الماتىدا 160 پاتەر اسكەري ازاماتتارعا جەكەشەلەندىرۋگە بەرىلەدى - مينيسترلىك
8 جەلتوقسان, 22:57

الماتىدا 160 پاتەر اسكەري ازاماتتارعا جەكەشەلەندىرۋگە بەرىلەدى - مينيسترلىك

استانا. قازاقپارات – ق ر قورعانىس مينيسترلىگى ق ر قارۋلى كۇشتەر قاتارىندا قىزمەت ەتىپ جۇرگەن 160 پاتەردى جەكەشەلەندىرۋگە بەرۋدى جوسپارلاپ وتىر، دەپ حابارلايدى قازاقپارات ۆەدومستۆونىڭ رەسمي سايتىنا سىلتەمە جاساپ.

باسپا ءسوز قىزمەتىنىڭ مالىمەتتەرىنە قاراعاندا، قورعانىس مينيسترلىگى زاپاسقا شىعارىلعان جانە جابىق اسكەري قالاشىقتاردا تۇراتىن اسكەري قىزمەتشىلەردىڭ تۇرعىن ءۇي ماسەلەلەرىن شەشۋ ماسەلەسىن نازاردا ۇستاپ وتىر.

الماتى وڭىرلىك گارنيزونىنىڭ اۋداندىق پايدالانۋ بولىمىندە قارۋلى كۇشتەر اسكەري ينفراقۇرىلىم باس باسقارماسىنىڭ وكىلدەرى بۇرىنعى اسكەري قىزمەتشىلەردى تۇرعىن ۇيمەن قامتاماسىز ەتۋ ماسەلەلەرى جونىندە كەزەكتى كەزدەسۋ وتكىزدى.

قورعانىس ۆەدومستۆوسىنىڭ باستاماسىمەن 2018-جىلدىڭ ءبىرىنشى قاڭتارىنان باستاپ كۇشىنە ەنگەن زاڭناماداعى وزگەرىستەردىڭ ارقاسىندا ەڭبەك ءوتىلى 10 جىلدان اسقان، دەگەنمەن 20 جىلعا جەتپەگەن بۇرىنعى اسكەري قىزمەتشىلەر جابىق اسكەري قالاشىقتارداعى قىزمەتتىك تۇرعىن ءۇي الاڭىن قالدىق قۇنى بويىنشا جەكەشەلەندىرۋ قۇقىعىن پايدالانۋ ارقىلى باسقا پاتەرگە ايىرباستاي الادى.

كەزدەسۋ بارىسىندا جابىق اسكەري قالاشىقتارداعى تۇرعىن ۇيلەردى جەكەشەلەندىرۋگە جاتاتىن پاتەرلەرگە ايىرباستاۋ مۇمكىندىگى تۋرالى تۇسىنىكتەمەلەر مەن مالىمەتتەر دە بەرىلدى.

الماتىدا تۇرعىن ۇيگە سۇرانىستىڭ ارتۋىن ەسكەرە وتىرىپ، اسكەري ينفراقۇرىلىم باس باسقارماسى پاتەر ۇلگىسىندەگى ەكى جاتاقحانانىڭ مارتەبەسىن وزگەرتتى. ءتيىستى قايتا جوسپارلاۋ جانە جوندەۋ جۇمىستارىن جۇرگىزگەننەن كەيىن 16 ءبىر بولمەلى جانە 15 ەكى بولمەلى پاتەر قونىستانۋعا دايىن. وسى ۇيلەردەن بارلىعى 160 پاتەردى جەكەشەلەندىرۋگە بەرۋ جوسپارلانىپ وتىر.

«بۇل باعىتتاعى جۇمىس ەلىمىزدىڭ بارلىق وڭىرلەرىندە جۇرگىزىلىپ جاتىر. قازىر الماتىدا، اقتاۋدا، اقتوبەدە، جەزقازعاندا، تارازدا جانە ابايدا پاتەرلەر الماسۋعا ۇسىنىلۋدا. ايىرباستاۋ قورى تۋرالى تولىق اقپارات قورعانىس مينيسترلىگىنىڭ سايتىندا جاريالانعان»، دەلىنگەن مينيسترلىكتىڭ حابارلاماسىندا.

جاڭالىقتار