ۇلتتىق بانك بازالىق مولشەرلەمەنى 16,75 پايىز دەڭگەيىندە ساقتاۋ تۋرالى شەشىمىن ءتۇسىندىردى
بۇگىن ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى +/- 1 پ. ت. دالىزىمەن جىلدىق %16,75 دەڭگەيىندە قالدىرۋ تۋرالى شەشىم قابىلداعان بولاتىن.
ۇلتتىق بانك ءتوراعاسى عالىمجان ءپىرماتوۆتىڭ ايتۋىنشا، مۇنداي شەشىم ناقتى دەرەكتەر مەن جاڭا فاكتورلار ەسكەرىلگەن بولجامداردى تالداۋ نەگىزىندە قابىلدانعان. ونىڭ ۇستىنە ماكروەكونوميكالىق كورسەتكىشتەردىڭ بولجامدارىن جاڭارتىپ، ينفلياتسيا تاۋەكەلدەرى قايتا قارالعان.
«ءبىزدىڭ باعالاۋىمىز تاۋەكەلدەر بالانسىنىڭ دەزينفلياتسيالىق جاققا ءبىرشاما ىعىسقانىن كورسەتەدى. سىرتقى سەكتوردىڭ باعاعا قىسىمى ازداپ السىرەدى. ونىڭ سەبەبى - الەمدىك ازىق-تۇلىك باعاسىنىڭ ءوسۋ قارقىنى باسەڭدەپ، قازاقستانمەن ساۋدا-سەرىكتەس ەلدەردە ينفلياتسيا ەداۋىر باياۋلادى. ناقتى ايىرباستاۋ باعامىنىڭ تۇراقتى بولۋىنا بايلانىستى سىرتقى باعالاردىڭ بارىنشا باياۋ ءوسۋى ەلدەگى ينفلياتسيانىڭ تومەندەۋىنە قولايلى جاعداي جاسادى. الايدا، فيسكالدىق ىنتالاندىرۋدىڭ جالعاسۋىنا، ىشكى سۇرانىستىڭ ازاماي تۇرعانىنا، جوعارى ينفلياتسيالىق كۇتۋلەرگە جانە جانار-جاعارماي، تۇرعىن-ءۇي كوممۋنالدىق قىزمەتتەر باعاسىنىڭ وسۋىنە بايلانىستى ىشكى فاكتورلاردىڭ پروينفلياتسيالىق ىقپالى ساقتالىپ وتىر»، - دەدى عالىمجان ءپىرماتوۆ.
ۇ ب باسشىسىنىڭ ايتۋىنشا، بۇل شەشىم ينفلياتسيا ۇدەرىسىن ءارى قاراي دا تەجەپ ۇستاۋعا مۇمكىندىك بەرەدى. ال بۇل ورتامەرزىمدى كەلەشەكتە باعانىڭ ءوسۋ قارقىنىن تومەندەتۋگە ىقپال ەتەدى.
عالىمجان ءپىرماتوۆ جۋرناليستەردىڭ سۇراعىنا بەرگەن جاۋابىندا بازالىق مولشەرلەمە تۋرالى شەشىم اۋقىمدى ماسەلەلەردى تالداۋ نەگىزىندە قابىلداناتىنىن ءتۇسىندىردى.
«ءبىز تولىق بولجامدى راۋندتىڭ ناتيجەلەرى بويىنشا شەشىم قابىلدادىق. ينفلياتسيا، اعىمداعى كورسەتكىشتەر ءبىزدىڭ بولجامدارىمىزعا سايكەس كەلەدى. بۇعان دەيىن حابارلاعانىمىزداي، بازالىق مولشەرلەمەنى %16,75 دەڭگەيىندە ساقتاپ قالدىق. تاۋەكەلدەر بالانسى دەزينفلياتسياعا قاراي ويىسىپ وتىر. بۇل ينفلياتسياعا تۇسەتىن سىرتقى قىسىمنىڭ تومەندەۋىمەن بايلانىستى. ءبىرىنشى كەزەكتە، بۇل قازاقستانمەن سەرىكتەس ەلدەردەگى ينفلياتسيانىڭ تومەندەۋىمەن، ازىق-تۇلىك تاۋارلارىنا الەمدىك باعانىڭ ءوسۋ قارقىنىنىڭ تومەندەۋىمەن بايلانىستى. الايدا، ىشكى فاكتورلار ازىرگە پروينفلياتسيالىق سيپاتتا قالىپ وتىر: فيسكالدىق يمپۋلس، ىشكى سۇرانىستىڭ تۇسپەۋى جانە ينفلياتسيا بولجامدارىنىڭ جوعارى كۇيىندە قالۋى. سونىڭ ءبارىن ەسكەرىپ، ءبىز بازالىق مولشەرلەمە بويىنشا وسىنداي شەشىم قابىلدادىق»، - دەدى عالىمجان ءپىرماتوۆ.
