الداعى جىلدارى ەلىمىزدە 16 ءىرى اۋرۋحانا سالىنادى

نۇر- سۇلتان. قازاقپارات – ق ر دەنساۋلىق ساقتاۋ ءمينيسترى ەلجان ءبىرتانوۆ مەملەكەتتىك- جەكەشەلىك ارىپتەستىك باعىتىندا سالىناتىن نىساندار تۋرالى ايتتى، دەپ حابارلايدى قازاقپارات ءتىلشىسى.

«جالپى، 2026 -جىلعا دەيىن دەنساۋلىق ساقتاۋ سالاسىندا 1,5 تريلليون تەڭگە ينۆەستيتسيا تارتۋ جوسپارلانىپ وتىر. ونىڭ 60 پايىزى مەملەكەتتىك- جەكەشەلىك ارىپتەستىك اياسىندا. 19 مىڭ جۇمىس ورنىن قامتاماسىز ەتە وتىرىپ، 838,5 ميلليارد تەڭگە سوماسىندا 16 ءىرى اۋرۋحانا سالۋدى جوسپارلاپ وتىرمىز»، - دەدى مينيستر ۇكىمەت وتىرىسىندا.

ونىڭ سوزىنە قاراعاندا، بۇگىندە ينۆەستيتسيالاردىڭ جالپى كولەمى 439 ميلليارد تەڭگەگە تەڭ 7 مەملەكەتتىك- جەكەشەلىك ارىپتەستىك جوباسى ىسكە اسىرىلۋدا.

«بۇل تۇرعىدا پەتروپاۆل، تۇركىستان، نۇر- سۇلتان قالالارىنداعى ۇلكەن اۋرۋحانالاردى قامتىپ وتىر. سونىمەن قاتار، الماتى مەن قاراعاندىدا ۋنيۆەرسيتەتتىك كلينيكالار قۇرىلىسى بويىنشا ءتيىستى شارالار اتقارىلۋدا. الەۋەتتى ينۆەستورلارمەن جەكە قارجىلىق باستامالاردىڭ دايىندىق جۇمىستارى ىسكە اسىرىلۋدا»، - دەدى ءبىرتانوۆ.

ونىڭ اتاپ وتۋىنشە، بۇدان بولەك مينيسترلىك قۇنى 400 ميلليارد تەڭگەگە جۋىق ينۆەستيتسيالاردىڭ قوسىمشا 9 جوباسىن پىسىقتاۋعا كىرىستى.

اۆتور: رۋسلان عابباسوۆ