اقىن سارانىڭ 165 جىلدىعىنا وراي رەسپۋبليكالىق ايتىس ءوتتى
«جەتىسۋدىڭ ساراسى - بار قازاقتىڭ داراسى» اتتى جىر دوداسىندا جانداربەك بۇلعاقوۆ باس جۇلدەنى قانجىعالاپ، 1,5 ميلليون تەڭگە اقشالاي سىيلىققا يە بولدى، دەپ حابارلايدى قازاقپارات ءتىلشىسى.
اقىننىڭ تۋعان ولكەسى اقسۋ اۋدانى جانسۇگىروۆ اۋىلىندا وتكەن ايتىستا ءبىرىنشى ورىندى شىعىس قازاقستاندىق سارا توقتامىسوۆا ەنشىلەدى. ەكىنشى ورىن جەتىسۋلىق بالعىنبەك يماشيەۆقا، ال ءۇشىنشى ورىن الماتىلىق سىرىم اۋەزحان مەن سولتۇستىك قازاقستاننان كەلگەن مۇرادىم ميرلانوۆقا بۇيىردى.
ال اقسۋ اۋدانى اكىمىنىڭ ارنايى جۇلدەسى ايتىسقا جاڭادان قادام باسقان الماتى وبلىسىنىڭ جاس اقىنى جالعاس سادىر ۇلىنا بەرىلدى. استانادان كەلگەن اينۇر تۇرسىنبايەۆا، پاۆلوداردىڭ نامىسىن قورعاعان قۋانىش شارمونوۆ، اقمولالىق نۇريسلام ءابدىل، تۇركىستان وبلىسىنىڭ وكىلى جارقىنبەك ناۋشابەكوۆقا ىنتالاندىرۋ سىيلىقتارى ۇسىنىلدى. ماراپاتتاردى الماتى وبلىسى اكىمىنىڭ ورىنباسارى اقان ابدۋاليەۆ تاپسىردى.
سايىستىڭ كورىگىن قىزدىرعان ءسوز شەبەرلەرى جەڭىل ءازىل، استارلى وي ايتىپ كورەرمەندەردىڭ كوڭىلىنەن شىقتى. سارا اقىن جايلى كوپتەگەن دەرەكتەر اقىندار تىلىمەن جىرلاندى. قوعامداعى ورىن الىپ وتىرعان كەلەڭسىز جايتتار دا نازاردان تىس قالماي، وي سالارلىق دۇنيەلەر كوركەم تۇردە جەتكىزىلدى.
اقىننىڭ ەسكەرتكىشىنە گۇل شوقتارىن قويۋدان باستالعان شارا سارا تاستانبەك قىزى اتىنداعى جاستار مادەني ورتالىعىندا جالعاستى. مۇندا اتاقتى «ءبىرجان - سارا» وپەراسىنان تەاترلاندىرىلعان ءۇزىندى قويىلدى. باستى رولدەردى مەرەيتويلىق شاراعا ارنايى شاقىرىلعان قازاقستان رەسپۋبليكاسىنىڭ ەڭبەك سىڭىرگەن قايراتكەرى، اكتەر ساعات جىلكەلديەۆ پەن ق ر مادەنيەت قايراتكەرى، ءانشى گۇلمايدان سۇندەتوۆا سومدادى. سونداي- اق كورمە ۇيىمداستىرىلىپ، وعان اقىن قولدانعان تۇرمىستىق زاتتار مەن ولاردىڭ ءبىرقاتار كوشىرمەلەرى، كىتاپتار، فوتوسۋرەتتەر قويىلدى. ولاردىڭ اراسىندا «ناق- بىرلىك» قوعامدىق ۇيىمى مەن وبلىستىق قازاقستان حالقى اسسامبلەياسى وكىلدەرى بىرلەسىپ رەسەيدەن الىپ كەلگەن اقىن سارانىڭ ءمۇسىنشى مارگاريتا ۆاشەنكو سالعان سۋرەتى دە بار.
اۆتور: سامال قابىشيەۆا