16-ءساۋىر. قازاقپارات كۇنتىزبەسى
اتاۋلى كۇندەر بۇكىل الەمدىك داۋىس كۇنى
بۇل كۇن 1999 -جىلى ا ق ش جانە ەۋروپا وتولارينگولوگتارى مەن لوگوپەدتەرىنىڭ (American Academy for Otolaryngology - Head and Neck Surgery) مۇرىندىق بولۋىمەن جانە مەديتسينا دوكتورى، پورتۋگاليالىق ماريو اندرەانىڭ باستاماسىمەن بەكىتىلگەن.
ەستە قالار وقيعالار
1918 -جىلى ورىنبوردا قازاق تىلىندە «قازاق مۇڭى» گازەتىنىڭ العاشقى سانى شىعارىلدى. گازەت ءالىبي جانگەلديننىڭ باستاماسىمەن قۇرىلعان. «قازاق مۇڭى» بولشيەۆيكتەر ساياساتىن ناسيحاتتاپ، الاش پارتياسىنا قارسى باعىت ۇستاندى. وبلىستىڭ ەڭبەكشى بۇقاراسىنا وكىمەتتىڭ العاشقى دەكرەتتەرىنىڭ ءمان- مازمۇنىن ءتۇسىندىردى. كوپ ۇزاماي، ازامات سوعىسىنىڭ باستالۋىنا بايلانىستى، دۋتوۆ اقگۆاردياشىلارىنىڭ بيلىگى جۇرە باستاعان كەزدە، گازەت شىعۋىن توقتاتتى.
1990 -جىلى قازاق ك س ر مينيسترلەر كەڭەسىنىڭ №148 قاۋلىسىمەن قاراعاندى وبلىستىق فيلارمونياسىنا قالي بايجانوۆتىڭ ەسىمى بەرىلدى.
2000 -جىلى حالىقارالىق «اباي» كلۋبى «امانات» جۋرنالىن شىعاردى. «امانات» - قازاقستانداعى الەم حالىقتارىنىڭ ادەبيەتىن جاريالايتىن جۋرنال، تارالىمى 7,5 مىڭ بولدى. جۋرنالدىڭ 1 مىڭ ەكزەمپليارى امەريكاعا، 1500 شىعىس ەۋروپا مەن رەسەيگە جەتكىزىلىپ تۇردى.
2004 -جىلى «قازاقپارات» ح ا ا قازاقستاندا العاش رەت قازاق تىلىندەگى جاڭالىقتاردى لاتىن الىپبيىندە تاراتا باستادى. سول تۇستاعى اگەنتتىكتىڭ قازاق رەداكسياسىنىڭ باس رەداكتورى جارىلقاپ بەيسەنباي ۇلىنىڭ باستاماسىمەن قازاق تىلىندەگى جاڭالىقتار سايت بەتىندە لاتىن ارىپىمەن تارالدى. لاتىن الىپبيىنە اكادەميك ءابدۋالي قايدار جاساعان نۇسقا نەگىزگە الىندى. اگەنتتىكتىڭ كومپيۋتەرلىك تەحنولوگيا ماماندارى - پاۆەل فومەنكو مەن ەگور حولياۆكو ءابدۋالي قايدار جوباسىنىڭ ءبىر- ەكى ارىپىنە عانا وزگەرىس ەنگىزىپ، لاتىن نۇسقاسىن جاساپ، ىسكە قوستى.
2017 -جىلدىڭ 12-ساۋىرىندە تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى لاتىن الىپبيىنە قاتىستى ماسەلەنى قايتادان كۇن تارتىبىنە شىعاردى. وسى ماقالادا ەلباسى ۇكىمەتكە قازاق ءتىلىن بىرتىندەپ لاتىن الىپبيىنە كوشىرۋ جۇمىستارىن باستاۋدى تاپسىرعان ەدى.
2017 -جىلدىڭ 26-قازانىندا قازاقستان رەسپۋبليكاسى پرەزيدەنتىنىڭ «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» جارلىعى شىقتى. ال 2018 -جىلدىڭ 19-اقپانىندا جارلىققا ەنگىزىلگەن وزگەرىستەر نەگىزىندە جاڭا ءالىپبي نۇسقاسى بەكىتىلدى. وسىلايشا، «قازاقپاراتتىڭ» 2004 -جىلدىڭ 16 -ساۋىرىنەن باستالعان لاتىن ارپىندەگى سايت اشۋ باستاماسى 2018 -جىلدىڭ قاراشا ايىنا دەيىن جالعاسىپ تۇردى. 2018 -جىلى قاراشانىڭ 20 سىنان باستاپ «قازاقپارات» اگەنتتىگى قازىرگى بەكىتىلگەن لاتىن ءالىپبيى نۇسقاسى بويىنشا جاڭالىقتار تاراتۋعا كوشتى.