ۇلتتىق بانك ءتوراعاسى بۇعان دەيىنگى ينفلياتسيا بولجامى ۇكىمەت جانار-جاعارماي مەن تۇرعىن ءۇي-كوممۋنالدىق قىزمەتتەرىنىڭ باعاسىن كوتەرۋ تۋرالى شەشىمىن جاريالاماي تۇرىپ جاسالعانىن ەسكە سالدى.
«بۇل جولعى بولجامىمىز وسى شەشىمدەردىڭ تىكەلەي جانە كۇتىلەتىن جاناما اسەرلەرىنە بايلانىستى وزگەردى. ياعني، ول جانار-جاعارماي مەن تۇرعىن ءۇي كوممۋنالدىق قىزمەتى باعاسىنىڭ وسۋىنە بايلانىستى. تىكەلەي اسەردى %1,5-1,7 دەيىن، ال جاناما اسەردى %1-2,5 دەيىن دەپ باعالايمىز. شەشىم قابىلدايتىن كەزدە مۇقيات باقىلاپ، جاناما اسەردى ەسكەرەمىز. جاناما اسەردىڭ ماڭىزدىلىعىنا توقتالاتىن بولساق، باعانىڭ ءوسۋى قازاقستاندا ينفلياتسيالىق بولجامداردىڭ جوعارى كۇيىندە قالۋىنا اكەلمەۋى كەرەك. سول سەبەپتى الداعى شەشىمدەردى قابىلدار كەزدە كەلىپ تۇسكەن دەرەكتەر مەن باعانى وسىرەتىن جاناما اسەرلەردى باقىلاۋ مالىمەتتەرىنە سۇيەنەمىز»، - دەدى ۇلتتىق بانك باسشىسى.
باسپا ءسوز - بريفينگى بارىسىندا عالىمجان ءپىرماتوۆ بازالىق مولشەرلەمە قانداي جاعدايدا تومەندەتىلەتىنىن ايتتى.
«كەز كەلگەن شەشىمدى قابىلدايتىن كەزدە دەرەكتەر مەن بولجامدارعا سۇيەنەمىز. بۇل رەتتە ينفلياتسيا تۋرالى ناقتى دەرەكتەردىڭ ءبىزدىڭ بولجامدارعا سايكەس كەلۋى ماڭىزدى. قازىرگى تاڭدا بازالىق ينفلياتسيانى مۇقيات باقىلاپ وتىرمىز. ەگەر ول تومەندەيتىن بولسا، جانار-جاعارماي مەن تۇرعىن ءۇي-كوممۋنالدىق قىزمەتتەر باعاسىن وسىرەتىن جاناما اسەرلەر سونشالىقتى زور ەمەس ەكەنىنە كوز جەتكىزسەك، بازالىق مولشەرلەمەنى تومەندەتەمىز. ينفلياتسيانىڭ ناقتى ديناميكاسى ءبىزدىڭ بولجامعا سايكەس شىقسا، جىلدىڭ ەكىنشى جارتىسىندا بازالىق مولشەرلەمەنى تومەندەتە باستايمىز»، - دەدى عالىمجان ءپىرماتوۆ.
ۇلتتىق بانك ءتوراعاسى ماكروەكونوميكالىق كورسەتكىشتەردىڭ جاڭارتىلعان بولجامدارىنا دا توقتالدى.
«قالىپتاسقان سىرتقى جانە ىشكى فاكتورلاردى، سونداي-اق جاڭا العىشارتتاردى ەسكەرگەندەگى ينفلياتسيا بولجامدارى ءوسۋ جاعىنا قاراي قايتا قارالدى. ءبىزدىڭ جاڭارتىلعان بولجامدار بويىنشا جىلدىق ينفلياتسيا 2023-جىلى %11-14، 2024-جىلى %9-11 جانە 2025-جىلى %5,5-7,5 شەگىندە قالىپتاسادى. قازاقستان ەكونوميكاسىنىڭ 2023-جىلعا ءوسۋ بولجامى جاقساردى. 2023-جىلى جالپى ىشكى ءونىمنىڭ ءوسۋى %4,2-5,2 ارالىعىندا قالىپتاسادى. ەكونوميكانىڭ 2024-2025-جىلدارعا ارنالعان ءوسۋ بولجامى %3,5-4,5 دەڭگەيىندە وزگەرىسسىز قالدى»، - دەدى عالىمجان ءپىرماتوۆ.