ەلوردادا شاكارىمنىڭ 160 جىلدىق مەرەيتويىنا ارنالعان كەش ءوتتى

استانا. قازاقپارات - ادەبي-سازدى كەشتە شاكارىمنىڭ بۇرىن-سوڭدى ايتىلماعان ولەڭدەرى ورىندالىپ جانە ارنايى قوناق رەتىندە ۇرپاعى شاقىرىلدى، دەپ حابارلايدى قازاقپارات ءتىلشىسى.

بيىل ۇلى اقىننىڭ تۋعانىنا 160 جىل، وسىعان وراي تۋعان ولكەسى سەمەيدەن باستاۋ الىپ، رەسپۋبليكالىق كولەمدە كوپتەگەن مادەني-اعارتۋ شارالار وتۋدە. بۇگىن استانا تورىندە ايتۋلى اقىن مەرەيتويىنا وراي «بوستاندىق تاڭى اتتى، قازاعىم كورىڭدەر» اتتى ادەبي-سازدى كەش وتكىزىلدى.

كەشتى بەلگىلى اكادەميك، شاكارىمتانۋشى عاريفوللا ەسىم جۇرگىزدى، مادەني شارا بارىسىندا قازاق اقىنىنىڭ كوپكە تانىمال جانە بۇرىن-سوڭدى ورىندالماعان اندەرى ايتىلىپ، ولەڭدەرى وقىلدى.

سونىمەن قاتار، شارا بارىسىندا قۇرمەتتى قوناق رەتىندە شاقىرىلعان ش. قۇدايبەردى ۇلىنىڭ ۇرپاعى نۇربەك قابىكەن ۇلى ارعى اتاسىنا قاتىستى ەستەلىك دەرەكتەرمەن ءبولىستى.

«شاكارىمنىڭ قايتىس بولعان سوڭ جەر قويناۋىنا تاپسىرىلماي 30  جىل بويى قۇدىقتا جاتقانىن ءبىرى بىلسە، ءبىرى بىلمەيدى. تەك قانا 1961- جىلى تامىزدا ۇلى احات پەن مەنىڭ اكەم قابىكەن، باقاناس دەگەن جەردەن سۇيەگىن قازىپ الىپ، ەلگە اكەلىپ، قۇران باعىشتاپ نەمەرە اعاسى ا. قۇنانباي ۇلىنىڭ قاسىنا جەرلەدى»، - دەدى ۇلى اقىن ۇرپاعى نۇربەك قابىكەن ۇلى.

مادەني شارا «رۋحاني جاڭعىرۋ» باعدارلاماسى اياسىندا استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن ءوتتى.