ەلوردادا بيىكتىگى 16 مەتردى قۇرايتىن مۇز توبەشىك پايدا بولادى
قازىرگى تاڭدا ق ر تۇڭعىش پرەزيدەنتى كۇنىنە، ەلوردانى استاناعا كوشىرۋ كۇنىنە جانە تاۋەلسىزدىك كۇنىنە دايىندىق جۇمىستارى بەلسەندى تۇردە جۇرگىزىلىپ جاتىر. ءار مەرەكەگە وراي وتشاشۋلار، كورمەلەر مەن كونسەرتتەر سياقتى مادەني بۇقارالىق ءىس- شارالاردى اشىق جانە جابىق الاڭداردا وتكىزۋ جوسپارلانعان.
«ءبىز اۋداننىڭ اۋماعىندا تۇراتىن حالىقتىڭ الەۋمەتتىك وسال توپتارىنداعى وتباسىلارعا ەرەكشە كوڭىل بولەمىز. ولاردى قالادا وتەتىن بارلىق ءىس- شارالارعا شاقىرامىز. ءبىلىم بەرۋ مەكەمەلەرىنىڭ بارلىعىندا اشىق ەسىك كۇندەرى وتكىزىلەدى. مەرەكەلەرگە دايىندىق جۇمىستارى اۋداندا قىزۋ ءجۇرىپ جاتىر»، - دەدى جەلتوقسان ايىندا اتالىپ وتىلەتىن مەيرامداردى مەرەكەلەۋ تاقىرىبىنا ارنالعان بريفينگتە الماتى اۋدانى اكىمىنىڭ ورىنباسارى تىنىسبەك اراشاپوۆ.
تاۋەلسىزدىك كۇنى قارساڭىندا، ياعني 15 - جەلتوقساندا وتەتىن «العاشقى قار» شاراسىندا شاڭعى ماۋسىمى رەسمي تۇردە اشىلادى دەپ كۇتىلۋدە. بۇل كۇنى ەلوردانىڭ بوتانيكالىق باعىنداعى، ترياتلون ساياباعىنداعى، پرەزيدەنتتىك جانە جەرۇيىق ساياباقتارىنداعى شاڭعى تراسسالارى ءوز جۇمىسىن باستاماق.
«قىسقى دەمالىسقا ارنالعان بارلىق اشىق الاڭدار تەگىن بولادى. ولاردىڭ اراسىندا مۇز ايدىندارى، مۇز توبەشىكتەر مەن شاڭعى تراسسالارى بار. «شابىت» شىعارماشىلىق سارايىنىڭ الدىنداعى تاۋەلسىزدىك الاڭىندا قالاداعى ەڭ ۇلكەن مۇز ايدىنى ۇيىمداستىرىلادى. پرەزيدەنتتىك ساياباقتا بيىكتىگى 16 مەتردى قۇرايتىن مۇز توبەشىك قويىلادى. ول قالاداعى ەڭ بيىك توبەشىك بولسا كەرەك. بۇل - قالا مەن ونىڭ تۇرعىندارىنا ارنالعان سىيلىق. ءبىز بارلىق جۇمىستاردى 16 - جەلتوقسانعا دەيىن اياقتاۋدى جوسپارلاپ وتىرمىز. مەكتەپ اۋماقتارىندا قىسقى سپورت تۇرلەرىمەن اينالىسۋعا مۇمكىندىك بەرەتىن بارلىق جاعداي جاسالادى»، - دەدى تىنىسبەك اراشاپوۆ.