توتەنشە جاعداي رەجيمىن بۇزعان 16 مىڭنان استام قازاقستاندىق ۇستالدى – مينيستر

نۇر- سۇلتان. قازاقپارات - 16 - ناۋرىزدان باستاپ توتەنشە جاعداي رەجيمىن بۇزعانى ءۇشىن 16 مىڭنان استام ادام ۇستالدى. بۇل تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ ءمالىم ەتتى، دەپ حابارلايدى قازاقپارات ءتىلشىسى.

«16- ناۋرىزدان باستاپ توتەنشە جاعداي رەجيمىن بۇزعانى ءۇشىن 16 مىڭنان استام ادام ۇستالدى. ونىڭ ىشىندە 12 مىڭنان استامى اكىمشىلىك جاۋاپكەرشىلىككە تارتىلدى. 4 مىڭنان استام ماتەريال سوت قاراۋىندا»، - دەدى مينيستر «حابار 24» تەلەارناسىنىڭ تىكەلەي ەفيرىنەن.

سونىمەن قاتار، ول ىشكى ىستەر مينيسترلىگى ىندەت جۇقتىرعان ادامدارمەن بايلانىستا بولعانداردى انىقتاۋ جۇمىستارىن جۇرگىزىپ جاتقانىن اتاپ ءوتتى. «دەنساۋلىق ساقتاۋ ورگاندارىنىڭ سۇراۋى بويىنشا پوليتسيا 6,5 مىڭنان استام ادامنىڭ تۇرعىلىقتى جەرلەرىن انىقتادى. قازىرگى كەزدە ىزدەۋ شارالارى تەك 7 ادامعا قاتىستى جۇرگىزىلۋدە»، - دەدى داۋرەن ابايەۆ.

اۆتور: رۋسلان عابباسوۆ