ۇلكەن قالالاردان بولەك 171 ەلدى مەكەنگە گاز تارتىلادى

None
None
استانا. قازاقپارات - كوگىلدىر وتىنمەن قامتاماسىز ەتەتىن ماگيسترال قۇرىلىسى « قىزىلوردا- جەزقازعان- قاراعاندى- تەمىرتاۋ- استانا» باعىتى بويىنشا جۇرگىزىلەدى، دەپ حابارلايدى قازاقپارات ءتىلشىسى.

 «ەلباسى تاپسىرماسىنا سايكەس « قىزىلوردا- جەزقازعان- قاراعاندى- تەمىرتاۋ- استانا» باعىتى بويىنشا الدىمىزداعى جىلى «سارى ارقا» ماگيسترالدىق گاز قۇبىرىن ىسكە اسىرۋ جوسپارى تۇر. اتالعان گاز قۇبىرى ەلىمىزدىڭ ورتالىق جانە سولتۇستىك وڭىرلەرىن، ونىڭ ىشىندە باس قالامىز استانانى دا كوگىلدىر وتىنمەن قامتاماسىز ەتۋگە مۇمكىندىك بەرەدى. بۇگىندە جوبانىڭ سمەتالىق قۇجاتتاماسى ازىرلەنىپ، ساراپتامالىق وڭ قورىتىندى الىندى. 2019 - جىلى قۇرىلىسى باستالاتىن گاز قۇبىرىنىڭ بۇگىندە قارجىلاندىرۋ كەستەسى مەن شارتتارى ازىرلەنىپ ۇكىمەتتىڭ ءتيىستى شەشىمدەرىمەن بەكىتىلدى»، - دەدى ق ر ەنەرگەتيكا ۆيتسە- ءمينيسترى ماعزۇم مىرزاعاليەۆ  و ك ق- دە وتكەن باسپا ءسوز ءماسليحاتىندا.

ەنەرگەتيكا ۆيتسە- ءمينيسترى جوعارىدا اتالعان قالالاردان بولەك گاز قۇبىرى وتەتىن تراسسانىڭ بويىنداعى 171 ەلدى مەكەن، ونىڭ ىشىندە استانا قالاسى ماڭى مەن قاراعاندى وبلىسىنىڭ 119 ەلدى مەكەنى جانە اقمولا وبلىسىنىڭ 51 ەلدى مەكەنى تابيعي گازبەن كەزەڭ- كەزەڭىمەن قامتاماسىز ەتىلەتىنىن ايتتى. سونداي- اق، جوبا قۇرىلىسى 1690 ادامدى جۇمىسپەن قامتيدى دەپ كۇتىلۋدە.

سونىمەن قاتار، ۆيتسە- مينيستر ەلىمىزدەگى گاز ءوندىرۋدىڭ كولەمى مەن ونى تۇتىنۋ تۋرالى مالىمەتتەرمەن دە ءبولىستى.

«وسى جىلدىڭ قورىتىندىسى بويىنشا گاز ءوندىرۋ كولەمى 53,4 ميلليارد تەكشە مەتردى قۇرايدى، بۇل وتكەن جىلمەن سالىستىرعاندا 500 ميلليون تەكشە مەترگە ارتىق. تاۋارلىق گاز ءوندىرۋ كولەمى 31,9 ميلليارد تەكشە مەتر نەمەسە 2017 -جىلمەن سالىستىرعاندا 300 ميلليون تەكشە مەترگە وسكەن. ال گازدى تۇتىنۋ كولەمى 14,9 ميلليارد تەكشە مەتر، بۇل الدىڭعى جىلمەن سالىستىرعاندا 1,1 ميلليارد تەكشە مەترگە جوعارى ەكەنى بايقالادى»، - دەدى ول.

ونىڭ ايتۋىنشا، ەلىمىزدە گاز تۇتىنۋ دەڭگەيىنىڭ قارقىندى ءوسۋى بايقالادى، بۇگىنگى تاڭدا حالىقتى گازداندىرۋ دەڭگەيى 47,38 پايىزدى قۇرايدى نەمەسە 8,5 ميلليون تۇرعىن گازبەن قامتىلعان. اعىمداعى جىلى مەملەكەت تاراپىنان گازداندىرۋعا 18,4 ميلليارد تەڭگە، ال ۇلتتىق وپەراتور تاراپىنان 1,5 ميلليارد تەڭگە قاراستىرىلدى. ۇستىمىزدەگى جىلدىڭ قورىتىندىسى بويىنشا كوگىلدىر وتىنعا قول جەتكىزگەن تۇرعىندار سانى تاعى 129 مىڭعا ارتادى دەپ كۇتىلۋدە، قازىرگى تاڭدا ەلىمىزدىڭ 17 ءوڭىرىنىڭ 11- ءى تابيعي گازبەن قامتىلعان.

 «ەنەرگيا رەسۋرستارىنىڭ وڭىرلىك ترانزيتىندەگى قازاقستاننىڭ ءرولى ارتىپ كەلەدى. اعىمداعى جىلى قازاقستان- قىتاي گاز قۇبىرىنىڭ ەكى ستانسياسى پايدالانۋعا بەرىلدى. ناتيجەسىندە اتالعان ترانسۇلتتىق گاز قۇبىرىنىڭ ءوندىرۋ قابىلەتى 5 ميلليارد تەكشە مەترگە ارتىپ، جىلىنا 55 ميلليارد تەكشە مەتر گاز وندىرۋگە قول جەتكىزىلدى. ودان بولەك، 2017 -جىلدىڭ قازان ايىنان باستاپ قازاقستاندىق گاز قىتاي نارىعىنا ەكسپورتتالا باستادى. بۇگىندە وسى باعىتتا شامامەن 6,1 ميلليارد تەكشە مەتر گاز ەكسپورتتالدى. كەلەسى جىلدان باستاپ وتاندىق گازدى ەكسپورتتاۋ كولەمىن جىلىنا 10 ميلليارد تەكشە مەترگە دەيىن ۇلعايتۋ تۋرالى كەلىسىمگە قول قويىلدى»، - دەدى م. مىرزاعاليەۆ.

اۆتور: داۋلەت ىزتىلەۋ

سوڭعى جاڭالىقتار