استانادا 16-جەلتوقساندا وتەتىن بوكس كەشىندە قازاقستاندىقتار كىممەن جۇدىرىقتاسادى

الماتى. قازاقپارات - قازاقستاننىڭ تانىمال بوكسشىلارى تاۋەلسىزدىك مەرەكەسى كۇنىندە استاناداعى بوكس كەشىندە وزدەرىنىڭ كەزەكتى جەكپە-جەكتەرىن وتكىزەدى، دەپ حابارلايدى «قازاقپارات» ءتىلشىسى.

كەشتىڭ العاشقى جەكپە-جەگىندە بۇعان دەيىن ەشكىمنەن جەڭىلىپ كورمەگەن ابىلايحان قۇسايىنوۆ (توعىز كەزدەسۋدىڭ توعىزىندا جەڭىسكە جەتكەن) پەن ماكسيم موروز (ۋكراينا) كەزدەسەدى. موروز ءۇشىن بۇل كاسىبي بوكستاعى العاشقى ايقاس. 64 كەلى سالماق دارەجەسىندەگى جەكپە-جەك 6 راۋندتان (ءارقايسىسى 3 مينۋتتان) تۇرادى.

ەكىنشى بولىپ رينگكە اسحات ءۋاليحانوۆ پەن ۋكراينالىق بوكسشى ياروسلاۆ يۋروۆ شىعىپ، 66 كەلى سالماقتاعى جەڭىمپازدى انىقتايدى. قازاقستاندىق بوكسشى ءۇشىن يۋروۆقا قارسى جەكپە-جەك - پروفيدەگى التىنشى جۇدىرىقتاسۋ. بۇعان دەيىن ول 5 رەت ايقاسىپ، بىرەۋىندە عانا جەڭىلىپ قالعان. 25 جاستاعى ياروسلاۆ يۋروۆ كاسىپقوي بوكس الاڭىنا ەكى رەت شىعىپ، ەكى كەزدەسۋىن دە جەڭىسپەن اياقتاعان. بۇل جەكپە-جەك تە 3 مينۋتتان تۇراتىن 6 راۋندقا ەسەپتەلگەن.

62 كەلى سالماق دارەجەسىندەگى جۇدىرىقتاسۋ دا قىزىقتى بولماق. وندا وتانداسىمىز ايدار شارىبايەۆتىڭ (7 جەكپە-جەك، 6 جەڭىس، 1 جەڭىلىس) قارسىلاسى - 37 جاستاعى تاجىريبەلى بوكسشى ارتەم ايۆازيدي. ۋكراينالىق بوكسشى بۇعان دەيىن 25 كەزدەسۋ وتكىزىپ، ونىڭ 11 ءىن جەڭىسپەن اياقتاعان.

سۋپەراۋىر سالماقتا «داۋلەت» سپورتكەشەنىنىڭ رينگىنە ەلىمىزدىڭ نامىسىن قورعاۋعا رۋسلان مىرساتايەۆ (2008-جىلعى وليمپيادا ويىندارىنىڭ قاتىسۋشىسى، بۇكىل الەمدىك بوكس سەرياسىندا «استانا ارلانس» قۇرامىنداعى جەڭىمپاز) شىعادى. سەگىز راۋندتان تۇراتىن جەكپە-جەكتە مىرساتايەۆ (پروفي-رينگتەگى 5 كەزدەسۋىن جەڭىسپەن اياقتاعان) كاسىبي بوكستا ەكىنشى كەزدەسۋىن وتكىزەتىن پاۆلو كرولەنكومەن (ۋكراينا) جۇدىرىقتاسادى.

ال 52 كەلى سالماق دارەجەسىندە WBC Asia چەمپيونى اتاعى ءۇشىن كەشتىڭ باستى كەزدەسۋى «قازاق جاۋىنگەرى» اتانىپ كەتكەن ەلشات نىعمەتوللا ۇلى (15 جەكپە-جەك، 15 جەڭىس) مەن جەڭىلىپ كورمەگەن ازەربايجاندىق بوكسشى فاريد اليەۆ (5 جەكپە-جەك، 5 جەڭىس) اراسىندا وتەدى.

ەسكە سالا كەتەيىك، كاسىبي بوكس كەشى Qazaq Promoutions پروموۋتەرلىك كومپانياسىنىڭ باستاماسىمەن 16- جەلتوقسان كۇنى «داۋلەت» سپورتكەشەنىندە وتەدى.

ايتا كەتەيىك، «QAZAQ promotions» پروموۋتەرلىك كومپانياسىنىڭ نەگىزىن قالاۋشى، تانىمال كاسىپقوي بوكسشىسى قانات يسلام. «QAZAQ promotions» امەريكانىڭ ءىرى پروموۋتەرلىك كومپانيالارىمەن بىرلەسىپ، ۇلكەن بوكس كەشتەرىن ۇيىمداستىرۋعا باعىتتالعان.