قىتايدا سۋ تاسقىنىنان قازا تاپقاندار سانى 16 عا جەتتى

بەيجىڭ. قازاقپارات - قىتايدىڭ شينحاي پروۆينتسياسىندا بولعان سۋ تاسقىنىنان قازا تاپقاندار سانى 16 ادامعا جەتتى، تاعى 36 ادام ءىز-ءتۇزسىز جوعالىپ كەتتى، دەپ حابارلايدى قازاقپارات ءتىلشىسى قىتايدىڭ ورتالىق تەلەارناسىنا سىلتەمە جاساپ.

سوڭعى مالىمەتكە سايكەس، 18- تامىز كۇنى جەرگىلىكتى ۋاقىت بويىنشا ساعات 12:00 دە ىزدەستىرۋ-قۇتقارۋ جۇمىستارى ناتيجەسىندە سۋ تاسقىنىنان 16 ادامنىڭ قازا بولعانى، 36 اداممەن بايلانىس ۇزىلگەنى انىقتالدى.

اپات ايماعىندا 6 مىڭنان استام جەرگىلىكتى تۇرعىن قالدى.

قىتاي اقپارات قۇرالدارىنىڭ حابارلاۋىنشا، 17- تامىز كۇنى كەشكە سينين قالاسىنىڭ داتۋن ۋەزىندە (قىتايدىڭ سولتۇستىك-باتىسىنداعى شينحاي پروۆينتسياسى) نوسەر جاۋىن ءوتىپ، ودان ورناعان سۋ تاسقىنى مەن كوشكىن وزەن ارنالارىنىڭ وزگەرۋىنە اكەلدى.

قۇتقارۋ جۇمىستارىنا 1600 دەن استام ادام مەن 160 تەحنيكا جۇمىلدىرىلدى.

بۇعان دەيىن شينحاي پروۆينتسياسىندا (سولتۇستىك-باتىس قىتاي) سۋ تاسقىنى سالدارىنان كەمىندە 27 ادام ءىز-ءتۇزسىز جوعالىپ، ءتورت ادامنىڭ قازا تاپقانى تۋرالى حابارلانعان بولاتىن.