بەردىبەك ساپاربايەۆ: 160 مىڭ وتباسىعا اتاۋلى الەۋمەتتىك كومەك تاعايىندالدى

نۇر- سۇلتان. قازاقپارات - ەڭبەك جانە حالىقتىڭ الەۋمەتتىك قورعاۋ ءمينيسترى بەردىبەك ساپاربايەۆ تابىسى تومەن وتباسىلارعا اتاۋلى الەۋمەتتىك كومەك تاعايىنداۋ جۇمىسى قالاي اتقارىلىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«ەل ىشىنە جاسالعان جۇمىس ساپارلارى اياسىندا الەۋمەتتىك سۇراقتاردىڭ بارلىعىنا جاۋاپ بەرىلدى. ونىڭ قالاي شەشىلەتىنى جونىندە ايتىلدى. سىزدەر بىلەتىندەي، مينيسترلىكتىڭ قاسىندا مەملەكەتتىك ورگاندارمەن بىرلەسە قۇرىلعان جۇمىس توبى بار. وسى وتكەن 4 ايدىڭ ىشىندە جۇمىس توبى 11 وتىرىس وتكىزدى. جالپى، قازىرگى تاڭدا 160 مىڭ وتباسىعا اتاۋلى الەۋمەتتىك كومەك تاعايىندالدى. ول شامامەن - 806 مىڭداي حالىق. 10 مىڭ وتباسىعا ءا ا ك تاعايىندالعان جوق. سەبەبى، ولار بەرىلگەن تالاپتارعا سايكەس كەلمەيدى. ياعني، تابىستارى بەلگىلەنگەن كريتەرييدەن اسىپ تۇر»، - دەيدى بەردىبەك ساپاربايەۆ ۇكىمەتتىڭ باسپا ءسوز ورتالىعىندا.

ءمينيستردىڭ ايتۋىنا قاراعاندا، قازىرگى تاڭدا تەك ءساۋىر مەن مامىر ايىنىڭ وزىندە ءا ا ك ءۇشىن 23 ميلليارد تەڭگە بولىنگەن.

«جالپى جىل بويى اتاۋلى الەۋمەتتىك تولەمدى تولەۋ ءۇشىن 130 ميلليارد تەڭگە تاعايىندالعان. ورتا ەسەپپەن ءاربىر وتباسىعا 105 مىڭ تەڭگە اتاۋلى الەۋمەتتىك كومەك تاعايىندالادى. ءبىر ايتا كەتەتىن ماسەلە: الەۋمەتتىك جەلىدە كەيبىرەۋلەر بۇل تولەم ءبىرىنشى توقساندا تولەنەدى دەپ جاتىر. قايتالاپ ايتارىم: تولەم جىل بويى تولەنەدى. ءبىراق، ونىڭ ەرەجەسىنە سايكەس تابىس جىل سايىن، توقسان سايىن ناقتىلانىپ وتىراتىن بولادى»، - دەيدى مينيستر.

اۆتور: ايان بەكەن ۇلى