قازاقپارات كۇنتىزبەسى: 16- قىركۇيەك
اتاۋلى كۇندەر
حالىقارالىق وزون قاباتىن قورعاۋكۇنى
1987-جىلى وزون قاباتىن بۇزاتىن زاتتار تۋرالى مونرەال حاتتاماسىنا قول قويىلدى. سول كۇننىڭ قۇرمەتىنە ب ۇ ۇ باس اسسامبلەياسىنىڭ شەشىمىمەن 1995-جىلدان باستاپ اتاپ وتىلەدى.
ەستە قالار وقيعالار
1944-جىلى اقتوبە وبلىستىق فيلارمونياسى قۇرىلدى. وعان 1997-جىلى بەلگىلى قازاق سازگەرى عازيزا جۇبانوۆانىڭ ەسىمى بەرىلدى.
1976 -جىلى ءا. قاستەيەۆ اتىنداعى مەملەكەتتىك ونەر مۇراجايى كەلۋشىلەرگە ەسىگىن اشتى.
ەكسپوناتتاردىڭ باسىم بولىگىن قازاقستاننىڭ بەينەلەۋ جانە قولدانبا ونەر تۋىندىلارى قۇرايدى. باتىس ەۋروپا كوللەكتسياسىندا XVI- XIX عاسىرلاردا ءومىر ءسۇرىپ، شىعارماشىلىقپەن اينالىسقان يتاليا، فرانسيا، گوللانديا، فلاندريا، گەرمانيا، انگليا جانە اۋستريا سۋرەتشىلەرىنىڭ ءتۇپنۇسقا شىعارمالارى جينالعان.
1992 -جىلى قازاقستان مەن بەلارۋس رەسپۋبليكاسى اراسىندا ديپلوماتيالىق قارىم-قاتىناس ورناتىلدى.
2000 -جىلى اتىراۋدا مىسىر بيلەۋشىسى بولعان بەيبارىس سۇلتاننىڭ 775 جىلدىق مەرەيتويىنا ارنالعان حالىقارالىق عىلىمي-تاجىريبەلىك كونفەرەنسيا ءوتتى. كونفەرەنسياعا اراب ەلدەرىنىڭ عالىمدارى قاتىستى. سونىمەن قاتار قازاق تىلىنە اۋدارىلعان «ءاز-زاحير بەيبارىس ءومىربايانى» اتتى كىتاپتىڭ تۇساۋكەسەرى بولىپ، اتىراۋ وبلىستىق قازاق دراما تەاترى جازۋشى ر. وتاربايەۆتىڭ «بەيبارىس» اتتى پەساسىن ساحنالادى.
شەجىرە بويىنشا بەيبارىستىڭ اتامەكەنى - كاسپي تەڭىزىنىڭ ماڭى، ءبىر دەرەكتەردە - ەدىل- جايىق بويى. كىشى جۇزدەگى باي ۇلىنىڭ بەرىش رۋىنان دەگەن مالىمەت بار.
2005-جىلى تۇركيانىڭ يزمير قالاسىندا قازاقستان رەسپۋبليكاسىنىڭ قۇرمەتتى كونسۋلدىعىنىڭ سالتاناتتى اشىلۋ ءراسىمى ءوتتى. سالتاناتتى شاراعا يزمير پروۆينتسياسىنىڭ گۋبەرناتورى وعىز قاعان كوكسال، وسى قالاداعى قۇرمەتتى كونسۋلدىقتاردىڭ باسشىلارى، ىسكەر توپ وكىلدەرى، قازاق دياسپوراسى مەن بۇقارالىق اقپارات قۇرالدارى وكىلدەرى قاتىستى.
2006 -جىلى الماتى وبلىسى قاراساي اۋدانىندا ناۋرىزباي باتىرعا ەسكەرتكىش اشىلدى. ەسكەرتكىش اۆتورى - نۇرلان دالباي.
2007 -جىلى قازاقستان ۆەنادا اتوم ەنەرگەتيكاسىنداعى جاھاندىق سەرىكتەستىككە قوسىلدى. ونىڭ بارىسىندا قازاقستان قاعيدالار حاتتاماسىنا قول قويدى جانە وسىناۋ ۇدەرىسكە تولىققاندى مۇشە اتاندى. جينالعانداردىڭ الدىندا سويلەگەن ماگاتە باس ديرەكتورى موحاممەد ءال-بارادەي، اتوم ەنەرگەتيكاسى دامۋىنىڭ بولجانۋىنا بايلانىستى وسىناۋ باستامانىڭ وزەكتىلىگىن اتاپ ءوتتى.
