بەيرۋتتاعى جارىلىس: بەيرۋت تەڭىز پورتىنىڭ 16 قىزمەتكەرى قاماۋعا الىندى
بۇل تۋرالى قازاقپارات ءتىلشىسى تاياۋ شىعىستاعى اراب بۇقارالىق اقپارات قۇرالدارىنا سىلتەمە جاساپ حابارلايدى. «قازىرگى ۋاقىتتا بەيرۋت پورتىنىڭ ديرەكتورلار كەڭەسىنىڭ، كەدەن اكىمشىلىگىنىڭ جانە جوندەۋ جۇمىستارىنا جاۋاپتى لاۋازىمدى تۇلعالارىن، سونداي- اق وسى جۇمىستاردى № 12 قويمادا ورىندايتىن ادامداردى قوسا العاندا، 18 دەن استام ادامنان جاۋاپ الىندى. وسى قويمادا بۇرىن جارىلعان 2750 توننا اممياك سەليتراسى كابەلدەرمەن جانە باسقا دا تەز تۇتاناتىن ماتەريالدارمەن بىرگە ساقتالعان. ونىڭ 16-سى تەرگەۋ اياقتالعانعا دەيىن قاماۋدا بولادى»، - دەپ ءتۇسىندىردى ف. اكيكي.
سونىمەن قاتار، ليۆان ورتالىق بانكىنىڭ (Banque du Liban) تەرگەۋ جونىندەگى ارنايى كوميسسياسى بەيرۋت تەڭىز پورتىنىڭ جەتى قىزمەتكەرىنە تىكەلەي نەمەسە جاناما تۇردە تيەسىلى بانكتىك قۇپيانى جويۋ (اشۋ) جانە شوتتارعا تىيىم سالۋ تۋرالى بۇيرىق شىعاردى. ولاردىڭ اراسىندا قازىرگى كەدەن قىزمەتىنىڭ باس ديرەكتورى حاسان كۋرايتام جانە پورت كەدەنىنىڭ ديرەكتورى بادري داحەر بار. اتالعان بۇيرىقتار ءتيىستى سوت وردەرىنە سايكەس شىعارىلدى. مۇنى رەسمي تۇلعالار مەن Banque du Liban دەرەككوزدەرى راستايدى.
بانكتىڭ «اقشانى جىلىستاتۋعا قارسى كۇرەس ارنايى تەرگەۋ كوميسسياسى» بولىمشەسىنەن الىنعان قۇجاتتا جەتى قىزمەتكەردىڭ ەسىمدەرىنىڭ ءتىزىمى كورسەتىلگەن. اتاپ ايتقاندا حاسان كۋرايتام، شافيك مارگي، بادري داحەر، نايل ءال- حادج، ميشەل ناحۋل، دجوردج داحەر جانە نيگمات ءال- براكس. ولاردىڭ كوپشىلىگىنىڭ لاۋازىمدارى نەمەسە جۇمىس ورىندارى كورسەتىلمەگەن. اتالعان تۇلعالاردىڭ شوتتارى ليۆاندا جۇمىس ىستەيتىن بارلىق قارجى مەكەمەلەرىندە، فيليالدارىندا توقتاتىلادى. 2020 -جىلعى 6 - تامىزداعى بۇيرىعىندا «بۇل شوتتاردىڭ قۇپيالىلىعىن قۇزىرەتتى سوت ورگاندارى الىپ تاستاۋى كەرەك» دەلىنگەن. بانك Banque du Liban تەرگەۋى جونىندەگى ارنايى كوميسسياعا شىعارىلعان شەشىمنىڭ كوشىرمەلەرىن كاسساتسيالىق سوتتىڭ پروكۋرورىنا، جوعارعى بانكتىك كوميسسيانىڭ باسشىسىنا، ليۆاندا جۇمىس ىستەيتىن بارلىق بانكتەر مەن قارجى مەكەمەلەرىنە جانە باسقا دا مۇددەلى تاراپتارعا ۇسىنۋدى تاپسىردى.
اۆتور: ريزابەك جۇماجانوۆ