يۋليا گالىشەۆاعا پاتەر، كولىك جانە 16 ميلليون تەڭگە سىيعا بەرىلدى
وبلىس اكىمى دانيال احمەتوۆ شىعىس قازاقستاندىق سپورتشىعا پاتەر مەن «Peugeot» اۆتوكولىگىنىڭ كىلتىن، 16 ميلليون تەڭگەنىڭ سەرتيفيكاتىن تابىستادى.
قازاقستان تاريحىندا موگۋل سپورتىنان تۇڭعىش وليمپيادا مەدالىن جەڭىپ العان يۋليا گالىشەۆاعا ويىندارعا جينالعان كوپشىلىكتىڭ قوشەمەتى ەرەكشە بولدى. وسىلايشا ءتورت كۇنگە سوزىلاتىن ويىنداردىڭ شىمىلدىعى جاعىمدى جاڭالىقپەن اشىلدى.
«شىعىس قازاقستاننىڭ بارلىق تۇرعىندارىنا العىس ايتقىم كەلەدى. تۋعان جەردە مۇنداي قۇرمەتكە بولەنۋ وليمپيادادا مەدال تاققان كەزدەگىدەي قۋانىش سىيلايدى ەكەن. مۇنداي قۇرمەت پەن ءۇمىتتى اقتاۋ ءۇشىن ءالى دە جاتتىعۋىمدى شىڭداي تۇسەمىن» - دەدى يۋليا گالىشەۆا.
سپورتشىنىڭ اناسى سۆەتلانا گالىشەۆا كەشەدەن بەرى ۇيلەرىندە تويعا بەرگىسىز قاربالاس بولىپ جاتقانىن ايتادى. «ازىرگە بەرەتىن پاتەردىڭ نەشە بولمەلى ەكەنى بەلگىسىز. كارل ماركس كوشەسىنىڭ بويىندا ەكەنىن عانا بىلەمىز. جاڭادان سالىنىپ جاتقان جاقسى اۋدان عوي. بۇگىن تۇستەن كەيىن پاتەردى كورىپ، قۇجاتتارىن راسىمدەيدى. قاتتى قۋانىپ وتىرمىز. سوچيدە وعان ۆەدومستۆالىق پاتەر بەرىلگەن بولاتىن. ەندى وندا قىزىمنىڭ باپكەرى تۇراتىن بولدى. قىستا العان مەدالدىڭ جەمىسىن جازدا كورىپ جاتىرمىز» - دەدى ول.