قازاقستان ءسوز بوستاندىعى رەيتينگىندە نەگە 160-ورىندا - داۋرەن ابايەۆتىڭ جاۋابى
«ءبىز بۇل باعىتتا ءالى دە جۇمىس ىستەپ، ۇيرەنۋ كەرەكتىگىن جاسىرىپ وتىرعان جوقپىز. بۇل - قالىپتى ەۆوليۋتسيالىق پروتسەسس. قازاقستان - دەموكراتيانى قالىپتاستىرىپ كەلە جاتقان مەملەكەت. تاۋەلسىزدىكتىڭ ءۇش ون جىلدىعىندا ءبىز جوسپارلى تۇردە دەموكراتيالىق ينستيتۋتتاردىڭ ىرگەسىن قالاپ، سونىمەن قاتار راديكالدىق سەناريلەردەن بويىمىزدى اۋلاق سالعىمىز كەلەدى. رەيتينگ تۋرالى ايتار بولسام، ءسوز بوستاندىعى تۋرالى رەيتينگ - شىنايى (وبەكتيۆتى) ەمەس دەپ ەسەپتەيمىن. ونىڭ ادىستەمەسىندە دولبار كوپ»، - دەدى داۋرەن ابايەۆ حابار ارناسىنداعى «اشىق ديالوگ» باعدارلاماسىندا.
مينيستر ءوز ءسوزى دالەلدى بولۋى ءۇشىن بىرنەشە مىسال كەلتىردى.
«ماسەلەن، ول رەيتينگتە مەكسيكا قازاقستاننان 12 پوزيتسياعا جوعارى. ءبىراق، ەكى مىڭىنشى جىلدان بەرى ول ەلدە قاتەلەسپەسەم 140 قا تارتا جۋرناليست ءولتىرىلىپ، تاعى 20 سى ءىز-ءتۇزسىز كەتكەن. ويلانىپ قاراڭىز، قاي ەلدە سىني ماقالانى جازۋعا ۇرەيلەنەر ەدىڭىز - قازاقستاندا ما، الدە بىزدەن رەيتينگتە 12 پوزيتسياعا جوعارى ەلدە مە؟ بۇل تىزىمدە 42-ورىندا - بوتسۆانا تۇر. ول ەلدە ۇكىمەت ب ا ق- تىڭ ارحيۆىن قۇرتىپ، مەملەكەتتىك اپپاراتتىڭ بارلىق اقپاراتى قۇپيا تۇردە ۇستالادى. ال ول اقپاراتقا قول جەتكىزۋ جولىنداعى كەز كەلگەن ارەكەت زاڭمەن قۋدالانادى. بۇل مىسالداردى مەن بىرەۋلەرگە تەڭەسۋ نەمەسە ءبىزدىڭ ارتىقشىلىقتارىمىزدى كورسەتۋ ءۇشىن ەمەس، رەيتينگتىڭ سۋبەكتيۆتىلىگى مەن ونىڭ ەسەبىن كورسەتۋ ءۇشىن ايتىپ وتىرمىن»، - دەدى مينيستر.
داۋرەن ابايەۆ سونىمەن قاتار اقپارات جانە كوممۋنيكاتسيالار مينيسترلىگىنىڭ «ب ا ق تۋرالى» زاڭعا ەنگىزىلگەن وزگەرىستەر تۋرالى تاعى دا پىكىر ءبىلدىردى. باعدارلاما جۇرگىزۋشىسى ءوز سۇراعىندا «كوپتەگەن ادامدار بۇل وزگەرىستەردى شەكتەۋدى ۇدەتۋ دەپ بىلەدى، بالكىم وسى وزگەرىستەر رەيتينگتەگى 160-ورىنعا سەبەپكەر بولىپ تۇرعان بولار» دەگەن سۇراق قويدى.
«ءبىز بۇل تاقىرىپتى ە ى ق ۇ وكىلدەرىمەن دە، حالىقارالىق ۇيىمدارمەن دە بىرنەشە رەت تالقىلاعان ەدىك. مەن بىرنەشە رەت كوپتەگەن نورمالار جۋرناليستەردىڭ جۇمىسىن جەڭىلدەتۋگە باعىتتالعانىن اتاپ ءوتتىم. 200 گە تارتا وزگەرىستىڭ ىشىندە تەك بىرنەشەۋى عانا پىكىرتالاس تۋدىرعان بولاتىن.
جالپى، بۇل - قازىرگى تاڭدا جاھاندىق ترەند. ماسەلەن، وتكەن جىلى گەرمانيا پارلامەنتى جالعان اقپارات تاراتقانى ءۇشىن جاۋاپكەرشىلىكتى كۇشەيتۋ تۋرالى زاڭ قابىلدادى. كوپتەگەن سىندار ول كەزدە دە ايتىلدى. ءبىراق، زاڭ قابىلداندى. سونداعى جازانىڭ قانداي بولاتىنىن بىلەسىز بە؟ جالعان اقپارات تاراتقان جەكە ادام ءۇشىن ايىپپۇل مولشەرىن 5 ميلليون ەۋروعا دەيىن كوبەيتكەن. زاڭدى تۇلعالار مۇنداي قىلمىسى ءۇشىن 50 ميلليون ەۋروعا دەيىن تولەيدى. 50 ميلليون ەۋرولىق ايىپپۇل كەز كەلگەن رەداكسيانى بانكروتقا وتىرعىزا الادى»، - دەدى داۋرەن ابايەۆ.