قازاقستاندىق بالۋاندار ازيا چەمپيوناتىندا 16 مەدال جەڭىپ الدى

استانا. قازاقپارات - ءۇندىستاننىڭ نيۋ-دەلي قالاسىندا وتكەن كۇرەس تۇرلەرىنەن جاستار اراسىنداعى ازيا چەمپيوناتى مارەسىنە جەتتى، دەپ حابارلايدى قازاقپارات ءتىلشىسى.

ق ر كۇرەس تۇرلەرى فەدەراتسياسىنىڭ باسپا ءسوز قىزمەتى ءمالىم ەتكەندەي، جارىستىڭ سوڭعى ەكى كۇنىندە بوزكىلەمگە ەركىن كۇرەس بالۋاندارى كۇش سىناسىپ، 10 سالماق دارەجەسىندە جەڭىمپازدار مەن جۇلدەگەرلەردى انىقتادى.

وكىنىشكە قاراي، قازاقستاندىق ەركىن كۇرەس بالۋاندارىنا ازيا چەمپيوناتىنىڭ باس جۇلدەسى بۇيىرمادى. ەكى بالۋانىمىز فينالدىق باسەكەدە بەلدەسكەنىمەن، قارسىلاستارىنا ەسە جىبەرىپ، كۇمىس مەدالدى قاناعات تۇتتى. اتاپ ايتساق، 61 كەلىدەگى تالعات سىرباز التىن مەدال ءۇشىن بولعان بەلدەسۋدە وزبەكستاندىق بالۋاننان 4:6 ەسەبىمەن جەڭىلىپ قالسا، 97 كەلىدەگى سەرىك باقىتجانوۆ يراندىق قارسىلاسىنان 1:6 ەسەبىمەن ۇتىلدى.

قولا مەدال نۇرقوجا قايپانوۆ (70 كەلى)، ەرعالي الىشەر (92 كەلى)، ومار ەيۋبوۆ (125 كەلى) سىندى بالۋانداردىڭ ەنشىسىندە.

كوماندالىق ەسەپتە يران، ءۇندىستان جانە وزبەكستان قۇرامالارى ۇزدىك ۇشتىكتى قۇرادى. جاپونيا - ءتورتىنشى ورىندا. قازاقستان بالۋاندارى بەسىنشى ورىنعا تابان تىرەدى.

وسىلايشا، ەلىمىزدىڭ جاس بالۋاندارى ازيا چەمپيوناتىندا بارلىعى 3 التىن، 2 كۇمىس، 11 قولا مەدالعا يە بولدى. ونىڭ 2 التىن، 5 قولا مەدالىن گرەك-ريم كۇرەسىنىڭ بالۋاندارى قورجىنىمىزعا سالسا، قىزدارىمىزدىڭ ەنشىسىندە 1 التىن، 3 قولا مەدال بار.

اۆتور: كۇنسۇلتان وتارباي