2005 -جىلى ەلباسى نۇرسۇلتان نازاربايەۆ قازاقستان رەسپۋبليكاسى سىرتقى ىستەر مينيسترلىگىنىڭ جاڭا عيماراتىنىڭ اشىلۋ سالتاناتىنا قاتىستى.
2007 -جىلى قازاقستان مەن كۋبا اراسىنداعى ديپلوماتيالىق قارىم- قاتىناستاردىڭ بەكىتىلگەنىنە 15 جىل تولۋىنا بايلانىستى كۋبانىڭ قازاقستانداعى ەلشىسى تەرەسيتا كاپوتە كاماچو قازاقستاننىڭ جازۋشىسى روللان سەيسەنبايەۆتى لاتىن- امەريكان ادەبيەتىن ناسيحاتتاۋداعى قوسقان ۇلەسى ءۇشىن «دوستىق» وردەنىمەن ماراپاتتادى.
2009 -جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ قىتاي حالىق رەسپۋبليكاسىنا مەملەكەتتىك ساپارى اياسىندا ق ر كولىك جانە كوممۋنيكاتسيا مينيسترلىگى مەن ق ح ر كوممۋنيكاتسيا مينيسترلىگى اراسىندا «باتىس ەۋروپا - باتىس قىتاي» اۆتوكولىك ءدالىزىن قۇرۋ تۋرالى ءوزارا تۇسىنىستىك تۋرالى مەموراندۋمعا قول قويىلدى. بۇگىنگى تاڭدا ۇزىندىعى 8445 شاقىرىم بولاتىن «باتىس ەۋروپا - باتىس قىتاي» ترانسكونتينەنتالدىق ءدالىزى قىتاي، قازاقستان جانە رەسەي اۋماعى ارقىلى وتەدى.
2013 -جىلى «قازاقستان ينجينيرينگ» ۇلتتىق كومپانياسى» ا ق بىرىككەن ۇلتتار ۇيىمىنىڭ جاھاندىق شارتىنا قوسىلدى.
2015 -جىلى مەملەكەت باسشىسى نۇرسۇلتان نازاربايەۆ قازاقستانعا مەملەكەتتىك ساپارمەن كەلگەن تۇرىك رەسپۋبليكاسىنىڭ پرەزيدەنتى رەجەپ تايىپ ەردوعانمەن كەزدەستى. نۇرسۇلتان نازاربايەۆ پەن رەجەپ تايىپ ەردوعان ساۋدا- ەكونوميكالىق، ينۆەستيتسيالىق، ونەركاسىپتىك، ترانزيتتىك- كولىك جانە مادەني- گۋمانيتارلىق سالادا بايلانىستاردى تەرەڭدەتۋ جولدارىن قارادى.
2018 -جىلى بەيجىڭدە China Outbound Travel Market-2018 كورمەسىندە قازاقستان ستەندىنىڭ رەسمي اشىلۋ سالتاناتى بولدى. كورمەدە قازاقستاننىڭ ۇلتتىق ستەندى ەكوتۋريزم، ەتنوتۋريزم، City break, MICE تۋريزم، شوپينگ، ترانزيتتىك تۋرلار سياقتى قازاقستاننىڭ تۋريزم سالاسىنداعى قىرۋار مۇمكىندىكتەرى تۋرالى ايتىلدى. Kazakh Tourism كومپانياسى ۇيىمداستىرعان ۇلتتىق ستەندتىڭ وزەگى ايگىلى ءانشى ديماش قۇدايبەرگەننىڭ سۋرەتى تۇرعان فوتوزونا بولدى. وندا ءانشىنىڭ شىنجىن قالاسىندا وتەتىن كونسەرتىنە بيلەت ويناتىلدى.
2019 -جىلى كۇش ەكستريمىنەن قازاقستان رەكوردشىسى سەرگەي سىرۋلنيكوۆ سانكت- پەتەربۋرگ قالاسىندا وتكەن Vortex Sport Battle 7 تۋرنيرىندە رەسەيلىك مىقتىنى جەڭىپ، جەڭىمپاز اتاندى.
2020 -جىلى تالانتتى قازاقستاندىق جازۋشى بايانعالي ءالىمجانوۆتىڭ «A Hundred Years on the Steppe « («ءجۇز جىلدىق تولعاۋ» ) شىعارماسى ۇلى بريتانيادا تانىلىپ، Hertfordshire Press اتاقتى اعىلشىن باسپا ۇيىندە جاريالاندى. بۇل كىتاپتىڭ جارىق كورۋى - اعىلشىن قوعامىن قازاقستان مادەنيەتى تاريحىمەن تانىستىرۋداعى ماڭىزدى قادام. Hertfordshire Press - 50-دەن اسا قازاقستاندىق كىتاپتى باسىپ شىعارعان بىردەن- ءبىر باسپا.