رەفەرەندۋم: 16,4 ميلليارد تەڭگەنىڭ 79 پايىزى كوميسسيا مۇشەلەرىنىڭ جالاقىسىنا جۇمسالادى
«رەفەرەندۋم شىعىستارىنىڭ 79 پايىزى كوميسسيا مۇشەلەرىنىڭ جالاقاسىن تولەۋگە باعىتتالادى. نە سەبەپتى بۇل باعىتقا قوماقتى قاراجات قاراستىرىلعان؟ بۇل كولەم پرەزيدەنت، ءماجىلىس سايلاۋلارى سياقتى اۋقىمدى ناۋقاندى وتكىزۋ كەزىندە جۇمسالعان قاراجات سوماسىنىڭ دەڭگەيىندە. اتالعان 79 پايىز ۋچاسكەلىك جانە اۋماقتىق كوميسسيالاردىڭ 71 مىڭعا جۋىق مۇشەسىنىڭ جالاقىسىن قامتاماسىز ەتۋگە بولىنەدى. ەڭبەكاقىنى تولەۋ دەڭگەيىندە ەل بويىنشا ورتاشا جالاقى كورسەتكىشى ەسكەرىلگەن»، - دەدى س. مۇستافينا و س ك- دا وتكەن باسپا ءسوز ءماسليحاتىندا.
وسى ورايدا ول رەفەرەندۋم وتكىزۋگە رەسپۋبليكالىق بيۋدجەتتەن 16,4 ميلليارد تەڭگە قاراستىرىلعانىن ەسكە سالدى.
«جالاقى تولەمى جۇمىس ىستەگەن ۋاقىتقا ساي جۇرگىزىلەدى. كوميسسيا مۇشەلەرىنىڭ بارلىعى بىردەي دەڭگەيدە جۇمىس ىستەمەيتىنى تۇسىنىكتى. كوميسسيا مۇشەلەرىنىڭ كوبىسى وزدەرىنىڭ نەگىزگى كاسىبي قىزمەتىن اتقارىپ، كوميسسيالاردا تەك بەكىتىلگەن كەستە بويىنشا جۇمىس ىستەيدى. ولاردىڭ جۇمىسقا شىعاتىن ارنايى تابەلى جۇرگىزىلەدى»، - دەدى س. مۇستافينا.
بولىنەتىن قاراجاتتىڭ 21 پايىزى داۋىس بەرۋ ۋچاسكەلەرىنىڭ مەتاريالدىق- تەحنيكالىق قامتاماسىز ەتىلۋىنە، ورتالىق رەفەرەندۋم كوميسسياسى مەن ۋچاسكەلىك ءارى اۋماقتىق كوميسسياسىنىڭ جۇمىسىنا، باسپا ونىمدەرىن دايارلاۋعا، اقپاراتتىق سۇيەمەلدەۋگە، سونداي- اق ەل اۋماعىندا ارنايى بيلبوردتار ورنالاستىرۋعا ارنالعان. بۇدان بۇرىن حابارلانعانداي، پرەمەر- ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ كونستيتۋتسيالىق رەفورماعا قاتىستى وتەتىن رەسپۋبليكالىق رەفەرەندۋم وتكىزۋگە قانشا قاراجات بولىنگەنىن ايتتى.
«كونستيتۋتسيالىق رەفەرەندۋم وتكىزۋگە رەسپۋبليكالىق بيۋدجەتتەن 16 ميلليارد 400 ميلليون تەڭگە بولىنەدى. ورتالىق سايلاۋ كوميسسياسى ءتيىستى ەسەپ- قيساپتى ۇسىندى. بۇگىن ۇكىمەت وسىعان بايلانىستى قاۋلى قابىلدادى. قارجى رەسپۋبليكالىق بيۋدجەتتەن، ۇكىمەت رەزەرۆىنەن بولىنەدى»، - دەدى ە. جاماۋبايەۆ.
اۆتور: رۋسلان عابباسوۆ