ەلىمىزدە 1700-دەن اسا كومپانيا وتاندىق تاۋارلاردى ەكسپورتتايدى
بۇدان بىلاي، جۇك تاسۋعا كەتەتىن شىعىننىڭ تەڭ جارتىسى مەملەكەت ەسەبىنەن وتەلەتىن بولادى. بۇل قادام قازاقستاندىق ەكسپورت كولەمىن ۇلعايتۋعا مۇمكىندىك بەرەدى ءارى ءونىم ءوندىرۋ سالاسىنا سونى سەرپىن قوسادى. وسىدان 15 جىل بۇرىن قۇرىلعان كومپانيا وتاندىق نارىققا ساپالى ءارى ەكولوگيالىق تازا ءونىم شىعارادى. كاسىپورىن گاز بلوكتارىن ازىرلەۋمەن اينالىسادى. ونىمدەرىن نەمىس تەحنولوگياسى بويىنشا دايىندايدى. استانا جانە اقتوبە قالالارىندا ەكى ءىرى زاۋىتى بار. وندا ۇزىن- ىرعاسى 450 ادام جۇمىس ىستەيدى. جىل سايىن 400 مىڭ تەكشە مەتر قۇرىلىس ماتەريالدارىن ازىرلەيدى. كوبىن شەت مەملەكەتتەرگە تاسىمالدايدى.
قانات وسپانوۆ، كومپانيانىڭ كوممەرتسيالىق ديرەكتورى:
- ءبىزدىڭ كومپانيا 7 جىلدان بەرى ونىمدەرىن وزبەكستان، رەسەي مەن قىرعىز ەلدەرىنە تاسىمالدايدى. وتاندىق قۇرىلىس ماتەريالدارى تاجىكستان مەن ازەربايجاندا دا سۇرانىسقا يە. سوندىقتان الداعى ۋاقىتتا ەكسپورت كولەمىن ۇلعايتۋدى جوسپارلاپ وتىرمىز.
ەلىمىزدە جىل باسىنان بەرى وڭدەۋ سەكتورى 5 پروتسەرتكە ءوسىم كورسەتكەن. ەكسپورتتىڭ ورتاشا كولەمى دە وسىنداي كورسەتكىشكە يە. قازاقستان وزگە ەلدەرگە قۇرىلىس ماتەريالدارىنان بولەك، اككۋمۋلياتورلار، ەلەكتر قۇرىلعىلارى مەن ازىق- تۇلىك ونىمدەرىن تاسىمالدايدى. ءقازىر ەلىمىزدە وتاندىق تاۋارلاردى ەكسپورتتاپ جاتقان 1700-دەن اسا ءىرى كومپانيا بار. كەلەر جىلى ولاردىڭ بارلىعىنا جەڭىلدىك جاسالماق.
نۇرالى بوكەيحانوۆ، قازاقستاننىڭ سىرتقى ساۋدا پالاتاسى ءتوراعاسىنىڭ ورىنباسارى:
- ەكىنشى ەنگىزىلەتىن جاڭا كومەكتىڭ ءتۇرى - ەكسپورتتاۋشىلاردىڭ ترانسپورتتىق شىعىندارىن قامتۋ. وسى جىلعا دەيىن تەك قانا ەكسپورتتاۋشىلاردىڭ ماركەتينگ جاعىنان شىعىندارى قامتىلسا، كەلەسى جىلدان باستاپ بۇل كومەككە 20 ميلليارد تەڭگە بولىنەدى. جۇك تاسىمالىنا كەتەتىن شىعىندى وتەۋ ءۇشىن مەملەكەت قازىناسىنان 20 ميلليارد تەڭگە قاراستىرىلعان. قوسىمشا 5 ميلليارد تەڭگە ءار ەلدەن ساۋدا وكىلدىكتەرىن اشۋعا جۇمسالادى. ودان بولەك، قازاقستاندىق كومپانيا وكىلدەرى الەمدىك كورمەلەرگە قاتىسپاق. وتاندىق 50 كومپانيانىڭ ءتول ونىمدەرى جاھان جۇرتىنىڭ نازارىنا ۇسىنىلادى.
www.24.kz