ەرتىس ءوڭىرىنىڭ جازعى لاگەرلەرىنە ارىستان 170 بالا كەلدى
وبلىس اكىمى بولات باقاۋوۆتىڭ ۇسىنىسى بويىنشا ارىس قالاسىنىڭ اسكەري بولىمىندە سناريادتاردىڭ جارىلۋى سالدارىنان زارداپ شەككەن بالالار جەرگىلىكتى جازعى لاگەرلەرگە شاقىرىلعان.
ءبىرىنشى توپپەن 130 بالا پاۆلودارعا ۇشاقپەن 27 - ماۋسىمدا، ەكىنشى توپ 11 - شىلدەدە پويىزبەن كەلدى. وبلىس اكىمىنىڭ ورىنباسارى اسحات ورالوۆ پەن ءبىلىم باسقارماسىنىڭ باسشىسى ءدىنيسلام بولاتحان ۇلى دەمالۋعا كەلگەن بالالاردى پەرروندا قارسى الدى.
«وبلىس اكىمى ۋادە بەرگەندەي، ءبىز 300 بالانى قابىلدادىق. 100 بالا اقسۋ قالاسىندا «قازحروم» ت ۇ ك ا ق «فەرروسپلاۆشيك» ورتالىعىنا، قالعان 70 بالا شارباقتى اۋدانىنىڭ «چايكا» ساۋىقتىرۋ لاگەرىندە دەمالادى»، - دەدى اسحات ورالوۆ.
ايماق باسشىسىنىڭ شاقىرۋىمەن بۇعان دەيىن ارىس قالاسىنان كەلگەن 130 بالا قازىرگى تاڭدا باياناۋىل اۋدانىندا دەمالۋدا. «ولار تەك دەمالىپ قانا قويماي، ءبىزدىڭ ءوڭىردىڭ تاريحىمەن جانە تابيعاتىمەن تانىسادى. ەكىنشى توپ ءۇشىن باياناۋىلعا ەكسكۋرسيا ۇيىمداستىرادى»، - دەپ اتاپ ءوتتى وبلىس اكىمىنىڭ ورىنباسارى.
ءدىنيسلام بولاتحان ۇلىنىڭ ايتۋىنشا، لاگەردەگى جازعى ماۋسىم 15 كۇنگە سوزىلادى، ءبىراق بالالاردىڭ قالاۋى بويىنشا ءبىر ايعا دەيىن ۇزارتىلۋى مۇمكىن. ءبىلىم باسقارماسىنىڭ دەرەكتەرى بويىنشا، بالالاردىڭ تۇرۋى بيۋدجەتتىك جانە بيۋدجەتتەن تىس قاراجات ەسەبىنەن قامتاماسىز ەتىلدى.
ارىستان بالالارمەن بىرگە توعىز ادام كەلدى: مۇعالىمدەر، الەۋمەتتانۋشىلار جانە تاربيەشىلەر. ساۋىقتىرۋ لاگەرلەرىندە دەمالۋدان باسقا، بالالارعا پاۆلوداردىڭ مۇراجايلارى مەن مادەني- دەمالىس ورىندارىن كورسەتۋ جوسپارلانىپ وتىر.
«ءبىزدى كوكشەتاۋعا، وسكەمەنگە شاقىردى، ءبىراق ءبىز پاۆلوداردى تاڭدادىق»، - دەيدى ارىس قالاسىنىڭ تاربيەشىسى سالتانات ورىنباساروۆا. «ۇيلەردى قالىپقا كەلتىرگەنگە دەيىن ەكى اپتا بويى دەمالۋعا كەلگەنىمە وتە قۋانىشتىمىن. بۇل ۋاقىتتى كوڭىلدى جانە پايدالى وتكىزەتىنىمىزگە سەنىمدىمىن. مەنىڭ ءۇش بالام بار، ولاردىڭ ەكەۋى مەنىمەن كەلدى. بۇل وبلىسقا العاش رەت كەلىپ وتىرمىز. بىزدە وتە ىستىق، ال مۇندا سالقىن بولسا دا، اۋا رايى وتە جاقسى».