2010 -جىلى تۇركىتىلدەس مەملەكەتتەر باسشىلارىنىڭ X سامميتىندە ەكونوميكالىق جانە ساۋدا بايلانىستارىن كەڭەيتۋگە باعىتتالعان تۇركى ىسكەرلىك كەڭەسىن قۇرۋ تۋرالى شەشىم قابىلداندى.
تۇركى مادەنيەتىن ساقتاۋدى قامتاماسىز ەتۋ ماقساتىندا باكۋدە ارنايى قور قۇرىلىپ، تۇرىكسوي استانانى 2012-جىلعى تۇركى الەمىنىڭ استاناسى دەپ جاريالادى.
2014 -جىلى الماتىدا X ەۋرازيا كينوفەستيۆالى اشىلدى. فەستيۆال قازاق رەجيسسەرى شاكەن ايمانوۆتىڭ 100 جىلدىعىنا ارنالدى. باعدارلاما اياسىندا «جامبىل»، «ءبىزدىڭ سۇيىكتى دارىگەر»، «تاقيالى پەرىشتە»، «اتاماننىڭ اقىرى» فيلمدەرى تەگىن كورسەتىلدى.
2017 -جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ وزبەكستاننىڭ «ەل- يۋرت حۋرماتي» («ەل- جۇرت قۇرمەتى») وردەنىمەن ماراپاتتالدى.
2017 -جىلى بالقاش قالاسى 80 جىلدىق مەرەيتويىن اتاپ ءوتتى. بۇل قاراعاندى وبلىسى ءۇشىن عانا ەمەس، بۇكىل قازاقستان ءۇشىن ماڭىزدى وقيعا. بۇگىندە بالقاش - قاراعاندى وبلىسىنداعى ينفراقۇرىلىمى دامىعان، تۇرعىن ءۇي-كوممۋنالدىق شارۋاشىلىق كاسىپورىندار جەلىسى، مادەنيەت، دەنساۋلىق، ءبىلىم بەرۋ نىساندارى بار زاماناۋي ونەركاسىپ ورتالىعى. مۇندا شاعىن جىنە ورتا بيزنەس نىعايىپ، دامىپ كەلەدى. تۋريستىك كلاستەر دامۋىنىڭ جاڭا قارقىنىن الۋدا. كوشەلەرى جاقسارىپ، جاڭا ۇيلەر سالىنۋدا، الەۋمەتتىك سالانىڭ جاڭا نىساندارى بوي كوتەرىپ وتىر.
2019 -جىلى الماتىداعى «قازاق فيلم» كينوستۋدياسىنىڭ اۋماعىندا اتى اڭىزعا اينالعان رەجيسسەر سەرگەي ەيزەنشتەيننىڭ تاسپاسى، قازاق كينەماتوگرافىنىڭ كلاسسيگى ش. ايمانوۆتىڭ جەكە زاتتارى مەن كوللەكتسيالارى، ءتۇپنۇسقا سەناريلەر، كينوفيلم كەيىپكەرلەرىنىڭ كوستيۋمدەرى جانە تاعى باسقا باعالى ارحيۆتىك ەكسپوناتتار ساقتالعان ش. ايمانوۆ اتىنداعى مۇراجاي اشىلدى. مۇراجايدىڭ ەرەكشە ماقتانىشى - شاكەن كەنجەتاي ۇلى ايمانوۆتىڭ قالپىنا كەلتىرىلگەن كابينەتى.
2019-جىلى ماڭعىستاۋ وبلىسىنىڭ تۇشىبەك كەنتىنىڭ ماڭىندا تابىلعان ۇزىندىعى توعىز مەتر يحتيوزاۆردىڭ قاڭقاسى پرەپاراتسيا جاساۋ اياقتالعان سوڭ اقتاۋ قالاسىنىڭ ولكەتانۋ مۇراجايىنا تابىستالدى.
2019 -جىلدىڭ 25- مامىرىندا اۋەسقوي پالەونتولوگ ۆلاديمير يارتسيەۆ كەزەكتى ساپارى كەزىندە بۇدان 110-100 ميلليون جىل بۇرىن تىرشىلىك ەتكەن يحتيوزاۆردىڭ قاڭقاسىنا ۇقساس سۇيەكتەردى انىقتاعان.