رەسەيلىكتەردى ۋاقتىلى تىركەتپەگەن 16 مىڭ قازاقستاندىق جاۋاپقا تارتىلدى
بۇل تۋرالى ق ر ءى ءى م كوشى- قون كوميتەتى ءتوراعاسىنىڭ مىندەتىن اتقارۋشى اسلان اتالىقوۆ ايتتى، دەپ حابارلايدى قازاقپارات ءتىلشىسى.
«ىشكى ىستەر ورگاندارى شەتەلدىك ازاماتتاردىڭ ەلىمىزدە ءجۇرىپ-تۇرۋىن باقىلاۋدى تۇراقتى نەگىزدە جۇرگىزەدى. شەتەلدىكتەردىڭ قازاقستاندا ءجۇرىپ-تۇرۋ ەرەجەلەرىن ساقتاۋىن باقىلاۋ ۋاقىتشا تۇرۋعا بەرىلەتىن رۇقسات نەگىزىندە جۇزەگە اسىرىلادى. ونى الۋ پروتسەسى رەتتەلگەن. زاڭدا كوزدەلگەن جاعدايدا شەتەلدىككە ەڭبەك شارتىنىڭ مەرزىمىنە، وقۋ، ەمدەلۋ جانە باسقا دا تولىق نەگىزدەر كەزىندە قازاقستاندا بولۋ قۇقىعىن بەرەتىن ۋاقىتشا تۇرۋعا رۇقسات العاندا تۇرعىلىقتى مەكەنجايى، تۇرعىن ءۇي يەسى جانە وندا تۇراتىن شەتەلدىكتەر تۋرالى تولىق اقپاراتىمىز بولادى. بۇل كوشى-قون باقىلاۋدى قامتاماسىز ەتۋگە مۇمكىندىك بەرەدى»، - دەدى اسلان اتالىقوۆ ءى ءى م باسپا ءسوز قىزمەتىندەگى بريفينگ بارىسىندا.
ونىڭ دەرەگىنشە، وسى جىلدىڭ باسىنان بەرى ۋاقىتىلى ەسەپكە قويماي، رەسەيلىك ازاماتتاردى قابىلداعان(پاتەرىنە تۇرعىزعان ت.ب.) 16240 ادام اكىمشىلىك جاۋاپقا تارتىلدى.
«كوشى-قون زاڭناماسىن بۇزعانى ءۇشىن بارلىعى 45707 شەتەل ازاماتى اكىمشىلىك جاۋاپكەرشىلىككە تارتىلدى. ونىڭ ىشىندە ر ف ازاماتتارى - 2959. ەلدەن 4190 ادام شىعارىلدى. ونىڭ ىشىندە 203 رەسەيلىك بار»، - دەدى ول.