جىلدار ىشىندە 13 رەت قۇلىنداسا، باقتاشىلار بار بولعانى 5 قۇلىن جايلى عانا ايتقان»، - دەيدى قاراعاندى وبلىسى پ د تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى قانات سايلاۋ ۇلى.
شوپانداردىڭ الاياقتىق ارەكەتتەرى تەك 2020-جىلدىڭ قاراشا ايىندا اشىلدى. سوعىم سويۋ ماۋسىمى الدىندا بىرنەشە جابىرلەنۋشى مالدارىن اكەلۋدى سۇراعان. ال مالدى ايداپ الىپ كەلە الماعان كەزدە، جىلقى يەلەرى بۇل جەردە شيكىلىك بارىنا كۇدىكتەنىپ، ماسەلەنى انىقتاي باستاعان.
شىندىقتى بىلگەن بەتتە جابىرلەنۋشىلەر بىرىنەن سوڭ ءبىرى جەرگىلىكتى پوليتسيا بولىمىنە ءوتىنىش جازا باستاعان.
«ەگەر جىلقى يەلەرى اي سايىن جانۋارلاردىڭ بار-جوعىن تەكسەرىپ، ولارعا تاڭبا سالىپ وتىرسا، الاياقتىقتى ەرتەرەك انىقتاۋعا بولار ەدى. ادامدار بەلگىلى ءبىر جىلقىسىن الىپ كەلۋدى سۇراعاندا، ولار ءۇيىر الىستا جايىلىپ جۇرگەنىن ايتىپ سىلتاۋراتقان. كەيبىرەۋلەر ءتىپتى جىلقىلارىن تانىماعان. ولارعا باقتاشىلار باسقا جىلقىنى كورسەتە سالعان»، - دەيدى قانات سايلاۋ ۇلى.
قازىرگى ۋاقىتتا ق ر ق ك 190-بابىنىڭ 3-بولىگى «ءىرى كولەمدەگى الاياقتىق» بويىنشا قىلمىستىق ءىس قوزعالدى. ەگەر ولاردىڭ كىناسى تولىعىمەن دالەلدەنسە، 3 جىلدان 7 جىلعا دەيىن باس بوستاندىعىنان ايىرىلۋى مۇمكىن.
«كۇدىكتىلەر كىنانى ءىشىنارا مويىندادى. وسى ايدىڭ سوڭىنا دەيىن ءىس بويىنشا تەرگەۋ جۇرگىزۋ اياقتالادى جانە ول سوتقا بەرىلەدى»، - دەپ قوستى اعا تەرگەۋشى.