ارىستاعى جارىلىس: 16 اسكەري كۇدىكتى سوتتا جاۋاپ بەرۋدە

None
None
شىمكەنت. قازاقپارات - شىمكەنتتە ارىستا بولعان جارىلىسقا قاتىستى سوت وتىرىسى وتۋدە، دەپ حابارلايدى قازاقپارات ءتىلشىسى.

شىمكەنت گارنيزونى اسكەري سوتىندا 16-ايىپتالۋشىنىڭ قىلمىستىق ءىسى قارالۋدا. اتالعان سوتتىڭ مالىمەتىنشە، قىلمىستىق ءىس 448 تومعا جيناقتالعان. اشىق تۇردە وتەتىن سوت وتىرىسىندا ايىپتالۋشى رەتىندە تانىلعانداردىڭ بارلىعى جارىلىسقا دەيىن اسكەري قىزمەتتە بولعاندار. ولاردى 25 ادۆوكات قورعايتىن بولادى.

ايىپتالۋشىلاردىڭ اراسىندا ەلىمىزدىڭ قورعانىس مينيسترلىگىنىڭ بۇرىنعى ءبىرقاتار لاۋازىم يەلەرى مەن ارىستاعى 44859№ اسكەري ءبولىمىنىڭ باسشىلىق قۇرامى جانە قاتارداعى قىزمەتشىلەرى بار.

ال جارىلىستان جابىرلەنۋشىلەردىڭ سانى 1500 گە جۋىقتايدى. ءبىر جىلعا جۋىق ۋاقىتقا سوزىلعان تەرگەۋ بارىسىنىڭ قورتىندىسىمەن اتالعان اسكەري ءبولىمنىڭ كومانديرى مەن ونىڭ ورىنباسارى - ارتيللەريالىق وق-دارىلەردى ساقتاۋ بازاسىنىڭ باستىعى قاماۋعا الىنىپ، ولارعا قىلمىستىق كودەكستىڭ 462-بابىنىڭ 3-بولىگى (جارىلعىش زاتتارمەن جۇمىس ىستەۋ ەرەجەلەرىن بۇزۋ) جانە 453-بابىنىڭ 2-بولىگى (اۋىر زارداپتارعا اكەپ سوققان سالعىرتتىق) باپتارىمەن ايىپتالۋدا.

وزگە ايىپتالۋشىلاردىڭ ءىسى اسكەري قىزمەتىنە سالعىرتتىق تانىتۋ، وق-ءدارى پايدالانۋ مەن ونى قولدانۋداعى تالاپتاردى ساقتاماۋ، قارۋدى، سونداي-اق اينالاسىنداعىلارعا قاۋىپ توندىرەتىن زاتتار مەن زاتتاردى ۇستاۋ ەرەجەلەرىن بۇزۋ، سەنىپ تاپسىرىلعان مۇلىكتى تالان-تاراجعا سالۋ سياقتى بىرنەشە باپتار بويىنشا قارالۋدا.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 2019-جىلى 24- ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى.

سوڭعى جاڭالىقتار